અમેરિકા અને ઈરાન વચ્ચે તણાવ વધ્યો છે, અને ગલ્ફ રાષ્ટ્રો પણ મધ્ય-પૂર્વના યુદ્વથી સળગી રહ્યા છે. વૈશ્વિક તેલની માંગને પહોંચી વળવા માટે મહત્ત્વપૂર્ણ જળમાર્ગ હોર્મુઝની સામુદ્રધુની યુદ્ધનું મેદાન બની ગયો છે, અને ભારત સહિત વિશ્વભરના બજારોમાં તેના પરિણામો સ્પષ્ટપણે દેખાઈ રહ્યા છે. બીજી તરફ, તેલના ભાવે શેરબજારનો ખેલ બગાડી દીધો છે.
મંગળવારે ટ્રેડિંગ શરૂ થતા જ સેન્સેક્સ અને નિફ્ટી ફરી એકવાર ધડામ થઇ ગયા. BSEનો 30 શેરનો સેન્સેક્સ ખુલતા જ 500 પોઈન્ટથી વધુ ઘટ્યો, જ્યારે NSEનો નિફ્ટી પણ 150થી વધુ પોઈન્ટથી વધુ ઘટ્યો. મંગળવારે ટ્રેડિંગ શરૂ થતા જ સેન્સેક્સ અને નિફ્ટી બંને સૂચકાંકો 'રેડ ઝોન'માં ખુલ્યા. BSE સેન્સેક્સ તેના અગાઉના બંધ 77616 થી નીચે આવીને 77,272 પર ખુલ્યો અને તેમાં ઘટાડાનો વેગ વધુ તીવ્ર બન્યો, જેના કારણે ઇન્ડેક્સ 77,063ના સ્તરની આસપાસ ટ્રેડ કરવા લાગ્યો. NSE નિફ્ટી-50 પણ સેન્સેક્સની જેમ પ્રદર્શન કરતો જોવા મળ્યો. તે સોમવારના બંધ 24,211 થી નીચે ખુલ્યા ત્યારબાદ, તે 24050ના સ્તર પર સરકી ગયો.
વૈશ્વિક બજારોના મિશ્ર સંકેતો વચ્ચે ભારતીય શેરબજારની શરૂઆત ધીમી રહી. શરૂઆતના કારોબારમાં લગભગ 908 કંપનીઓના શેરોમાં વધારો જોવા મળ્યો, જ્યારે 1363 કંપનીઓ લાલ નિશાનમાં ખુલી, જે તેમના અગાઉના બંધની તુલનામાં ઘટાડાને લઇને લાલ નિશાન પર ખુલ્યા. આ ઉપરાંત, 165 શેરોમાં કોઇ બદલાવ ન જોવા મળ્યો.
સૌથી વધુ આ શેરોમાં ઘટાડો જોવા મળ્યો
સપ્તાહના બીજા ટ્રેડિંગ દિવસે બજારમાં થયેલા ઘટાડા વચ્ચે BSE લાર્જ-કેપ કેટેગરીમાં સામેલ ઇન્ડિગો (2.60%), બજાજ ફાઇનાન્સ (2.30%), HCL ટેક (2.15%) અને M&M (2%) કડાકા સાથે કારોબાક કરી રહ્યા હતા. મિડ-કેપ સેગમેન્ટમાં સામેલ અશોક લેયલેન્ડ (3%), TI ઇન્ડિયા (2.40%), મુથૂટ ફાઇનાન્સ (2.30%) અને HP (2%)નો કડાકો જોવા મળ્યો, જ્યારે સ્મોલ-કેપ કેટેગરીમાં PNB હાઉસિંગ (3.50%) અને એપોલો ટાયર્સ (2.80%) પણ કડાકો જોવા મળ્યો હતો.
