રાજ્યસભા પેટાચૂંટણીમાં હરદીપ સિંહ પુરીની જીત નક્કી, તેમની સામે જેમણે ફોર્મ ભરેલા તેમના નામાંકન જ રદ્દ કરી દેવાયા, કોંગ્રેસ કોર્ટ જશે

મધ્યપ્રદેશમાંથી રાજ્યસભાની પેટાચૂંટણીમાં કેન્દ્રીય પેટ્રોલિયમ મંત્રી હરદીપ સિંહ પુરીની જીત નિશ્ચિત માનવામાં આવી રહી છે. મંગળવારે, બે અપક્ષ ઉમેદવારોના નામાંકન પત્રો રદ કરવામાં આવ્યા હતા. તેમાં કોંગ્રેસ સમર્થિત ઉમેદવાર રાજકુમાર લોહાનીનો પણ સમાવેશ થાય છે. આ નામાંકનો રદ થવાને કારણે, હવે પુરી સામે ચૂંટણી લડવા માટે કોઈ ઉમેદવાર બાકી રહ્યો નથી.

એક અધિકારીના જણાવ્યા અનુસાર, નામાંકન પત્રોની તપાસ દરમિયાન અપક્ષ ઉમેદવારો કાંતે સયાન્ના અને રાજકુમાર લોહાનીના નામાંકન પત્રો રદ કરવામાં આવ્યા હતા. ચૂંટણી પરિણામની જાહેરાત 5 નવેમ્બરે કરવામાં આવશે, જે નામાંકન પાછું ખેંચવાની અંતિમ તારીખ પણ છે.

નામાંકન પત્રોની તપાસ દરમિયાન, બંને અપક્ષ ઉમેદવારો અને કોંગ્રેસ નેતા હેમંત કટારેએ હરદીપ સિંહ પુરીના નામાંકન સામે વાંધો ઉઠાવ્યો હતો. તેમમો તર્ક હતો કે પુરીના 'ફોર્મ-26'માં આપવામાં આવેલું સોગંદનામું અધૂરું અને અમાન્ય છે. રિટર્નિંગ ઓફિસર ઉમેશ શર્માએ આ આપત્તિઓની તપાસ કરી. તેમણે પોતાના આદેશમાં જણાવ્યું કે પુરીના દસ્તાવેજોમાં કોઈ ખામીઓ મળી નથી અને તેમણે લોક પ્રતિનિધિત્વ અધિનિયમ જેવી કોઈ શરતનું ઉલ્લંઘન કર્યું નથી. ત્યારબાદ, તેમનું નામાંકન માન્ય ગણવામાં આવ્યું.

રિટર્નિંગ ઓફિસરના નિર્ણય બાદ, કોંગ્રેસ નેતા હેમંત કટારે અને ધારાસભ્ય આતિફ અકીલે કોર્ટ જવાની વાત કહી છે. બંનેએ એક નિવેદનમાં કહ્યું કે, આ ભારતીય લોકશાહી પર હુમલો છે. તેમના મતે આટલી મોટી ખામીઓ હોવા છતા નામાંકન રદ ન કરવામાં આવ્યું. ભાજપની કેન્દ્રીય ચૂંટણી સમિતિએ 28 ઓક્ટોબરે મધ્ય પ્રદેશમાં રાજ્યસભાની પેટાચૂંટણી માટે હરદીપ સિંહ પુરીને પોતાના ઉમેદવાર તરીકે જાહેર કર્યા હતા. કેન્દ્રીય મંત્રી એલ. મુરુગનના રાજીનામા બાદ આ બેઠક ખાલી પડી હતી, જેમનો કાર્યકાળ એપ્રિલ 2030 સુધીનો હતો.

મધ્ય પ્રદેશ વિધાનસભામાં કુલ 230 સભ્યો છે. ભાજપ પાસે સ્પષ્ટ બહુમતી છે, જ્યારે કોંગ્રેસ પોતાના દમ પર આ બેઠક જીતવાની સ્થિતિમાં નહોતી. ઉપલબ્ધ ચૂંટણી ગણિત મુજબ, જીતવા માટે 116 મતોની જરૂર હતી. બંને અપક્ષ ઉમેદવારોના નામાંકન રદ થવા અને પુરીનું નામાંકન માન્ય ઠરવાથી તેમની જીત નિશ્ચિત માનવામાં આવે છે. હવે, 5 નવેમ્બરે સત્તાવાર જાહેરાતની રાહ જોવાઈ રહી છે.