એક તરફ ચીન અમેરિકા સાથે વેપાર યુદ્ધ લડવા માટે ઝઝુમી રહ્યું છે અને બીજી તરફ, તે ભારત પ્રત્યે મોટું દિલ બતાવી રહ્યું છે. આ વાત એટલા માટે કહેવામાં આવી રહી છે, કારણ કે ભારતમાં ચીની દૂતાવાસે આ વર્ષે 85 હજારથી વધુ ભારતીયોને વિઝા આપ્યા છે. આ વિઝા 1 જાન્યુઆરીથી 9 એપ્રિલ, 2025ની વચ્ચે આપવામાં આવ્યા છે.
વિઝા મામલે ચીન દ્વારા દર્શાવવામાં આવેલા મોટા દિલને બંને દેશોના લોકો વચ્ચેના સંબંધોને મજબૂત બનાવવાની દિશામાં એક પગલું માનવામાં આવી રહ્યું છે.
બીજી બાજુ, જ્યારે ટ્રમ્પે ચીનથી આયાત થતી વસ્તુઓ પર ટેરિફ વધારીને 145 ટકા કર્યો, ત્યારે ડ્રેગને અમેરિકાથી આવતા માલ પર 125 ટકા ટેરિફ લાદીને પ્રતિક્રિયા આપી.
ભારતમાં ચીનના રાજદૂત શુ ફેઈહોંગે વધુને વધુ ભારતીયોને તેમના દેશની મુલાકાત લેવા અને ત્યાંના વાતાવરણનો અનુભવ કરવા આમંત્રણ આપ્યું છે. ચીન દ્વારા બહાર પાડવામાં આવેલા વિઝામાં નોંધપાત્ર વધારો થયો છે, કારણ કે 2023માં, સમગ્ર વર્ષ દરમિયાન ચીન દ્વારા કુલ 1,80,000 ભારતીયોને વિઝા આપવામાં આવ્યા હતા, પરંતુ આ વખતે ચાર મહિનાથી ઓછા સમયમાં, તે 85 હજારનો આંકડો વટાવી ગયો છે.
ગયા વર્ષે ચીને વિઝા સંબંધિત નિયમોમાં ઘણી છૂટછાટ પણ આપી હતી. ઉદાહરણ તરીકે, ચીનની મુસાફરી કરતા ભારતીયોને હવે વિઝા અરજી સબમિટ કરતા પહેલા ઓનલાઈન એપોઇન્ટમેન્ટ બુક કરવાની જરૂર નથી. તેના બદલે, તેઓ કામકાજના દિવસોમાં સીધા વિઝા સેન્ટર પર તેમની અરજી સબમિટ કરી શકે છે.
આ ઉપરાંત, 180 દિવસથી ઓછા સમય માટે ટૂંકા ગાળાના, સિંગલ અથવા ડબલ એન્ટ્રી વિઝા માટે અરજી કરનારા લોકોને ફિંગરપ્રિન્ટ્સ જેવા બાયોમેટ્રિક ડેટા આપવાથી પણ મુક્તિ આપવામાં આવે છે. આ ઉપરાંત, ચીને વિઝા અરજી માટેની ફી પણ ઘટાડી દીધી છે.
આવી સ્થિતિમાં, મનમાં પ્રશ્ન એ આવે છે કે, શું ચીન ભારત સાથેના પોતાના સંબંધોને વધુ સુધારવા માંગે છે? એમ કહેવું પડે કે, અમેરિકા અને ચીન વચ્ચે ચાલી રહેલ વેપાર યુદ્ધ વધુ તીવ્ર બન્યું છે. ચીને ભારત અને અન્ય દેશોને અમેરિકા દ્વારા લાદવામાં આવી રહેલા મનસ્વી ટેરિફના વિરોધમાં તેની સાથે ઉભા રહેવા વિનંતી કરી છે.
ભારતમાં ચીની દૂતાવાસના પ્રવક્તા યુ જિંગે ગયા અઠવાડિયે કહ્યું હતું કે, ભારત અને ચીને US ટેરિફ કાર્યવાહીનો સામનો કરવા માટે સાથે આવવું જોઈએ.
7.jpg)
