શુક્રવાર, 19 ડિસેમ્બરના રોજ ઓલા ઇલેક્ટ્રિક મોબિલિટીના શેરમાં ભારે ઉછાળો જોવા મળ્યો. કંપનીના શેર 10%ની અપરની સર્કિટે પહોંચ્યા અને 34.40 રૂપિયા પર ટ્રેડ થયા. કંપનીએ જાહેરાત કરી કે તેના સંસ્થાપક ભાવિશ અગ્રવાલે તેમના અંગત શેરનો એક હિસ્સો વેચીને 260 કરોડ રૂપિયાનું દેવું ચૂકવી દીધું છે. કંપનીએ એમ પણ જણાવ્યું હતું કે અગાઉ ગીરવે મૂકેલા 3.93% શેર હવે પૂરી રીતે રીલિઝ થઈ ચૂક્યા છે. આ પગલાથી ગીરવે મૂકેલા શેર સાથે સંકળાયેલા જોખમો દૂર થઇ ગયા છે, જેનાથી રોકાણકારોને રાહત મળી છે.
કંપની દ્વારા જાહેર કરાયેલા એક નિવેદનમાં જણાવાયું છે કે આ એક વખતની પ્રક્રિયા હતી, જે માત્ર પ્રમોટરના વ્યક્તિગત દેવાને દૂર કરવા માટે હાથ ધરવામાં આવી હતી. તે કંપનીના બિઝનેસ, સંચાલન અથવા ભાવિ રણનીતિ પર કોઈ અસર નહીં પડે. આ ડીલ બાદ પણ, પ્રમોટર ગ્રુપ પાસે ઓલા ઇલેક્ટ્રિકમાં 34.6% હિસ્સો છે. કંપનીએ સ્પષ્ટતા કરી કે આ પગલું પ્રમોટરના હિસ્સામાં ઘટાડો અથવા કંપનીમાંથી બહાર નીકળવાનો સંકેત આપતું નથી, પરંતુ નાણાકીય વ્યવસ્થાપનનો એક હિસ્સો છે.
ઓલા ઇલેક્ટ્રિકનો શેર છેલ્લા કેટલાક દિવસોથી સતત ઘટી રહ્યો હતો. માત્ર ત્રણ સત્રમાં 17% ઘટાડો નોંધાયો. અહી સુધી કે શેર 30.76 રૂપિયાના રેકોર્ડ નીચા સ્તરે પણ પહોંચી ગયા હતા. તાજેતરમાં જ, ભાવિશ અગ્રવાલે સતત 3 દિવસ પોતાના શેર વેંચ્યા, જેની કુલ કિંમત લગભગ 324 કરોડ રૂપિયા હતી. આનાથી બજારમાં ચિંતા વધી કે પ્રમોટર કંપનીથી પોતાને દૂર કરી રહ્યા હશે. જોકે, ગીરવે મૂકેલા શેર રીલિઝ થયાના સમાચાર બાદ પરિસ્થિતિ સામાન્ય થઈ ગઈ.
ઇલેક્ટ્રિક વાહન બજારમાં માંગ ધીમી પડી ગઈ છે અને પ્રતિસ્પર્ધા વધી રહી છે. સોફ્ટબેન્ક અને કેટલાક ઓટોમોટિવ ભાગીદારો જેવા મુખ્ય રોકાણકારોના બહાર નીકળવાથી રોકાણકારોની ચિંતામાં વધુ વધારો થયો છે. એવા માહોલમાં ગીરવે મૂકેલા શેર રીલિઝ થવાથી કંપની પર મોટું દબાણ ઓછું થયું છે. બજાર નિષ્ણાતો તેને ગવર્નેન્સના દૃષ્ટિકોણથી સકારાત્મક સંકેત માની રહ્યા છે.
ઓલા ઇલેક્ટ્રિકે પુનરાવર્તિત કર્યું કે, તેનું ફોકસ ભારતમાં ઇલેક્ટ્રિક મોબિલિટી અને ક્લીન ઊર્જાને આગળ વધારવા પર છે. કંપનીનું કહેવું છે કે, પ્રમોટરનું શેર વેચાણ પૂરી રીતે વ્યક્તિગત સ્તર પર હતું અને કંપનીના સંચાલન અથવા લાંબા ગાળાની યોજનાઓ પર તેની કોઈ અસર નહીં થાય.
5.jpg)
