ટ્રમ્પે ઇટાલિયન PMની પ્રશંસા કરતા કહ્યું- 'મને મેલોની ખૂબ ગમે છે....', PM જ્યોર્જિયા હસી પડ્યા

જ્યાં એક તરફ ડોનાલ્ડ ટ્રમ્પના ટેરિફ યુદ્ધે સમગ્ર વિશ્વમાં હોબાળો મચાવ્યો છે, અને લોકો ટ્રમ્પ સાથે વાત કરવાથી પણ ડરે છે. બીજી તરફ, ટ્રમ્પ ઇટાલીના PM જ્યોર્જિયા મેલોનીના ખુબ વખાણ કરી રહ્યા છે. ટ્રમ્પે તો એમ પણ કહ્યું કે, તેમને PM મેલોની ખૂબ ગમે છે. ટ્રમ્પ અમેરિકામાં PM મેલોનીને મળ્યા પણ છે. ટ્રમ્પના ટેરિફ નિર્ણય પછી PM મેલોની વ્હાઇટ હાઉસમાં તેમને મળનારા પ્રથમ યુરોપિયન નેતા છે. આ બેઠકમાં બંને નેતાઓએ ટેરિફ અને વેપાર જેવા મુદ્દાઓ પર પણ વાત કરી.

એક અંગ્રેજી અખબારમાં પ્રકાશિત થયેલા અહેવાલ મુજબ, વ્હાઇટ હાઉસના ઓવલ ઓફિસમાં પત્રકારો સાથે વાત કરતી વખતે ટ્રમ્પે કહ્યું, 'મને PM જ્યોર્જિયા ખૂબ ગમે છે. તેઓ એક મહાન PM છે અને ઇટાલીમાં તેમનું કાર્ય ઉત્તમ છે. અમને તેમના પર ગર્વ છે.' તેમણે મેલોનીને વિશ્વના અસલી નેતાઓમાંના એક તરીકે વર્ણવ્યા. ટ્રમ્પે કહ્યું કે, તેઓ મેલોનીને શરૂઆતના દિવસોથી જ ઓળખે છે, જ્યારે તે ઇટાલીના PM બન્યા હતા. તેમણે કહ્યું, 'મને શરૂઆતથી જ ખબર હતી કે, તેમની પાસે અદ્ભુત પ્રતિભા છે. અમારા દેશો અને અમારી વચ્ચે ખૂબ સારા સંબંધો છે.'

બીજી તરફ, PM મેલોનીએ પણ ટ્રમ્પ સાથેની તેમની મુલાકાતને મહત્વપૂર્ણ ગણાવી અને બંને નેતાઓ વચ્ચે રૂઢિચુસ્ત વિચારોની સમાનતા પર ભાર મૂક્યો. તેમણે કહ્યું, 'મારું લક્ષ્ય પશ્ચિમને ફરીથી મહાન બનાવવાનું છે, અને મને લાગે છે કે આપણે સાથે મળીને તે કરી શકીએ છીએ.' PM મેલોનીએ ઇમિગ્રેશન અને ટ્રમ્પના 'મેક અમેરિકા ગ્રેટ અગેઇન' વિઝન વચ્ચે ઘણી સમાનતાઓ દર્શાવી. તેમણે ટ્રમ્પને ટૂંક સમયમાં રોમની મુલાકાત લેવા આમંત્રણ પણ આપ્યું અને કહ્યું કે, તે દરમિયાન તેઓ યુરોપિયન નેતાઓને પણ મળી શકે છે. PM મેલોનીએ કહ્યું, 'રોમની સત્તાવાર મુલાકાત લેવાનું આમંત્રણ સ્વીકારવા બદલ હું રાષ્ટ્રપતિ ટ્રમ્પનો આભાર માનું છું. ત્યાં તેઓ યુરોપિયન નેતાઓને પણ મળી શકે છે.'

https://twitter.com/nexta_tv/status/1912914244305113329

વ્હાઇટ હાઉસ ખાતે, PM મેલોની અને ટ્રમ્પે વેપાર, ટેરિફથી લઈને ઇમિગ્રેશન અને પશ્ચિમી રાષ્ટ્રવાદ જેવા મુદ્દાઓ પર પણ ચર્ચા કરી.

આ દરમિયાન ટ્રમ્પે કહ્યું કે, તેઓ ઉતાવળમાં વ્યવસાયિક સોદા કરવા માંગતા નથી. અમેરિકાને ટેરિફથી ઘણો ફાયદો થઈ રહ્યો છે. જોકે, આ દરમિયાન ટ્રમ્પે યુરોપિયન યુનિયન સાથે કરારનો સંકેત પણ આપ્યો હતો. આ દરમિયાન PM મેલોનીએ કહ્યું કે, ઇટાલિયન કંપનીઓ અમેરિકામાં 10 અબજ યુરોનું રોકાણ કરશે અને ઇટાલી અમેરિકાથી ઊર્જા આયાત વધારશે.

અહીં તમને જણાવી દઈએ કે, PM મેલોની એકમાત્ર યુરોપિયન નેતા હતા જેમને 20 જાન્યુઆરીએ ટ્રમ્પના શપથ ગ્રહણ સમારોહમાં હાજરી આપવા માટે આમંત્રણ આપવામાં આવ્યું હતું. PM મેલોની અને ટ્રમ્પ ઘણા મુદ્દાઓ પર સમાન વિચારો ધરાવે છે. ઇમિગ્રેશનથી લઈને દાણચોરી સુધીના મુદ્દાઓનો સામનો કરવાની વાત આવે ત્યારે બંને એકસરખું વિચારે છે.