મધ્યપ્રદેશમાં રાજકીય ગતિવિધિઓ ચરમસીમાએ છે, અને ભારતીય જનતા પાર્ટી (BJP) અને કોંગ્રેસ વચ્ચે રાજ્યસભાની 3 બેઠકો માટે ચેકમેટની રમત તીવ્ર બની છે. BJPએ મહેશ કેવતને ત્રીજી બેઠક માટે મેદાનમાં ઉતારીને સ્પર્ધાને રસપ્રદ બનાવી છે, જ્યારે કોંગ્રેસે મીનાક્ષી નટરાજનને ઉમેદવાર બનાવ્યા છે. અહીં તમને બતાવી દઈએ કે, મધ્યપ્રદેશમાં રાજ્યસભાની 3 બેઠકો ખાલી પડી રહી છે, જેમાંથી બે BJP પાસે છે અને એક કોંગ્રેસ પાસે છે. BJPએ બે બેઠકો માટે તરુણ ચુઘ અને રજનીશ અગ્રવાલને ઉમેદવાર બનાવ્યા છે.
BJP દ્વારા ત્રીજા ઉમેદવારને મેદાનમાં ઉતાર્યા પછી, કોંગ્રેસ છાવણીમાં ફૂટ પડવાના અહેવાલો ઉપર આવવા લાગ્યા છે, જે પાર્ટી હાઇકમાન્ડને ચિંતામાં મૂકી રહ્યા છે. સૂત્રોના જણાવ્યા અનુસાર, રાજ્યસભાની ચૂંટણીમાં કોંગ્રેસના ઘણા ધારાસભ્યો બળવો કરી શકે છે અને ક્રોસ-વોટિંગ કરી શકે છે, જેનાથી પાર્ટીની એકમાત્ર બેઠક જોખમમાં મુકાઈ શકે છે. જોકે, કોંગ્રેસ પાર્ટી પણ સક્રિય થઈ ગઈ છે અને તેના ધારાસભ્યોને અન્ય રાજ્યોમાં ખસેડવાની તૈયારી કરી રહી છે. આ દરમિયાન, કોંગ્રેસના ઘણા ધારાસભ્યો દિલ્હી જવા રવાના થઈ ગયા છે.
મધ્યપ્રદેશમાં રાજ્યસભાની ચૂંટણી દરમિયાન કોંગ્રેસ પાર્ટીની મુશ્કેલીઓ વધતી દેખાઈ રહી છે, કારણ કે સૂત્રો સૂચવે છે કે 14 થી 15 કોંગ્રેસના ધારાસભ્યો BJP સાથે સંપર્કમાં છે. એવું કહેવામાં આવી રહ્યું છે કે, 18 જૂને રાજ્યસભાની 3 બેઠકો માટે મતદાનમાં ધારાસભ્યો ક્રોસ વોટિંગ કરી શકે છે. પરિણામે, એવી આશંકા છે કે કોંગ્રેસ તેની એકમાત્ર રાજ્યસભા બેઠક ગુમાવી શકે છે, અને ત્રણેય બેઠકો BJP પાસે જઈ શકે છે.
મધ્યપ્રદેશ વિધાનસભાના 230 સભ્યોમાંથી, રાજ્યસભાની ચૂંટણીમાં હાલમાં ફક્ત 228 ધારાસભ્યો મતદાન કરવા માટે લાયક છે, કારણ કે દતિયાના ધારાસભ્ય રાજેન્દ્ર ભારતીનું સભ્યપદ રદ કરવામાં આવ્યું છે, જ્યારે વિજયપુરના ધારાસભ્ય મુકેશ મલ્હોત્રા સુપ્રીમ કોર્ટના આદેશને કારણે રાજ્યસભા માટે મતદાન કરી શકશે નહીં. પરિણામે, રાજ્યસભાની બેઠક જીતવા માટે 57 મતોની જરૂર છે. ભારતીય જનતા પાર્ટી (BJP) પાસે 164 ધારાસભ્યો છે, જ્યારે કોંગ્રેસ પાસે 63 છે. બે બેઠકો પર તેના ઉમેદવારોને ચૂંટવા માટે, BJPને 114 ધારાસભ્યોની જરૂર પડશે, ત્યાર પછી પણ BJP પાસે 50 મત બાકી છે. ત્રીજી બેઠક જીતવા માટે, BJPને વધુ 7 મતોની જરૂર પડશે. જો 14-15 કોંગ્રેસના ધારાસભ્યો ક્રોસ વોટિંગ કરે તો ત્રીજી બેઠક સરળતાથી BJPને મળી શકે છે.
ભારતીય જનતા પાર્ટી (BJP) રાજ્યસભામાં પોતાનું વર્ચસ્વ મજબૂત કરવા માટે કોઈ કસર છોડી રહી નથી, અને પાર્ટી મધ્યપ્રદેશમાં ત્રીજી બેઠક પર નજર રાખી રહી છે. ધારાસભ્યો અને મંત્રીઓનું ભોપાલમાં CM હાઉસ પહોંચવાનું સતત ચાલુ છે. BJPના ધારાસભ્ય આશિષ શર્માએ કોંગ્રેસના પ્રદેશ પ્રમુખના નિવેદનનો વિરોધ કરતા કહ્યું કે, પ્રતિકૂળ પરિસ્થિતિઓમાં પણ અનુકૂળ પરિસ્થિતિઓ બનાવવાનું BJPનું કામ છે. જો BJP એ ત્રીજો ઉમેદવાર ઉતાર્યો છે, તો તમે માનજો નક્કી તે જીતીને જ આવશે.
ક્રોસ વોટિંગ મુદ્દા અંગે, આશિષ શર્માએ કહ્યું, 'તમે જોતા જાઓ આગળ શું થાય છે. દરેક ધારાસભ્ય વિકાસ સાથે ઉભા રહેશે. આ PM મોદી અને CM મોહન યાદવનું નેતૃત્વ છે, ત્યાં બધું સારું જ થશે, જે રીતે એક કેવટે ભગવાન શ્રી રામને પાર પહોંચાડ્યા હતા. હવે, આ કેવટ (મહેશ કેવટ) BJPને વિજય તરફ લઈ જશે.
રાજ્યસભાની ચૂંટણી પહેલા કોંગ્રેસ પાર્ટીમાં બળવાની અફવાઓ તીવ્ર બનતા, કોંગ્રેસ પાર્ટીનું ટોચનું નેતૃત્વ તાત્કાલિક ડેમેજ કંટ્રોલમાં સક્રિય થઈ ગયું. રાજ્ય કોંગ્રેસ સમિતિના વરિષ્ઠ નેતાઓને પાર્ટીના તમામ ધારાસભ્યોને એક રાખવાનું કામ સોંપવામાં આવ્યું છે. પાર્ટી ધારાસભ્યોને તમિલનાડુ અથવા કર્ણાટક ખસેડવાની તૈયારી કરી રહી છે. પાર્ટીના વરિષ્ઠ નેતાઓ નારાજ ધારાસભ્યોની નારાજગી દૂર કરવા માટે તેમની દરેકની સાથે સામ સામે ચર્ચા પણ કરી રહ્યા છે. આ ઉપરાંત, પાર્ટી કોઈપણ ક્રોસ-વોટિંગ અટકાવવા માટે કડક વ્હીપ બહાર પાડી શકે છે.
23.jpg)
