ઇથેનોલનો ઉપયોગ હવે ફક્ત વાહનોમાં જ નહીં, પણ રસોઈ કરવા માટે પણ થઈ શકે છે. ઉદ્યોગ નિષ્ણાતોના મતે, પેટ્રોલિયમ અને કુદરતી ગેસ મંત્રાલય ઇથેનોલને પ્રાથમિક રસોઈ બળતણ તરીકે અપનાવવા માટે એક નીતિગત માળખું વિકસાવી રહ્યું છે. આ માહિતી એક અંગ્રેજી અખબારના અહેવાલમાં આપવામાં આવી છે. અહેવાલ મુજબ, આ નીતિ ઇથેનોલના ઉપયોગને પ્રોત્સાહન આપવા, સબસિડી આપવા અને સપ્લાય ચેઇનને મજબૂત બનાવવાના માર્ગો પર વિચાર કરશે.
એક અધિકારીએ મીડિયા સૂત્રોને જણાવ્યું હતું કે, 'ક્લીન કુકિંગ પોલિસી' ચાલી રહી છે. આનાથી LPGની સાથે સાથે ઇથેનોલનો ઉપયોગ પણ ઘરેલુ રસોઈ બળતણ તરીકે થઈ શકશે. નવી નીતિ સપ્ટેમ્બર સુધીમાં તૈયાર થઈ શકે છે. એપ્રિલમાં એવો અહેવાલ આવ્યો હતો કે, સરકારની વિનંતી પર સ્વચ્છ ઘરેલુ બળતણના વિકલ્પ તરીકે ઇથેનોલથી ચાલતા રસોઈ બનાવવાના ચૂલાઓનું પરીક્ષણ કરવામાં આવી રહ્યું છે.
ઉદ્યોગ અધિકારીઓએ જણાવ્યું હતું કે, આ યોજનાને અમલમાં મૂકવા માટે, તેલ માર્કેટિંગ કંપનીઓને ઇથેનોલ ATM સ્થાપવા માટે કહી શકાય છે, જેથી લોકો રસોઈ માટે ઇથેનોલનો ઉપયોગ સરળતાથી કરી શકે. આ ATM રાજ્યની માલિકીની તેલ કંપનીઓ દ્વારા સંચાલિત પેટ્રોલ પંપ પર સ્થાપિત કરી શકાય છે.
રસોઈ માટે ઇથેનોલના ઉપયોગને પ્રોત્સાહન આપવાથી ભારતને LPG પરની નિર્ભરતા ઘટાડવામાં મદદ મળશે અને વધતા ઇંધણ બિલ (વિદેશોમાંથી ક્રૂડ ઓઇલ ખરીદવા માટે વપરાતા પૈસા) પર બચત થશે. એક ઉદ્યોગ નિષ્ણાત સૂચવે છે કે, સરકાર ઇથેનોલથી રસોઈને પ્રોત્સાહન આપવા માટે સબસિડી યોજના પણ શરૂ કરી શકે છે.
રસોઈ માટે ઇથેનોલને પ્રોત્સાહન આપવાનો આ પ્રયાસ એવા સમયે કરવામાં આવ્યો છે, જ્યારે ભારતમાં પૂરતો પુરવઠો છે. કેરએજ રેટિંગ્સે મેના અહેવાલમાં જણાવ્યું હતું કે ભારતની ઇથેનોલ ઉત્પાદન ક્ષમતા વાર્ષિક 20 અબજ લિટરને વટાવી ગઈ છે. આ નાણાકીય વર્ષ (2026-27)માં વધુ 4 અબજ લિટરનું ઉત્પાદન થવાની ધારણા છે.
સરકારના E20 મિશ્રણ કાર્યક્રમ માટે વાર્ષિક ઉપયોગમાં લેવાતા આશરે 11 અબજ લિટર ઇથેનોલ પછી, બ્રુઅરીઝ, ફાર્માસ્યુટિકલ કંપનીઓ અને રાસાયણિક કંપનીઓ વધુ 3-3.5 અબજ લિટર ઇથેનોલનો ઉપયોગ કરે છે. આનાથી લગભગ 7 અબજ લિટર ઇથેનોલ બાકી રહે છે. તેથી, ભારત તેના પડોશી દેશો, જેમ કે નેપાળ, બાંગ્લાદેશ અને ઇન્ડોનેશિયામાં ઇથેનોલ નિકાસ કરવાનું પણ વિચારી શકે છે.
12.jpg)
