ટેક્સાસના રિપબ્લિકન ગવર્નર ગ્રેગ એબોટે H-1B વિઝા કાર્યક્રમ અંગે એક મોટો અને કડક નિર્ણય લીધો છે. તેમણે રાજ્યની તમામ એજન્સીઓ અને સાર્વજનિક યુનિવર્સિટીઓમાં નવી H-1B વિઝા અરજીઓ તાત્કાલિક પ્રભાવથી બંધ કરવાનો આદેશ આપ્યો છે. આ પ્રતિબંધ 31 મે, 2027 સુધી અમલમાં રહેશે.
એબોટે એજન્સીના વડાઓને મોકલેલા પત્રમાં જણાવ્યું હતું કે, ફેડરલ H-1B વિઝા કાર્યક્રમના દુરુપયોગના અહેવાલો સામે આવ્યા છે. એવામાં એ સુનિશ્ચિત કરવું જરૂરી છે કે, અમેરિકન નોકરીઓ અમેરિકન કામદારોને જ મળે. તેમણે જણાવ્યું હતું કે કરદાતાના પૈસાથી ચાલતી નોકરીઓમાં રાજ્ય સરકારે એક ઉદાહરણ સ્થાપિત કરવું જોઈએ.
ટેક્સાસની સાર્વજનિક શાળાઓ, યુનિવર્સિટીઓ અને સંલગ્ન સંસ્થાઓમાં H-1B વિઝાના ઉપયોગની તપાસની તપાસ બાદ આ નિર્ણય લેવામાં આવ્યો છે. H-1B વિઝા કાર્યક્રમ અમેરિકન નોકરીદાતાઓને વિદેશી વ્યાવસાયિકોનેને વિશેષ ભૂમિકા માટે નોકરી પર રાખવાની મંજૂરી આપે છે જેમાં સામાન્ય રીતે ઓછામાં ઓછી સ્નાતકની ડિગ્રીની જરૂર હોય છે.
ટેક્સાસમાં, આ વિઝા સિસ્ટમ યુનિવર્સિટીઓ, મેડિકલ સેંટર્સ અને કેટલાક શાળા જિલ્લાઓ માટે મહત્ત્વપૂર્ણ માનવામાં આવે છે, જ્યાં પ્રોફેસર, સંશોધકો, ડૉક્ટર અને શિક્ષકો જેવા પદો માટે સ્થાનિક પ્રતિભા મળવી મુશ્કેલ છે. દર વર્ષે 65,000 H-1B વિઝા જાહેર કરવામાં આવે છે, જ્યારે ઉચ્ચ ડિગ્રી ધરાવતા લોકો માટે વધારાના 20,000 વિઝા આપવામાં આવે છે.
જોકે, એબોટનું કહેવું છે કે આ કાર્યક્રમનો હેતુ અમેરિકન કાર્યબળને પૂરક બનાવવાનો છે, તેને બદલવાનો નથી. તેમણે આરોપ લગાવ્યો કે ઘણા કિસ્સાઓમાં, નોકરીદાતાઓએ લાયક અમેરિકન કામદારોની ભરતી માટે ઈમાનદાર પ્રયાસ કર્યા નથી, અને કેટલીક જગ્યાઓ પર અમેરિકન કર્મચારીઓને કાઢીને ઓછા વેતન પર H-1B કામદારો રાખવામાં આવ્યા છે.
H-1B વિઝા માટે નવા નિયમો
નવા નિર્દેશ હેઠળ, ગવર્નર દ્વારા નિયુક્ત પ્રમુખોવાળી કોઈપણ રાજ્ય એજન્સી અથવા સાર્વજનિક ઉચ્ચ શિક્ષણ સંસ્થા ટેક્સાસ વર્કફોર્સ કમિશનની લેખિત પરવાનગી વિના નવી H-1B અરજીઓ ફાઇલ કરી નહીં શકે. તમામ સંબંધિત સંસ્થાઓએ માર્ચ 2026 સુધીમાં વિઝા ધારકો, તેમની ભૂમિકાઓ અને સ્થાનિક ભરતી પ્રયાસોની વિગતો આપતો વિગતવાર અહેવાલ પણ રજૂ કરવો પડશે.
7.jpg)
