ભારતીય પાસપોર્ટની સ્થિતિમાં સુધારો, હવે 56 દેશોમાં મળશે વીઝા વગર એન્ટ્રી

જો તમે વિદેશ પ્રવાસના શોખીન છો, તો તમારા માટે એક શાનદાર સમાચાર છે. વૈશ્વિક સ્તરે ભારતીય પાસપોર્ટની શક્તિમાં મોટો વધારો થયો છે. 'હેનલી પાસપોર્ટ ઇન્ડેક્સ 2026'ના તાજેતરના રિપોર્ટ અનુસાર, ભારતીય પાસપોર્ટે ગ્લોબલ રેન્કિંગમાં લાંબી છલાંગ લગાવી છે. ભારત હવે 10 સ્થાન ઉપર ચઢીને 75મા ક્રમે પહોંચી ગયું છે.

આ સુધારાનો સીધો અર્થ એ છે કે ભારતીયો માટે હવે વિશ્વની મુસાફરી કરવી પહેલા કરતા ઘણી સરળ બનશે. હવે તમારે અનેક દેશોની યાત્રા માટે અઠવાડિયા પહેલા વીઝા મેળવવાની માથાકૂટમાં પડવું નહીં પડે.

56 દેશોમાં વીઝા ફ્રી મુસાફરી

ભારતીય મુસાફરો હવે વિશ્વના 56 દેશોમાં કોઈ પણ અડચણ વગર મુસાફરી કરી શકશે. આ દેશોમાં કાં તો ભારતીયોને વીઝાની જરૂર નહીં પડે, અથવા ત્યાં પહોંચતાની સાથે જ 'વીઝા-ઓન-અરાઇવલ' કે 'ઈ-વીઝા'ની સુવિધા મળી જશે. પછી ભલે તમારે કેરેબિયન ટાપુઓના દરિયાકિનારે આરામ કરવો હોય કે આફ્રિકા અને એશિયાના સુંદર દેશોની સફર કરવી હોય, તમારો ભારતીય પાસપોર્ટ હવે સફરને વધુ આસાન બનાવશે.

શું છે હેનલી પાસપોર્ટ ઇન્ડેક્સ?

વિશ્વભરમાં 'હેનલી પાસપોર્ટ ઇન્ડેક્સ'ને પાસપોર્ટની તાકાત માપવા માટેનું સૌથી વિશ્વસનીય માધ્યમ માનવામાં આવે છે. આ ઇન્ડેક્સ ઇન્ટરનેશનલ એર ટ્રાન્સપોર્ટ એસોસિએશન (IATA) ના ડેટાનો ઉપયોગ કરીને તૈયાર કરવામાં આવે છે. જે દેશનું રેન્કિંગ જેટલું સારું, તેના નાગરિકોને બીજા દેશોમાં એટલી જ વધુ એન્ટ્રીની સ્વતંત્રતા મળે છે.

વિશ્વના સૌથી પાવરફુલ પાસપોર્ટ: કોણ છે નંબર-1?

ભારતે નોંધપાત્ર પ્રગતિ કરી હોવા છતાં, વૈશ્વિક સ્તરે કેટલાક દેશો હજુ પણ ટોચ પર છે:

આ યાદીમાં ન્યુઝીલેન્ડ, ઓસ્ટ્રેલિયા, કેનેડા અને અમેરિકા જેવા દેશો 6 થી 10માં ક્રમ વચ્ચે છે. અમેરિકન પાસપોર્ટ ધરાવતા નાગરિકો 179 દેશોમાં વીઝા વગર જઈ શકે છે.

ભારત માટે સકારાત્મક સંકેત

છેલ્લા એક દાયકામાં ભારતીય પાસપોર્ટના રેન્કિંગમાં ઘણા ઉતાર-ચઢાવ આવ્યા છે. ગયા વર્ષે ભારત 85મા સ્થાને હતું, પરંતુ 2026ની શરૂઆતમાં 10 ક્રમનો ઉછાળો એ ખૂબ જ સકારાત્મક સંકેત છે. જોકે, 2006માં ભારત 71મા ક્રમે હતું, જે અત્યાર સુધીનું શ્રેષ્ઠ રેન્કિંગ છે, પરંતુ વર્તમાન સુધારો દર્શાવે છે કે વિશ્વ હવે ભારતીય નાગરિકોનું સ્વાગત કરવા માટે વધુ ઉત્સુક છે.