સ્થાનિક સ્વરાજની ચૂંટણીને લઈને આગામી 26 એપ્રિલે મતદાન થશે. ત્રણેય મુખ્ય પક્ષના ઉમેદવારોએ ઉમેદવારી કરી દીધી છે. ફોર્મ ભરાઈ ચૂક્યા છે અને ચકાસણીની તારીખ પણ પૂર્ણ થઈ ચૂકી છે. આવતીકાલે ફોર્મ પરત ખેંચવાની છેલ્લી તારીખ છે. ખેડૂત નેતા સુરેન્દ્રનગર વિસ્તારમાં ખેડૂત નેતા તરીકે જાણીતા રાજૂ કરપડા 9 એપ્રિલે ભાજપમાં જોડાયા હતા. આ સાથે જ તેમને સુરેન્દ્રનગર જિલ્લા પંચાયતની મૂળી-2 સીટ પરથી ટિકિટ આપવામાં આવી છે. ત્યારબાદ 11 એપ્રિલે તેમણે ઉમેદવારી નોંધાવી દીધી હતી. આ સમયે તેમણે રજૂ કરેલા સોગંદનામામાં તેમની સંપત્તિની વિગત સામે આવી છે.
રાજૂ કરપડા મૂળ સુરેન્દ્રનગર જિલ્લાના મૂળી તાલુકાના દૂધઈ ગામના વતની છે. રાજૂ કરપડા 2022 ગુજરાત વિધાનસભા ચૂંટણીમાં ચોટીલા બેઠક પરથી આમ આદમી પાર્ટી તરફથી ચૂંટણી લડ્યા હતા, જેમાં તેમનો પરાજય થયો હતો. પાક વીમાની એક કંપની સામે ખેડૂત તરીકે છેતરપિંડી થયાની પોલીસ ફરિયાદ દાખલ કરાવીને રાજૂ કરપડા સૌપ્રથમ લાઇમલાઇટમાં આવ્યા હતા.
2018 બાદ રાજૂ કરપડા ખેડૂત આગેવાન સાગર રબારીની સંસ્થામાં જોડાયા હતા. તેમની સુરેન્દ્રનગર જિલ્લાના પ્રમુખ તરીકે નિમણૂક થઈ અને તેમણે ખેડૂતોના પ્રશ્નોને લઈને લડત સુરેન્દ્રનગરના મૂળી તાલુકાથી શરૂ કરી હતી. તેમણે શરૂઆતમાં જમીન માપણીના પ્રશ્નોના મુદ્દે આંદોલનો કર્યાં હતા. તે ઉપરાંત પાક વીમા યોજનાના પ્રશ્નોને લઈને પણ તેમણે આંદોલનો કર્યાં, જે સુરેન્દ્રનગર જિલ્લા પૂરતા જ હતા.
દિવ્યભાસ્કરના અહેવાલ મુજબ, માત્ર સાડા ત્રણ વર્ષના સમય ગાળામાં રાજૂ કરપડાની સંપત્તિમાં આશ્ચર્યજનક વધારો મળ્યો છે. વર્ષ 2022ની વિધાનસભા ચૂંટણી સમયે રજૂ કરેલા સોગંદનામા મુજબ તેમની કુલ સંપત્તિ લગભગ 61 લાખ હતી, જે વર્ષ 2026માં વધીને 3.12 કરોડે પહોંચી ગઈ છે. આમ તેમની સંપત્તિમાં 5 ગણો વધારો થયો છે. તેમની પાસે રહેલી 55 વીઘા જમીનમાંથી અંદાજે 40 વીઘાનો વધારો થયો છે. જે તેમણે માત્ર વર્ષ 2023ના પ્રથમ પાંચ મહિનામાં જ ખરીદવામાં આવી હોવાનો ખુલાસો થયો છે.
આ ઉપરાંત, દંપતી પાસેના સોના-ચાંદીના દાગીનાની કિંમત 12.50 લાખ રૂપિયાથી વધીને 69 લાખ રૂપિયા સુધી પહોંચી છે, જેમાં તેમની પત્ની પાસે 60 લાખ રૂપિયાની કિંમતનું 400 ગ્રામ સોનું હોવાનો ઉલ્લેખ છે. 2022માં તેમના પરિવારમાં 25 તોલા સોનું હતું, જે હવે 46 તોલા સોનું થઈ ગયું છે આ ઉપરાંત વાહનોમાં પણ વધારો થયો છે, જેમાં હવે ઇનોવા ક્રિસ્ટા અને મારુતિ અર્ટિગા સહિત કુલ 5 વાહનોનો સમાવેશ થાય છે, જેની અંદાજિત કિંમત 28.50 લાખ રૂપિયા છે.
સોગંદનામા મુજબ સંપત્તિની સાથે-સાથે રાજૂ કરપડા પરના દેવામાં પણ વધારો થયો છે. 2022માં વિવિધ બેંક લોન પેટે 24.97 લાખ રૂપિયાનું દેવું હતું, જે 2026માં વધીને 48.59 લાખ રૂપિયા પર પહોંચ્યું છે. આ ઉપરાંત, કાયદાકીય મોરચે પણ તેમની મુશ્કેલીઓ વધી હોય તેમ લાગે છે; 2022માં તેમની વિરુદ્ધ નોંધાયેલા કોર્ટ કેસોની સંખ્યા 3 હતી, જે હવે વધીને 6 થઈ ગઈ છે.
માત્ર 4 વર્ષના ટૂંકા ગાળામાં રોકડ રકમમાં ઘટાડો (1.54 લાખ રૂપિયાથી ઘટીને 62,170 રૂપિયા) થયો હોવા છતા, સ્થાવર મિલકતો અને સોનામાં થયેલો આકસ્મિક અને જંગી વધારો લોકોમાં અનેક સવાલો ઉભા કરી રહ્યો છે. ખાસ કરીને જમીન ખરીદીના સોદાઓ અને આવકના સ્ત્રોતને લઈને રાજકીય વિશ્લેષકોમાં અનેક ચર્ચાઓ છે. આ આંકડાઓ આગામી ચૂંટણીમાં તેમના માટે કેવો માહોલ તૈયાર કરશે તે જોવું રહ્યું.
2021-22માં રાજૂ કરપડા આમ આદમી પાર્ટી (AAP)માં જોડાયા હતા. 2022માં તેમને આમ આદમી પાર્ટીએ ચોટીલા વિધાનસભાની ટિકિટ આપી હતી અને તેઓ 45937 મત મેળવીને બીજા સ્થાને રહ્યા હતા. 11 ફેબ્રુઆરી, 2026ના રોજ તેમણે રાજીનામું આપીને સૌને ચોંકાવી દીધા હતા.
32.jpg)
11.jpg)
