આ દેશમાં સોનું-ચાંદી નહીં, કાકડીના ભાવ આસમાને પહોંચ્યા

રશિયા અને યુક્રેન વચ્ચે ચાલી રહેલા યુદ્ધ વચ્ચે, હવે રશિયા સામે એક નવી સમસ્યા ઊભી થઈ ગઈ છે. એક તરફ જ્યાં દુનિયાભરમાં સોના અને ચાંદીના ભાવને લઈને હલચલ મચી રહી છે, તો બીજી તરફ રશિયામાં કાકડીના ભાવમાં થયેલા અચાનક વધારાને કારણે લોકોને ભારે સમસ્યાઓનો સામનો કરવો પડી રહ્યો છે. સોશિયલ મીડિયા પર કાકડીના ભાવમાં થયેલા વધારા અંગે ઘણી ચર્ચા થઈ રહી છે, લોકો તેને ‘નવું સોનું’ કહી રહ્યા છે.

ઈન્ડિપેન્ડન્ટના એક અહેવાલ મુજબ, દેશમાં કાકડીના ભાવ આસમાને પહોંચી ગયા છે, ડિસેમ્બરથી બમણા થઈને લગભગ 300 રુબલ (રૂ. 356) પ્રતિ કિલો થઈ ગયા છે. કેટલાક કાકડીઓ તો તેનાથી બે કે ત્રણ ગણા ભાવે વેચાઈ રહી છે. ગુસ્સે ભરાયેલા રશિયનોએ સોશિયલ મીડિયા પ્લેટફોર્મ પર મોંઘા શાકભાજીના ફોટા પોસ્ટ કર્યા છે અને કાકડીઓની તુલના વૈભવી વસ્તુઓ સાથે કરવા માટે ડાર્ક હ્યુમરનો ઉપયોગ કરી રહ્યા છે.

https://twitter.com/Jacksm227/status/2020935235765174325?s=20

ફોર્બ્સ રશિયાના અહેવાલ મુજબ, ફેબ્રુઆરીની શરૂઆત સુધીમાં, કાકડીઓની કિંમત માંસ જેટલી મોંઘી થઈ ગઈ હતી. ઘણા સુપરમાર્કેટમાં કાકડીઓની કિંમત માંસ અને કેળા જેવા આયાતી ફળો જેટલી અથવા તેનાથી પણ વધુ થઈ ગઈ છે. આ મુદ્દો બજારમાંથી રાજકારણ સુધી પહોંચી ચૂક્યો છે.

જસ્ટ રશિયા પાર્ટીના નેતા સેરગેઈ મીરોનોવે સરકાર પર નિશાન સાધ્યું છે. તેમણે મોસમી પરિબળો વિશે સરકારના નિવેદનની ટીકા કરી હતી અને કહ્યું હતું કે લોકો મૂળભૂત ખોરાક માટે પણ ખરીદવા માટે સંઘર્ષ કરી રહ્યા છે, જે મંજૂર નથી.

કાકડીના ભાવ કેમ વધી રહ્યા છે?

યુદ્ધ સમયની મોંઘવારી: રશિયાના મિલિટ્રી પર કેન્દ્રિત અર્થતંત્ર તરફ વધવાથી બિન-લશ્કરી ક્ષેત્રોમાં ભાવમાં ભારે વધારો થયો છે.

મજૂરોની અછત: પહેલા ભારે સબસિડીથી ગ્રીનહાઉસ ઉદ્યોગને વેગ મળ્યો હતો, પરંતુ યુદ્ધ અને ત્યારબાદના ડ્રાફ્ટને કારણે મજૂરોની ભારે અછત સર્જાઈ છે.

ટેક્સમાં વધારો: 1 જાન્યુઆરી, 2026થી વેલ્યૂ એડેડ ટેક્સ (VAT)માં 20% થી 22% સુધીનો વધારો થવાથી ગ્રાહક ભાવ પર વધુ દબાણ આવ્યું છે.

મોસમી વધઘટ: જોકે કૃષિ મંત્રાલયે જણાવ્યું કે, શિયાળાની પરિસ્થિતિઓને કારણે ભાવ વધ્યો છે, પરંતુ વર્તમાન ભાવ વધારો સામાન્ય મોસમી વધઘટ કરતા ખૂબ વધારે છે.