PM મોદીની અપીલ બાદ IT કર્મચારી યુનિયને કરી ફરજિયાત ‘વર્ક-ફ્રોમ-હોમ’ની માંગ

વડાપ્રધાન નરેન્દ્ર મોદી દ્વારા બિનજરૂરી મુસાફરી ઘટાડવા અને સંસાધનોના બચાવ માટે કરવામાં આવેલી અપીલ બાદ, હવે IT ક્ષેત્રમાં ફરીથી 'વર્ક-ફ્રોમ-હોમ' (WFH) ના અમલ માટેની હલચલ તેજ થઈ છે. આઈટી કર્મચારીઓના સંગઠન નેસેન્ટ ઇન્ફોર્મેશન ટેક્નોલોજી એમ્પ્લોયીઝ સેનેટ (NITES) એ કેન્દ્રીય શ્રમ અને રોજગાર મંત્રાલયને પત્ર લખીને IT અને ITES ક્ષેત્ર માટે આ અંગે એડવાઈઝરી જાહેર કરવા વિનંતી કરી છે.

11 મેના રોજ શ્રમ મંત્રી મનસુખ માંડવિયાને લખેલા પત્રમાં NITES એ જણાવ્યું હતું કે, વડાપ્રધાન નરેન્દ્ર મોદીએ તાજેતરમાં નાગરિકો અને સંસ્થાઓને વૈશ્વિક ભૌગોલિક-રાજકીય અને આર્થિક પડકારો વચ્ચે મુસાફરી ઘટાડવા અને વર્ચ્યુઅલ મીટિંગ્સ અપનાવવા આહવાન કર્યું છે.

સંગઠને પત્રમાં ભારપૂર્વક જણાવ્યું છે કે વડાપ્રધાનનું નિવેદન માત્ર સંચાલન સૂચન નહોતું, પરંતુ રાષ્ટ્રીય હિતમાં સામૂહિક જવાબદારીનું આહવાન હતું. બળતણ (Fuel) પરની નિર્ભરતા ઘટાડવી અને ટ્રાફિકનું ભારણ ઓછું કરવું એ આજના સમયમાં દેશહિતમાં મોટું યોગદાન છે.

NITES એ દલીલ કરી છે કે IT ક્ષેત્ર પાસે મોટા પાયે રિમોટ વર્ક (દૂરથી કામ) અમલમાં મૂકવાની ક્ષમતા છે, જે કોવિડ-19 મહામારી દરમિયાન સાબિત થઈ ચૂકી છે.

સફળ મોડલ: મહામારી દરમિયાન ભારતીય IT ઉદ્યોગે ટૂંકા ગાળામાં જ ઓપરેશનલ સ્થિરતા સાથે વૈશ્વિક પ્રોજેક્ટ્સ સફળતાપૂર્વક પૂર્ણ કર્યા હતા.

ઉત્પાદકતા: વર્ક-ફ્રોમ-હોમ છતાં ભારતીય અર્થતંત્રમાં IT ક્ષેત્રે મહત્વનું યોગદાન આપ્યું હતું.

યુનિયને દાવો કર્યો છે કે ડિજિટલ વિકલ્પો ઉપલબ્ધ હોવા છતાં લાખો કર્મચારીઓને દરરોજ ઓફિસ આવવા માટે મજબૂર કરવાથી બળતણના વપરાશ અને જાહેર ઈન્ફ્રાસ્ટ્રક્ચર પર બિનજરૂરી દબાણ આવે છે.

મુસાફરીનો સમય: મેટ્રો સિટીના કર્મચારીઓ દરરોજ કલાકો મુસાફરીમાં વિતાવે છે, જે કામ તેઓ ઘરે બેઠા સરળતાથી કરી શકે છે.

સ્વાસ્થ્ય: લાંબી મુસાફરી કર્મચારીઓના શારીરિક અને માનસિક સ્વાસ્થ્ય પર નકારાત્મક અસર કરે છે.

પર્યાવરણ: બિનજરૂરી વાહનોના ઉપયોગથી પર્યાવરણીય બોજ વધે છે.

સંગઠને શ્રમ મંત્રાલયને વિનંતી કરી છે કે જ્યાં ઓપરેશનલી શક્ય હોય ત્યાં અમુક ચોક્કસ સમયગાળા માટે IT અને ડિજિટલ સેવા ક્ષેત્રોમાં ફરજિયાત વર્ક-ફ્રોમ-હોમ લાગુ કરવામાં આવે.

NITES ના પ્રમુખ હરપ્રીત સિંહ સલુજાએ સ્પષ્ટ કર્યું હતું કે, આ માંગ માલિકો સાથે સંઘર્ષ કરવા માટે નથી, પરંતુ રાષ્ટ્રીય સહયોગને પ્રોત્સાહન આપવા માટે છે. તેમણે ઉમેર્યું કે જે ક્ષમતાનો ઉપયોગ મહામારીમાં થયો હતો, તેનો ઉપયોગ અત્યારે રાષ્ટ્રીય પ્રાથમિકતાઓ અને જાહેર હિતમાં થવો જોઈએ.