કેનેડાની કાયદા અમલીકરણ એજન્સીઓ (Law Enforcement Agencies) દ્વારા 'ક્રિમિનલ ટુરિઝમ' (ગુનાહિત પ્રવાસન) રેકેટમાં કથિત સંડોવણી બદલ બે ભારતીય નાગરિકો સામે ગુનાહિત આરોપો દાખલ કરવામાં આવ્યા છે, જ્યારે અન્ય 12 ભારતીયોને વોન્ટેડ જાહેર કરવામાં આવ્યા છે. કેનેડિયન પોલીસ દ્વારા ચલાવવામાં આવેલા એક લાંબા ગાળાના વિશેષ ઓપરેશન 'પ્રોજેક્ટ જેટસેટર' (Project Jetsetter) અંતર્ગત કુલ 46 વ્યક્તિઓ સામે ગુના દાખલ કરાયા છે અને 164 શંકાસ્પદો હજુ પણ ફરાર છે, જે અંતર્ગત આ ભારતીયો સામે કાર્યવાહી કરવામાં આવી છે.
શું છે આ ગુનાહિત રેકેટ?
પોલીસ તપાસમાં બહાર આવ્યું છે કે આ ઇન્વેસ્ટિગેશન હેઠળ સંગઠિત ગુનાખોરી (Organised Crime) ની વ્યાપક પ્રવૃત્તિઓને આવરી લેવામાં આવી હતી. આ ટોળકી દ્વારા મોટા પાયે રીટેલ ચોરીની કામગીરી, વાહનોની ખરીદીમાં કૌભાંડો, વ્હીકલ ફાઇનાન્સિંગ (વાહન લોન) ફ્રોડ, વીમાના પૈસા પચાવી પાડવા માટે આયોજનબદ્ધ અકસ્માતો (Staged Collisions) કરવા, નજર ચૂકવીને દાગીનાની ચોરી કરવી તેમજ વાહનો અને અન્ય સામાનની ચોરી કરીને તેને દેશ બહાર નિકાસ કરવા જેવા ગંભીર ગુનાઓ આચરવામાં આવતા હતા.
ડરહામ રીજનલ પોલીસ સર્વિસ (DRPS) દ્વારા શુક્રવારે જારી કરાયેલા એક નિવેદનમાં જણાવાયું છે કે, આ ખાસ અભિયાન હેઠળ કેનેડા આવીને મોટા પાયે આર્થિક લાભ મેળવવાના હેતુથી ગુના આચરતી સંગઠિત ટોળકીઓને નિશાન બનાવવામાં આવી છે, જેઓ અવારનવાર આંતરરાષ્ટ્રીય ગુનાહિત નેટવર્ક સાથે જોડાયેલી હોય છે. આ પ્રવૃત્તિઓ પૂર્વનિયોજિત, સંકલિત અને માત્ર નફાના હેતુથી પ્રેરિત હોય છે; તે કોઈ આકસ્મિક કે તકવાદી ઘટનાઓ નથી. પોલીસે ઉમેર્યું કે, આ ગુનાઓ સુઆયોજિત, વારંવાર દોહરાવી શકાય તેવા અને મહત્તમ આર્થિક લાભ મેળવવા માટે ડિઝાઇન કરવામાં આવ્યા છે.
આરોપીઓ અને વોન્ટેડ ભારતીયોની યાદી
કેનેડા પોલીસ દ્વારા જે બે ભારતીયો સામે આરોપો દાખલ કરવામાં આવ્યા છે, તેમાં 23 વર્ષીય અર્શજોત સિંહ ધિલ્લોન અને 23 વર્ષીય અરમાન શર્મા સામેલ છે.
આ ઉપરાંત, આ ક્રિમિનલ ટુરિઝમ રેકેટમાં કથિત સંડોવણી બદલ જે 12 ભારતીયોને વોન્ટેડ જાહેર કરાયા છે, તેમના નામ અને ઉંમર નીચે મુજબ છે:
5,000 કલાકની તપાસ અને કરોડોનું નુકસાન
DRPS ના ફાઇનાન્સિયલ ક્રાઇમ્સ યુનિટે જણાવ્યું હતું કે, 9 અલગ-અલગ તપાસ અને 5,000 થી વધુ કલાકોની સઘન તપાસ દરમિયાન ક્રિમિનલ ટુરિઝમ સાથે જોડાયેલી 200 થી વધુ ઘટનાઓ ટ્રેક કરવામાં આવી હતી. આ ગુનાઓને કારણે માત્ર ઑન્ટારિયોના ડરહામ ક્ષેત્રમાં જ અંદાજે 2.61 મિલિયન કેનેડિયન ડોલર (CA$) થી વધુનું પ્રમાણિત આર્થિક નુકસાન થયું છે.
'પ્રોજેક્ટ જેટસેટર' સાથે જોડાયેલી આ તપાસ વર્ષ 2019 થી ચાલી રહી છે, જેમાં અત્યાર સુધીમાં 1,440 થી વધુ ચાર્જિસ (આરોપો) લગાવવામાં આવ્યા છે. તપાસકર્તાઓ હજી પણ આ નેટવર્ક સાથે જોડાયેલી અન્ય ગુનાહિત ઘટનાઓની ઓળખ કરી રહ્યા હોવાથી આ ઓપરેશન હાલમાં પણ ચાલુ છે.
રોયલ કેનેડિયન માઉન્ટેડ પોલીસના નેશનલ ઇન્ટેલિજન્સના ડાયરેક્ટર જનરલ મારિયો પેનિઝોને જણાવ્યું હતું કે, ક્રિમિનલ ટુરિઝમ એ સંગઠિત ગુનાખોરીનું એક નવું, સરહદો વિનાનું સ્વરૂપ છે જે કેનેડિયનોના રોજિંદા જીવનને પ્રભાવિત કરે છે. આ બાબત મજબૂત વૈશ્વિક ભાગીદારીની જરૂરિયાત પર ભાર મૂકે છે. અમારો ઇન્ટેલિજન્સ પ્રોગ્રામ કડીઓ જોડવા અને જાહેર સુરક્ષા વધારવા માટે અમારા પોલીસ ભાગીદારો સાથે મળીને નજીકથી કામ કરી રહ્યો છે.
નોંધનીય છે કે, કેનેડા પોલીસ દ્વારા જાહેર કરવામાં આવેલી 73 પાનાની આરોપીઓની યાદીમાં મોટાભાગના નામ રોમાનિયાના નાગરિકોના છે.
