ભારતીય ટીમે T20 વર્લ્ડ કપ 2026ની પહેલી મેચ અમેરિકા સામે જીતી હતી. આ મેચમાં ભારતીય બેટિંગે ફેન્સના હૃદયના ધબકારા વધારી દીધા હતા. છગ્ગા-ચોગ્ગાઓનો વરસાદ કરનારા ભારતીય સ્ટાર્સ સંઘર્ષ કરી રહ્યા હતા. આ અંગે, એક પૂર્વ ભારતીય બેટ્સમેને ભારતીય ટીમને ઓવર કોન્ફિડેન્ટ ગણાવી છે. તેમનું કહેવું છે કે ભારતીય ટીમે ખૂબ નિરાશ કર્યા.
પૂર્વ ભારતીય ઓપનર સદાગોપ્પન રમેશે તેની યુટ્યુબ ચેનલ પર આ ઇનિંગને લઈને ખૂલીને વાત કરી. તેમણે કહ્યું કે, ‘ભારતે તેની ક્ષમતા મુજબ બેટિંગ ન કરી. જોકે, બોલરોએ બેટ્સમેનોની ભૂલો સુધારી. તે પૂરી રીતે ઓવર કોન્ફિડેન્ટ હતું, જેના કારણે ભારતની નિરાશાજનક બેટિંગ રહી. ભલે તમે બેટથી સિંહ હોવ, પણ તમે વિરોધી ટીમ પાસેથી માત્ર શરણાગતિ સ્વીકારવાની અપેક્ષા નહીં રાખી શકો. જીતવા માટે તમારે થોડો પ્રયાસ કરવો પડે છે.’
તેમણે પોતાની વાત ચાલુ રાખતા કહ્યું કે, ‘આટલી પ્રચંડ પ્રતિભા હોવા છતા, ભારતે વધુ પડતું કર્યા વિના યોગ્ય પ્રયાસ કરવો જોઈએ. તે જરૂરી છે કે ભારત કોઈપણ ટીમને ઓછી ન આંકે. જો આ વર્લ્ડ કપમાં ભારતથી કોઈ ભૂલ થશે તો આ જ કારણ હશે. પરંતુ એ સારું છે કે તેને પહેલી મેચમાં જ ચેતવણી મળી ગઈ. ભારત હવેથી સાવધ રહેશે, જેમ આપણે બોલિંગમાં પહેલા જ જોઈ લીધું છે.
સૂર્યકુમાર યાદવે પોતાના ઘરેલુ મેદાન, વાનખેડે સ્ટેડિયમમાં દબાણ હેઠળ સાવધાનીપૂર્વક રમ્યો અને અંત સુધી ટકી રહ્યો. તેણે 49 બોલમાં 84 રનની અણનમ ઇનિંગમાં 10 ચોગ્ગા અને 4 છગ્ગા ફટકાર્યા. રમેશે વધુમાં કહ્યું કે, અમેરિકા વિરુદ્ધ મેચમાં માત્ર સૂર્યકુમાર યાદવે જ ભારતને બચાવ્યું હતું. જો તેણે પ્રદર્શન ન કર્યું હોત તો ભારત મેચ હારી ગયું હોત.
તેમણે કહ્યું કે, તાજેતરના T20 મેચમાં ભારતે ઘણી ટીમોને ડરાવી છે. પરંતુ આજે સ્થિતિ પલટી ગઈ, અને તેમણે પરસેવો વહાવવો પડ્યો છે. જો સૂર્યકુમાર યાદવે સારું પ્રદર્શન ન કર્યું હોત તો ભારત હારી ગયું હોત. ભારત 160 સુધી માત્ર ધીમી શરૂઆત અને અંતમાં ઝડપી સ્કોરિંગને કારણે પહોંચી શક્યું. જો અમેરિકાએ સૂર્યાનો તે કેચ પકડી લીધો હોત, તો 160 રન બનાવવા દૂરનું સપનું હતું.
ભારતીય કેપ્ટન સૂર્યકુમાર યાદવે પણ સ્વીકાર્યું કે ટીમને કેટલાક ક્ષેત્રોમાં સુધારો કરવાની જરૂર છે. મોટી મેચો પહેલા ટીમે તેના શ્રેષ્ઠ ફોર્મમાં રહેવાની જરૂર છે. ભારતની આગામી મેચ 12 ફેબ્રુઆરીએ નામિબિયા સામે છે.
14.jpg)
