25 વર્ષની ઉંમરમાં, 3 ફૂટ ઊંચા અને 20 કિલોગ્રામ વજન ધરાવતા ગણેશ બારૈયાએ એ કરી બતાવ્યું, જેને ઘણા લોકો અશક્ય માનતા હતા. ચિકિત્સાના પોતાના અધિકાર માટે સુપ્રીમ કોર્ટ સુધી લડનારા આ નાના ડૉક્ટરે ગુરુવારે મેડિકલ ઓફિસર તરીકેની તેમની પહેલી પોસ્ટિંગ શરૂ કરી. આ બારૈયા માટે એક નોંધપાત્ર સફરનો અંત છે, જે વામનત્વ સાથે જન્મ્યા હતા, જેના પરિણામે તેમને 72% ચાલવા-ફરવામાં પરેશાની થઈ.
બારૈયા જન્મથી જ વામનત્વના શિકાર છે. તેમની શારીરિક મર્યાદાઓ હોવા છતા તેમણે ધોરણ 12માં 87% માર્ક્સ મેળવ્યા. ત્યારબાદ તેમણે ડૉક્ટર બનવાના સપના તરફ પગલાં ભર્યા. તૈયારી કરી અને NEETની પરીક્ષા પાસ કરી. ગણેશ બારૈયાને NEETમાં 233 ગુણ મળ્યા. તેઓ ખૂબ ખુશ હતા, પરંતુ પછી કંઈક એવું બન્યું, જેનાથી તેમના સપના વિખેરાતા નજરે પડ્યા.
2018માં ગુજરાત સરકારે ગણેશ બારૈયા અને બે અન્ય અપંગ વિદ્યાર્થીઓને MBBS કોર્સમાં પ્રવેશ આપવાનો ઇનકાર કરી દીધો. બારૈયાએ તેનો વિરોધ કર્યો. તેમની શાળાના આચાર્ય દલપત કટારિયા અને ટ્રસ્ટી, રેવતસિંહ સરવૈયાએ તેમની મદદ કરી. તેમણે સખત લડત આપી. આખરે સુપ્રીમ કોર્ટે વિદ્યાર્થીઓની તરફેણમાં ચૂકાદો આપ્યો. શરીરરચના વિજ્ઞાન વિચ્છેદન વર્ગો દરમિયાન, મિત્રો અને પ્રોફેસરો તેમના માટે આગળની હરોળની બેઠકો અનામત કરી દીધી. સર્જરી દરમિયાન સહપાઠીઓ તેમને તેમના ખભા પર લઈ જતા જેથી તેઓ ઓપરેટિંગ ટેબલ ઉપરથી જોઈ શકે.
તેમની પહેલી પ્રાથમિકતા હતી ભાવનગર જિલ્લાના ગોરખી ગામમાં તેમના પરિવાર માટે એક સારું ઘર બનાવવાનું. તેમના માતા-પિતા ખેડૂત છે. ગણેશ બારૈયાના આઠ ભાઈ-બહેન છે- સાત બહેનો અને એક નાનો ભાઈ.
ગણેશ બારૈયાએ કહ્યું કે, ‘મારો પરિવાર હજુ પણ એક કાચા ઘરમાં રહે છે. મારું સૌથી મોટું સપનું તેમના માટે બધી સુવિધાઓ સાથે ઈંટનું ઘર બનાવવાનું છે. બાંધકામ ઘણી વખત અટકી ગયું છે કારણ કે અમારી પાસે ઘણીવાર પૈસા ખતમ થઈ જતા હતા. હવે મારા પગારમાંથી હું આખરે તેને પૂર્ણ કરી શક્યો છું.
બરૈયા કહે છે કે, ‘મારા મિત્રો અને પ્રોફેસરો મને દરેક પગલે મદદ કરતા હતા. તેમણે સુનિશ્ચિત કર્યું કે મારી ઊંચાઈ મને ક્યારેય શીખવાથી ન રોકે. પોતાની કોમળ, બાળક જેવા અવાજ છતા બારૈયા શાંત આત્મવિશ્વાસ સાથે બોલે છે. તેમને દર્દીઓની પહેલી મુલાકાતમાં આશ્ચર્યજનક પ્રતિક્રિયાઓની આદત છે.
તે સ્વીકારે છે કે, ‘શરૂઆતમાં, તેઓ મારા રૂપ-રંગ જોઈને દંગ રહી જાય છે. પરંતુ એકવાર તેઓ સાંભળે છે કે ડૉક્ટર બનવા માટે મારે શું સહન કરવું પડ્યું છે, ત્યારે તેઓ મારા પર પૂરો ભરોસો કરે છે. બારૈયા બાળરોગ, ત્વચા વિજ્ઞાન અથવા રેડિયોલોજીમાં નિષ્ણાત બનવા માગે છે.
