ડોનાલ્ડ ટ્રમ્પે રાષ્ટ્રપતિ પદ સંભાળ્યા પછી, તેમણે ઘણા દેશોના નાગરિકો માટે USમાં પ્રવેશવા પર પ્રતિબંધો કડક કરવાનું શરૂ કર્યું. તેમણે કેટલાક દેશોના નાગરિકોને યુનાઇટેડ સ્ટેટ્સમાં પ્રવેશવા પર સંપૂર્ણપણે પ્રતિબંધ મૂક્યો અને અન્ય દેશોના નાગરિકો માટે પ્રવેશ નિયમો વધુ કડક કર્યા. રાષ્ટ્રપતિ ટ્રમ્પના પગલાં પર પ્રતિક્રિયાઓ હવે શરૂ થઈ ગઈ છે. બે દેશોએ અમેરિકન નાગરિકોને પ્રવેશવા પર પ્રતિબંધ મૂક્યો છે, જેનાથી પશ્ચિમ આફ્રિકન લશ્કરી સરકારો અને યુનાઇટેડ સ્ટેટ્સ વચ્ચે પહેલાથી જ ઠંડા પડી ગયેલા સંબંધો વધુ તણાવપૂર્ણ બન્યા છે. માલી અને બુર્કિના ફાસો વિશ્વના સૌથી ગરીબ દેશોમાંના એક છે, જેમની માથાદીઠ આવક 1,200 ડૉલરથી ઓછી છે.
બુર્કિના ફાસો અને માલીએ અમેરિકન નાગરિકોને દેશમાં પ્રવેશવા પર પ્રતિબંધ મૂક્યો છે. આ દેશોનું આ પગલું ટ્રમ્પ વહીવટીતંત્ર દ્વારા 39 દેશોના નાગરિકો પર લાદવામાં આવેલા એ જ પ્રકારના મુસાફરી પ્રતિબંધના જવાબમાં છે. ટ્રમ્પે જે દેશો પર પ્રતિબંધ મૂક્યો છે તેમાં એવા દેશોનો સમાવેશ થાય છે જેમના નાગરિકોએ યુનાઇટેડ સ્ટેટ્સ અને કેનેડામાં યોજાનારા ફિફા વર્લ્ડ કપ માટે ક્વોલિફાય કર્યું છે.
બુર્કિના ફાસોના વિદેશ મંત્રી, કારામો જીન-મેરી ટ્રોરે સ્પષ્ટપણે જણાવ્યું છે કે, તેઓ અમેરિકન નાગરિકો પર એ જ પ્રવેશ નિયમો લાગુ કરશે જે યુનાઇટેડ સ્ટેટ્સે તેના નાગરિકો પર લાગુ કર્યા છે. માલીના વિદેશ મંત્રાલયે પણ એક નિવેદન બહાર પાડીને જાહેરાત કરી છે કે, તે અમેરિકન નાગરિકો પર એ જ પ્રવેશ શરતો લાગુ કરશે, જે US વહીવટીતંત્રે માલિયન નાગરિકો પર લાગુ પાડયા છે. આ દેશો પર જુન્ટા શાસન કરે છે અને પ્રાદેશિક જૂથ, પશ્ચિમ આફ્રિકન રાજ્યોના આર્થિક સમુદાયથી અલગ થઈને એક નવું સંગઠન બનાવ્યું છે.
માલીએ પણ સલાહ લીધા વિના અમેરિકાએ આટલો મહત્વપૂર્ણ નિર્ણય લેવા બદલ દુઃખ વ્યક્ત કર્યું છે. અત્રે ઉલ્લેખનીય છે કે, ટ્રમ્પ વહીવટીતંત્રે જે 39 દેશોના નાગરિકોને USમાં પ્રવેશવા પર સંપૂર્ણ અથવા આંશિક પ્રતિબંધ મૂક્યો છે તેમાંથી 25 આફ્રિકન દેશ છે.
જે દેશોના નાગરિકોને US પ્રવેશ પર કડક પ્રતિબંધો અને શરતો લાગુ કરવામાં આવ્યા છે, તેમાં સીરિયા અને પેલેસ્ટાઇનની સાથે સાથે નાઇજર, સીએરા લિયોન અને દક્ષિણ સુદાન જેવા ગરીબ દેશોનો સમાવેશ થાય છે. સેનેગલ અને આઇવરી કોસ્ટના નાગરિકો પર આંશિક પ્રતિબંધો લાદવામાં આવ્યા છે. ટ્રમ્પ વહીવટીતંત્રે જણાવ્યું છે કે, ફૂટબોલ ટુર્નામેન્ટ માટે ખેલાડીઓને પ્રવેશ આપવામાં આવશે, પરંતુ ચાહકો અંગે આવી કોઈ જાહેરાત કરવામાં આવી નથી.
