તમિલનાડુ વિધાનસભા ચૂંટણીમાં કથિત હોર્સ ટ્રેડિંગ અને ભ્રષ્ટાચારના આરોપોની CBI તપાસની માંગ કરતી સુપ્રીમ કોર્ટમાં એક અરજી દાખલ કરવામાં આવી છે. અરજીમાં તપાસ પૂર્ણ ન થાય ત્યાં સુધી રાજ્યમાં રાષ્ટ્રપતિ શાસન લાદવાની માંગ કરવામાં આવી છે. આ અરજી મદુરાઈના રહેવાસી કે.કે. રમેશે દાખલ કરી હતી. તેમણે આરોપ લગાવ્યો છે કે તાજેતરની વિધાનસભા ચૂંટણીઓ પછી TVKએ હોર્સ ટ્રેડિંગ દ્વારા અન્ય ધારાસભ્યોનું સમર્થન ટેકો મેળવ્યું છે. તાજેતરમાં જ, TVK ચીફ સી. જોસેફ વિજય તમિલનાડુના નવા મુખ્યમંત્રી બન્યા છે.
આ જાહેર હિતની અરજી (PIL) ચેન્નાઈ સ્થિત કે.કે. રમેશે દાખલ કરી છે. તેમાં, તેમણે ખાસ કરીને ભાજપ સામે CBI તપાસની માંગ કરી છે. અરજીમાં ભારતીય સંઘ, CBI અને તમિલનાડુ સરકારને પ્રતિવાદી બનાવવામાં આવ્યા છે.
અરજીમાં શું જણાવાયું છે? અરજીમાં કહેવામાં આવ્યું છે કે TVK તમિલનાડુમાં સૌથી મોટી પાર્ટી તરીકે ઉભરી આવી હતી, જોકે તેની પાસે સરકાર બનાવવા માટે જરૂરી બહુમતી નહોતી. તાજેતરની વિધાનસભા ચૂંટણીમાં TVKએ ચોંકાવતા 4 મેના રોજ 108 બેઠકો જીતીને રાજ્યમાં સૌથી મોટી રાજકીય પાર્ટી તરીકે ઉભરી આવી હતી. ત્યારબાદ, કોંગ્રેસ, CPI, CPI(M) અને IUMLએ વિજયની પાર્ટીને ટેકો આપવાની જાહેરાત કરી. આ ઘટનાક્રમ બાદ, વિજયે 10 મેના રોજ પદના શપથ લીધા અને ત્યારબાદ વિધાનસભાના ફ્લોર પર પોતાની બહુમતી સાબિત કરી હતી.
જોકે, બહુમતી સાબિત કરવાની પ્રક્રિયા દરમિયાન વિવાદ ઉભો થયો. વિજયની પાર્ટીએ વિધાનસભામાં બહુમતી સાબિત કરી ત્યારે બધા આશ્ચર્યચકિત થઈ ગયા; AIADMKના 25 ધારાસભ્યોએ TVKને ટેકો આપ્યો, જેનાથી TVKના નેતૃત્વ હેઠળના ગઠબંધનની બેઠકોની સંખ્યા 144 થી વધુ થઈ ગઈ. તામિલનાડુના બે કોંગ્રેસના ધારાસભ્યો ગુરુવારે રાજ્ય મંત્રીમંડળમાં મંત્રી તરીકે શપથ લેવાના છે. કોંગ્રેસના ધારાસભ્યો રાજેશ કુમાર અને પી. વિશ્વનાથન તમિલનાડુ સરકારનો ભાગ બનશે. આ ધારાસભ્યોના સમાવેશ સાથે, કોંગ્રેસ 59 વર્ષ પછી તમિલનાડુ મંત્રીમંડળમાં જોડાઈ રહી છે.
