અમેરિકાના પૂર્વ ડેપ્યુટી આસિસ્ટન્ટ સેક્રેટરી ઓફ ડિફેન્સ માઈકલ મુલરોયે જણાવ્યું છે કે ઈરાનના સર્વોચ્ચ નેતા અલી ખામેનેઈના નિધન પછી પણ ઈરાન અમેરિકાની માંગણીઓ સામે ઝૂકે તેવી શક્યતા ઘણી ઓછી છે. અલ્ જઝીરા સાથેની વાતચીતમાં તેમણે ભારપૂર્વક જણાવ્યું હતું કે વેનેઝુએલા પછી ઈરાનમાં શાસન પરિવર્તનનો અમેરિકાનો આ બીજો પ્રયાસ હોઈ શકે છે, પરંતુ ઈરાનની સ્થિતિ વેનેઝુએલા કરતા સાવ અલગ છે.
સત્તાના અનેક કેન્દ્રો
મુલરોયના મતે, વેનેઝુએલામાં સત્તા મુખ્યત્વે રાષ્ટ્રપતિ નિકોલસ માદુરો અને તેમના નબળા સાથીદારોના હાથમાં હતી. તેની સરખામણીએ ઈરાનમાં સત્તાનું માળખું ઘણું જટિલ છે. ત્યાં માત્ર સર્વોચ્ચ નેતા જ નહીં, પરંતુ ધાર્મિક સંગઠનો (Clerical establishment), નિયમિત સૈન્ય, IRGC (ઈસ્લામિક રિવોલ્યુશનરી ગાર્ડ કોર્પ્સ), ગુપ્તચર સંસ્થાઓ છે. આ તમામ સત્તાના અલગ-અલગ અને મજબૂત કેન્દ્રો છે, જે શાસનને ટકાવી રાખવા સક્ષમ છે.
ઈરાનની સંભવિત પ્રતિક્રિયા અંગે વાત કરતા મુલરોયે ચેતવણી આપી હતી કે ઈરાન શરતો માનવાને બદલે સંઘર્ષને વધુ ઉગ્ર બનાવી શકે છે. તેઓએ જણાવ્યું કે, ઈરાન આ વિવાદને સંપૂર્ણ પ્રાદેશિક યુદ્ધમાં ફેરવી શકે છે, જેનાથી માત્ર અમેરિકાને જ નહીં પરંતુ અખાતી દેશોને પણ મોટું નુકસાન થઈ શકે છે.
ડ્રોન હુમલા સૌથી મોટો પડકાર
વર્તમાન પરિસ્થિતિમાં ઈરાન પાસે ડ્રોન એ સૌથી મોટું હથિયાર છે. દુબઈ અને બહેરીનની ઇમારતો પર થયેલા તાજેતરના હુમલાઓ આનો પુરાવો છે. મુલરોયે ઉમેર્યું કે ઈરાન મોટા પાયે ડ્રોનનું ઉત્પાદન કરી રહ્યું છે અને વર્ષોથી રશિયાને પણ સપ્લાય કરે છે. જોકે આ ડ્રોનને તોડી પાડવા સરળ છે, પરંતુ ઈરાન એકસાથે મોટી સંખ્યામાં ડ્રોન મોકલીને સંરક્ષણ પ્રણાલીને મૂંઝવણમાં મૂકી દે છે.
