સ્વરસંગ્યા ચેરિટેબલ ટ્રસ્ટ અને નિર્મલ હોસ્પિટલે નિઃશુલ્ક બાળ આરોગ્ય અને વિકાસ કેમ્પનું આયોજન કર્યું

સુરતઃ નબળા વર્ગના બાળકોના આરોગ્ય અને સર્વાંગી વિકાસને ધ્યાનમાં રાખીને સ્વરસંગ્યા ચેરિટેબલ ટ્રસ્ટ તથા નિર્મલ હોસ્પિટલ, રિંગ રોડ, સુરત દ્વારા પોષણ સંગમ (C-MAM) પહેલ હેઠળ નિઃશુલ્ક બાળ આરોગ્ય અને વિકાસ કેમ્પનું આયોજન કરવામાં આવ્યું હતું.

આ કેમ્પ ગંભીર કુપોષિત (SAM) તથા મધ્યમ કુપોષિત (MAM) બાળકો માટે યોજાયો હતો. કેમ્પ દરમિયાન CBC બ્લડ ટેસ્ટ, બાળરોગ નિષ્ણાત દ્વારા આરોગ્ય તપાસ, પોષણ માર્ગદર્શન તથા હિયરિંગ સ્ક્રીનિંગ નિઃશુલ્ક કરવામાં આવ્યા હતા. તબીબી નિષ્ણાતોના જણાવ્યા મુજબ કુપોષણ માત્ર વજન પર અસર કરતું નથી પરંતુ મગજના વિકાસ, રોગપ્રતિકારક શક્તિ, બોલવાની અને શૈક્ષણિક ક્ષમતા પર પણ અસર કરે છે.

આંકડા મુજબ બાળકોમાં થતો 60 ટકા સુધીનો હિયરિંગ લોસ વહેલી તકે તપાસથી અટકાવી શકાય છે. સ્વરસંગ્યા ચેરિટેબલ ટ્રસ્ટ દ્વારા પોષણ સાથે વિકાસને પ્રાથમિકતા આપતા હિયરિંગ સ્ક્રીનિંગનો સમાવેશ કરવામાં આવ્યો હતો. નિર્મલ હોસ્પિટલ દ્વારા તબીબી સુવિધા અને નિષ્ણાત સેવા ઉપલબ્ધ કરાવવામાં આવી. આ પહેલ દ્વારા વહેલી તકે નિદાન અને જાગૃતિના મહત્વ પર ભાર મુકાયો હતો.