સુરતમાં ઠગાઈની એક ચોંકાવનારી અને નવી મોડસ ઓપરેન્ડીનો પર્દાફાશ થયો છે, જેમાં આ ટોળકી અસલી નોટોના 2-3 ગણા કરી આપવાની લાલચ પણ આપતી હતી. ત્યારબાદ આ ઠગ ટોળકી અસલી રૂપિયાના બદલે કાગળની થપ્પીઓ પધરાવી દેતી હતી અને લોકો પાસે રહેલી પોલીસ તપાસમાં આરોપીઓ પાસેથી 1 કરોડની કિંમતની નકલી નોટો (કાગળની થપ્પીઓ) જપ્ત કરવામાં આવી છે.
આ ઉપરાંત, આરોપીઓ પાસેથી પોટેશિયમ પરમેંગેનેટનું સોલ્યુશન અને અન્ય કેમિકલ્સ પણ મળી આવ્યા છે, જેનો ઉપયોગ તેઓ છેતરપિંડીની પ્રક્રિયામાં કરતા હોવાનું મનાય છે. આ ટોળકીએ અગાઉ મહારાષ્ટ્રના ઔરંગાબાદમાં 7 લાખની તેમજ અન્ય સ્થળોએ પણ ચીટિંગ કરી હોવાનું સામે આવ્યું છે.
દિવ્યભાસ્કરના અહેવાલ મુજબ, પાસોદરા વિસ્તારમાં રહેતા અને જમીન દલાલી કરતા રતીલાલ નાથાણીને તેમના મિત્ર મારફતે સંજય દતા અને મુન્નાસિંહ નામના શખ્સોનો સંપર્ક થયો હતો. આ શખ્સોએ પોતાની પાસે સસ્તું સોનું હોવાનું જણાવી રતીલાલને વિશ્વાસમાં લીધો હતો. સોનું છોડાવવાના બહાને આરોપીઓએ સુરત રેલવે સ્ટેશન પાસે ફરિયાદી પાસેથી 3 લાખ રૂપિયા પડાવી લીધા હતા.
પૈસા પડાવ્યા બાદ આરોપીઓએ વધુ 5 લાખ રૂપિયાની માંગણી કરી હતી અને રકમ ત્રણ ગણી કરી આપવાની લાલચ આપી હતી. વિશ્વાસ જીતવા માટે આરોપીઓએ ડાયમંડ નગર ખાડી પાસે એક રીક્ષામાં રતીલાલને અસલી નોટ પર કેમિકલ નાખી, કોરા કાગળ વચ્ચે મૂકી રોલ ફેરવીને નકલી નોટ જેવી જ નોટ તૈયાર કરવાનો ડેમો બતાવ્યો હતો.
આરોપીઓએ ડાયમંડ નગરમાં એક મકાનના ત્રીજા માળે ખાલી હોલમાં નોટો છાપવા માટે ફરિયાદીને બોલાવ્યો હતો. જોકે, આ કામ ગેરકાયદેસર હોવાનું સમજાતા રતીલાલે તાત્કાલિક પોલીસનો સંપર્ક કર્યો હતો. લસકાણા પોલીસે સ્થળ પર દરોડો પાડી સંજય પંચકરી દતા (રહે. સલાબતપુરા, મૂળ પશ્ચિમ બંગાળ), મુન્નાસિંહ મહીપાલસિંહ રાજપુત (રહે. પાંડેસરા, મૂળ ઉત્તર પ્રદેશ), સુરેશ ગંગાઘર મુસારે (રહે. અહમદનગર, મહારાષ્ટ્ર)ની ધરપકડ કરી હતી.
આરોપીઓ પાસેથી નોટની સાઈઝના સફેદ કોરા કાગળના બંડલો, પ્રવાહી કેમિકલ ભરેલા કેરબા અને બોટલો, પ્લાસ્ટિકના ટબ, ચપ્પુ, ટેપપટ્ટી અને હાથના ગ્લોઝ, સંજય દતાની પાસેથી રૂ. 500ના દરની શંકાસ્પદ નોટો મળી આવી હતી.
પોલીસ પૂછપરછમાં આરોપીઓની ખતરનાક મોડસ ઓપરેન્ડીનો ખુલાસો થયો છે. તેઓ લોકોને નોટ ડબલ કે ત્રણ ગણી કરી આપવાની લાલચ આપતા હતા. પોટેશિયમ પરમેંગેનેટના સોલ્યુશનથી તેઓ નોટને કાળી કરી દેતા હતા. કેમિકલવાળી કાળી નોટ સાફ કરીને અસલી નોટમાં બદલી નાખવાની ‘હાથની સફાઈ’ બતાવી તેઓ લોકોને વિશ્વાસમાં લેતા કે કાગળમાંથી નોટ બની જશે. આરોપીઓ પાસેથી 1 કરોડના મૂલ્યના (500ની નોટના માપના) કોરા કાગળ અને કેમિકલની બોટલો મળી આવી છે.
ઝડપાયેલા આરોપીઓ રીઢા ગુનેગાર હોવાનું બહાર આવ્યું છે. તપાસમાં જાણવા મળ્યું કે આરોપીઓ મૂળ પશ્ચિમ બંગાળના રહેવાસી છે. તેઓએ અગાઉ ઔરંગાબાદમાં 7 લાખ અને કોલકાતામાં 50 હજારથી 3 લાખ સુધીની અનેક છેતરપિંડી આચરી છે. તેઓ ખાસ સુરતના વેપારીઓને ટાર્ગેટ કરવાના ઈરાદે જ અહીં આવ્યા હતા. આ મુદ્દે લસકાણા પોલીસે ભારતીય ન્યાય સંહિતા (BNS) ની વિવિધ કલમો હેઠળ ગુનો નોંધી વધુ તપાસ હાથ ધરી છે.
PI મીનાબા ઝાલાએ જણાવ્યું હતું કે, ‘ફરિયાદીએ આપેલી માહિતી પ્રમાણે પોલીસે રેડ કરી હતી. જ્યાંથી કાગળ અને ત્યાં અલગ-અલગ પ્રકારનું કેમિકલ તેમજ જે આરોપી સંજય ઉર્ફે બંગાળી છે તેના ખિસ્સામાંથી 500ના દરની ત્રણ ફેક કરન્સી મળી આવી હતી. ત્યાંથી અલગ-અલગ કલરની દેખાઈ આવતા એને ફેક કરન્સી ગણી અને જે કોરા કાગળો મળી આવ્યા હતા કે જેની 500ની નોટના છાપમાં આવે અને છાપવામાં આવે તો 1 કરોડ રૂપિયાની કરન્સી 500ની છપાય તે અને આ કેમિકલ કબજે કરવામાં આવ્યું છે.’
11.jpg)
