એવું થઇ જ ન શકે કે મહારાષ્ટ્રના રાજકારણને કોઈપણ ઉથલપાથલથી દૂર રાખી શકાય. તાજેતરનો કિસ્સો એ આવ્યો છે કે, સરકારમાં ફરી એકવાર સંઘર્ષની સ્થિતિ જોવા મળી છે. CM દેવેન્દ્ર ફડણવીસ અને DyCM એકનાથ શિંદેના આદેશો એક જ પદ માટે સામસામે આવી ગયા છે. બંને નેતાઓએ બૃહન્મુંબઈ વીજળી પુરવઠા અને પરિવહન બેસ્ટના જનરલ મેનેજર પદ માટે અલગ અલગ અધિકારીઓની નિમણૂક કરી છે. જેના કારણે વહીવટી મૂંઝવણ ઊભી થઈ છે. આ પછી તો આ મામલે ઘર્ષણ થવાનું નક્કી જ હતું.
ખરેખર, DyCM એકનાથ શિંદે શહેરી વિકાસ વિભાગના પ્રભારી છે. આ વિભાગે અશ્વિની જોશીને બેસ્ટના જનરલ મેનેજર તરીકે નિયુક્ત કર્યા. આ પછી તરત જ, CM કાર્યાલયે એક આદેશ બહાર પાડીને આશિષ શર્માને તે જ પદ પર નિયુક્ત કર્યા. હવે આ વિભાગ સાથે સંકળાયેલા અધિકારીઓ સ્તબ્ધ થઈ ગયા. તેઓ સમજી શકતા ન હતા કે શું કરવું.
મીડિયા સૂત્રોના અહેવાલો અનુસાર, આ પદ અગાઉ તાજેતરમાં નિવૃત્ત થયેલા SVR શ્રીનિવાસ સંભાળતા હતા. તેમના સ્થાને નિમણૂકને લઈને આ વિવાદ ઉભો થયો હતો. DyCM શિંદે અને CM દેવેન્દ્ર ફડણવીસ બંનેના આદેશથી એક જ સમયે બે અધિકારીઓની નિમણૂક કરીને વહીવટી મૂંઝવણની સ્થિતિ સર્જાઈ ગઈ છે.
આ ઘટના અંગે વિપક્ષે પણ સરકાર પર નિશાન સાધ્યું છે. NCP શરદ પવારના ધારાસભ્ય રોહિત પવારે સોશિયલ મીડિયા પર કટાક્ષ કર્યો અને કહ્યું કે, મહાયુતિ સરકારનું શ્રેષ્ઠ સંકલન. જ્યારે CM દેવેન્દ્ર ફડણવીસને આ મુદ્દા વિશે પૂછવામાં આવ્યું ત્યારે તેમણે કહ્યું કે, તેમને આ વિશે વધુ ખબર નથી.
શહેરી વિકાસ વિભાગે સ્પષ્ટતા કરી કે, અશ્વિની જોશીને કામદારોના વિરોધને સંભાળવા માટે નિયુક્ત કરવામાં આવ્યા હતા, પરંતુ સામાન્ય વહીવટ વિભાગે આશિષ શર્માને પહેલાથી જ આદેશ આપી દીધો હતો. ફેબ્રુઆરીની શરૂઆતમાં પણ CM દેવેન્દ્ર ફડણવીસે DyCM એકનાથ શિંદેના કેટલાક આદેશોને ઉલટાવી દીધા હતા. જેના કારણે અગાઉ પણ બંને વચ્ચે મતભેદો હોવાની ચર્ચા થઈ ચુકી હતી.
15.jpg)
