ભારત સરકારે શુક્રવારે એવા અહેવાલોનું ખંડન કર્યું છે કે, ચાઇનીઝ વીડિયો એગ્રીગેટર પ્લેટફોર્મ TikTok પરથી પ્રતિબંધ હટાવવામાં આવ્યો છે. ઇલેક્ટ્રોનિક્સ અને માહિતી ટેક્નોલોજી મંત્રાલયના અધિકારીઓએ સ્પષ્ટતા કરી છે કે, ભારતમાં TikTok માટે કોઈ અનબ્લોકિંગ ઓર્ડર જાહેર કરવામાં આવ્યો નથી. આવા કોઈપણ નિવેદન અથવા સમાચાર ખોટા અને ભ્રામક છે. જોકે, ઈ-કોમર્સ વેબસાઇટ Aliexpress અને ઓનલાઇન કપડાં વેચતી વેબસાઇટ SHEIN અંગે સરકાર તરફથી અત્યાર સુધી કોઈ સ્પષ્ટતા આવી નથી.
જોકે કેટલાક યુઝર્સ TikTokની વેબસાઇટ ઍક્સેસ કરી શકતા હતા, તેઓ લોગ ઇન, અપલોડ કરવા અથવા વીડિયો જોવામાં અસમર્થ હતા. ભારતમાં એપ સ્ટોર પર આ ચાઇનીઝ વીડિયો પ્લેટફોર્મની એપ્લિકેશન પણ ઉપલબ્ધ નથી. ટેલિકોમ્યુનિકેશન વિભાગના અધિકારીઓએ જણાવ્યું હતું કે ઇન્ટરનેટ સેવા પ્રદાતાઓ સતત આ વેબસાઇટને બ્લોક કરી રહ્યા છે. જો કે, તે સ્પષ્ટ નથી કે કેટલાક ઇન્ટરનેટ યુઝર્સ તેને કેવી રીતે ઍક્સેસ કરી શકે છે.
ભારત સરકારે જૂન 2020માં 59 મોબાઇલ એપ્લિકેશનો પર પ્રતિબંધની જાહેરાત કરી હતી, જેમાંથી મોટાભાગની ચાઇનીઝ એપ્લિકેશનો હતી. તેમાં TikTok, UC બ્રાઉઝર અને Wechat જેવી લોકપ્રિય એપ્લિકેશનો પણ શામેલ હતી. સરકારે આ ચાઇનીઝ એપ્લિકેશનોને ભારતની સાર્વભૌમત્વ અને અખંડિતતા, સુરક્ષા અને સાર્વજનિક વ્યવસ્થા માટે જોખમ ગણાવ્યો હતો. ચીન સાથે ભારતના વધતા સીમા તણાવની પૃષ્ઠભૂમિમાં આ પગલું ઉઠાવવામાં આવ્યું હતું.
15-16 જૂન 2020ની રાત્રે પૂર્વી લદ્દાખની ગલવાન ખીણમાં ભારતીય સેનાના જવાનોની ચીની સૈનિકો સાથે હિંસક અથડામણ થઈ હતી. આ ઘટના બાદ ચીન અને ભારત વચ્ચેના સંબંધોમાં ખટાશ આવી ગઈ હતી. ત્યારબાદ કેન્દ્રીય ગૃહ મંત્રાલયે 59 મોબાઇલ એપ્સ પર પ્રતિબંધની જાહેરાત કરી હતી. આ બધી એપ્સ ભારતીય નાગરિકોનો ડેટા લીક કરી રહી હતી. ટેક એક્સપર્ટ્સે કહ્યું હતું કે, આ એપ્સ ભારતીયોના લોકેશન ડેટા લે છે અને ચીનમાં સ્થિત સર્વર પર ફાઇલો ટ્રાન્સફર કરે છે.
15.jpg)
