ગુજરાતના શૈક્ષણિક ક્ષેત્રમાં એક મહત્વપૂર્ણ ફેરફાર લાગુ થયો છે. રાજ્યના શાળાઓમાં કામ કરતા શિક્ષકો હવે ખાનગી ટ્યુશન આપી શકશે નહીં. શિક્ષણ મંત્રી કુબેર ડિંડોરે આ અંગે સ્પષ્ટ નિવેદન આપીને કહ્યું કે, "શાળાના શિક્ષકો માટે ખાનગી ટ્યુશન પર કડક પ્રતિબંધ છે અને આ નિયમ ભંગનાર સામે તાત્કાલિક કડક પગલાં લેવામાં આવશે."
આ નિર્ણય પાછળ વાલીઓ અને વાલી મંડળોની અનેક રજૂઆતોને આધારભૂત બનાવવામાં આવી છે. તેમના અનુસાર, "કેટલાક શિક્ષકો શાળામાં પૂરતું શિક્ષણ આપતાં નથી અને વિદ્યાર્થીઓને ખાનગી ટ્યુશન માટે દબાણ કરે છે," જેથી શિક્ષણની ગુણવત્તા અને પ્રામાણિકતા પર સવાલ ઊભા થાય છે.
શિક્ષણ મંત્રીએ ઉમેર્યું કે રાજ્ય સરકાર શાળાઓમાં ઉચ્ચ સ્તરનું શિક્ષણ સુનિશ્ચિત કરવા માટે પ્રતિબદ્ધ છે અને શૈક્ષણિક વ્યવસ્થામાં શિસ્ત અને નૈતિકતા જાળવી રાખવા આ પગલું આવશ્યક બન્યું છે.
નિયમ અને કાર્યવાહી:
ગુજરાત શિક્ષણ વિભાગના નિયમો મુજબ સરકારી અને ગ્રાન્ટેડ શાળાના શિક્ષકો ખાનગી ટ્યુશન આપી શકતા નથી. જો તેઓ આ નિયમનો ઉલ્લંઘન કરે છે, તો વહીવટી તંત્ર તેમની સામે કાનૂની પગલાં લઈ શકે છે. અગાઉ આ પ્રકારના કેટલાક કેસ નોંધાયા છે, પણ હવે સરકાર વધુ સખત વલણ અપનાવશે.
શિક્ષણ મંત્રીએ દરેક જિલ્લા શિક્ષણાધિકારીઓને આ અંગે નજર રાખવા અને જરૂરી કાર્યવાહી કરવા સૂચના આપી છે. શિક્ષણ મંત્રીએ જણાવ્યું કે "અમે શિક્ષણ વ્યવસ્થામાં સત્વર સુધારા લાવવાનો પ્રયાસ કરીએ છીએ, જેથી વિદ્યાર્થીને યોગ્ય માર્ગદર્શન મળે અને શિક્ષકોની જવાબદારી નક્કર બને".
27.jpg)
