અમેરિકા અને ભારત વચ્ચે વેપાર સોદો થયો છે, પ્રાપ્ત માહિતી અનુસાર, અમેરિકાએ ભારત પર 25 ટકા ટેરિફ લગાવ્યો છે. ભારત અને અમેરિકા વેપાર કરાર પર સહમત ન થઈ શક્યા પછી આ પગલું લેવામાં આવ્યું છે. ટ્રમ્પે કહ્યું કે ભારત અમેરિકન માલ પર ઉચ્ચ ટેરિફ લાદે છે, જેના જવાબમાં આ 'પારસ્પરિક ટેરિફ' લાગુ કરવામાં આવ્યો છે. US રાષ્ટ્રપતિ ડોનાલ્ડ ટ્રમ્પે પોતે આ જાહેરાત કરી છે. ટ્રમ્પે કહ્યું કે, આ 1 ઓગસ્ટથી ભારત પર લાગુ થશે.
હકીકતમાં, ભારત અને અમેરિકા વચ્ચે વેપાર સોદા અંગે લાંબા સમયથી વાતચીત ચાલી રહી હતી. હવે ટ્રમ્પે પોતે સોશિયલ મીડિયા પ્લેટફોર્મ 'X' પર આ અંગે માહિતી આપી છે.
ડોનાલ્ડ ટ્રમ્પ કહે છે કે, ભારત અમારો મિત્ર છે, પરંતુ અમે છેલ્લા ઘણા વર્ષોમાં ભારત સાથે પ્રમાણમાં ઓછો વેપાર કર્યો છે, કારણ કે તેમના ટેરિફ ખૂબ ઊંચા છે, જે વિશ્વમાં સૌથી વધુ છે. જે અમેરિકાને વેપાર વધારવાથી રોકે છે.
ટ્રમ્પના કહેવા પ્રમાણે, ભારત સતત રશિયા પાસેથી લશ્કરી સાધનો ખરીદી રહ્યું છે, જે યોગ્ય નથી. દરેક વ્યક્તિ ઈચ્છે છે કે રશિયા યુક્રેન પર હુમલો કરવાનું બંધ કરે, પરંતુ ભારત રશિયા સાથે સતત વેપાર વધારી રહ્યું છે, જે યોગ્ય પગલું નથી. તેથી, આ બધી બાબતોને ધ્યાનમાં રાખીને, અમેરિકાએ ભારત પર 25 ટકા ટેરિફ લાદવાનો નિર્ણય લીધો છે, અને આ 1 ઓગસ્ટથી અમલમાં આવશે.
અત્રે ઉલ્લેખનીય છે કે આ નાણાકીય વર્ષના એપ્રિલ-જૂન ક્વાર્ટરમાં, ભારતની અમેરિકામાં નિકાસ 22.8 ટકા વધીને 25.51 બિલિયન ડૉલર થઈ ગઈ છે, જ્યારે આયાત 11.68 ટકા વધીને 12.86 બિલિયન ડૉલર થઈ ગઈ છે.
છેલ્લા કેટલાક મહિનાઓથી, ભારતીય અને અમેરિકન અધિકારીઓ આ વેપાર કરાર અંગે વાટાઘાટો કરી રહ્યા હતા, પરંતુ ક્યારેક તેઓ આશાવાદી અને ક્યારેક સતર્ક સ્થિતિમાં દેખાતા હતા. કરાર ક્યારે થશે અને શું થશે તે સ્પષ્ટ નહોતું. અમેરિકાએ ભારત અને કેટલાક અન્ય દેશોને 1 ઓગસ્ટની સમયમર્યાદા આપી હતી. એવું કહેવામાં આવ્યું હતું કે, ક્યાં તો તેઓએ આ તારીખ સુધીમાં વેપાર કરાર કરવો જોઈએ અથવા તેમને વધેલા ટેરિફનો સામનો કરવો પડશે.
આ ભારતીય નિકાસકારો પર ઊંડી અસર કરી શકે છે, ખાસ કરીને ઓટોમોબાઈલ, ફાર્માસ્યુટિકલ્સ અને જેમ્સ અને જ્વેલરી ક્ષેત્રોમાં. ભારત સરકારે આ નિર્ણયનો અભ્યાસ શરૂ કરી દીધો છે અને વેપાર વાટાઘાટોને ઝડપી બનાવવાનું કહ્યું છે. નિષ્ણાતો માને છે કે, આ ટેરિફ ભારતના અર્થતંત્ર અને રૂપિયાના મૂલ્ય પર દબાણ લાવી શકે છે.
