લખનઉ સુપર જાયન્ટ્સ (LSG)એ IPL 2025 મેગા ઓક્શનમાં ભારતીય વિકેટકીપર-બેટ્સમેન રિષભ પંતને રૂ. 27 કરોડમાં ખરીદ્યો હતો, જેનાથી તે IPL ઇતિહાસનો સૌથી મોંઘો ખેલાડી બન્યો. LSGએ તે જ સિઝનમાં તેમને કેપ્ટનશીપ પણ સોંપી. જોકે, તે સિઝનમાં ટીમનું પ્રદર્શન નબળું રહ્યું. તેમ છતાં, પંતને 2026 માટે જાળવી રાખવામાં આવ્યો હતો, અને આ વખતે પણ, ન તો તેમનું બેટ કે ન તો ટીમે સારું પ્રદર્શન કર્યું. ટુર્નામેન્ટ સમાપ્ત થયા પછી, લખનઉ સુપર જાયન્ટ્સ તરફથી એક સત્તાવાર નિવેદનમાં કહેવામાં આવ્યું હતું કે, પંતે કેપ્ટનશીપ છોડી દેવાનો નિર્ણય લીધો છે. જોકે, અહેવાલો અનુસાર, આ સાચું નથી.
હકીકતમાં, જ્યારે રિષભ પંતનું ફોર્મ અને ટીમનું પ્રદર્શન નબળું હતું, ત્યારે એવા અહેવાલો આવ્યા હતા કે, તે કેપ્ટનશીપ ગુમાવશે. રૂ. 27 કરોડ ખર્ચ કરવા છતાં, LSGને કંઈ મળ્યું નહીં. ટીમ છેલ્લા બે સિઝનમાં પ્લેઓફ માટે ક્વોલિફાય થવાની નજીક પણ પહોંચી શકી ન હતી. પરિણામે, ટીમના કેપ્ટનને રોષનો સામનો કરવો પડ્યો હતો. જોકે, સોશિયલ મીડિયા પર ખોટો દાવો કરવામાં આવ્યો હતો કે, રિષભ પંતે LSGના કેપ્ટનશીપમાંથી રાજીનામું આપી દીધું છે. પરંતુ, આ રાજીનામાની સચ્ચાઈ કંઈક અલગ જ હતી.
એક ક્રિકબ્લોગર રિપોર્ટમાં દાવો કરવામાં આવ્યો હતો કે, LSG મેનેજમેન્ટે રિષભ પંત પાસેથી કેપ્ટનશીપ છીનવી લીધી હતી. ટીમ અને પંતની પ્રતિષ્ઠા જાળવવા માટે, સોશિયલ મીડિયા પર ટીમ ડિરેક્ટર ટોમ મૂડીનો ઉલ્લેખ કરીને કહેવામાં આવ્યું હતું કે, રિષભ પંતે કેપ્ટનશીપ છોડી દીધી છે. ઇન્સ્ટાગ્રામ પર, ટીમે મૂડી વતી લખ્યું હતું કે, 'રિષભ પંતે ફ્રેન્ચાઇઝીને આ વિનંતી કરી હતી, અને અમે તેને આદરપૂર્વક સ્વીકારી છે. આ નિર્ણયો ક્યારેય સરળ નથી હોતા. કેપ્ટન તરીકે આ ડ્રેસિંગ રૂમમાં જે કંઈ લાવ્યા છે તેના માટે અમે રિષભ પંતના આભારી છીએ. અમારું ધ્યાન હવે હજુ ઉપર સુધી પહોંચવા માટે એકસાથે મળીને ફરીથી ઉભા થવા પર છે.'
આ દરમિયાન, જો અહેવાલો પર વિશ્વાસ કરવામાં આવે તો, IPL 2026 પછી તરત જ મેનેજમેન્ટ દ્વારા પંત પાસેથી કેપ્ટનશીપ છીનવી લેવામાં આવી હતી. તે સમયે, પંતે નવી ટીમમાં જોડાવાનું નક્કી કરી લીધું હતું. તેમણે પોતાના સાથી ક્રિકેટરો સાથે નવી ટીમની શક્યતા અંગે પણ ચર્ચા કરી અને આખરે દિલ્હી કેપિટલ્સમાં પાછા ફરવાનો નિર્ણય લીધો. દિલ્હી કેપિટલ્સ અને લખનઉ સુપર જાયન્ટ્સ વચ્ચે હરીફાઈ થઇ શકે છે. કુલદીપ યાદવ LSGમાં જઈ શકે છે, અને રિષભ પંત દિલ્હી પરત ફરી શકે છે.
સૂત્રોએ એ પણ જણાવ્યું હતું કે, LSG મેનેજમેન્ટે 2026ની ખરાબ સીઝન માટે પંતને મોટાભાગે દોષી ઠેરવ્યો હતો. આ બાબતથી પરિચિત લોકોના જણાવ્યા અનુસાર, IPL 2026માં ટીમના પ્રદર્શન માટે ટીમ મેનેજમેન્ટ તરફથી પંતને ટીમના અન્ય કોઈપણ ખેલાડી કે સભ્ય કરતાં વધુ ટીકા મળી હતી. સૂત્રએ ઉમેર્યું હતું કે, 'IPL સીઝન પછી તરત જ પંતને કેપ્ટનશીપ પરથી દૂર કરવાની ઉતાવળ અંગે પ્રશ્નો ઉભા થઈ રહ્યા છે. આ ઉપરાંત, પંત જે જગ્યાએ પોતાનું કોઈ મહત્વ જ ન હોય એવી ફ્રેન્ચાઇઝી સાથે રહેવાને બદલે બીજે ક્યાંય જવા માટે ઉત્સુક દેખાતો હતો.'
