‘યમરાજ સે અપની યારી હૈ’, સુરતના પોલીસ સ્ટેશનમાં PSIની ખુરશી પર બેસી રીલ બનાવનારનું શું થયું?

અત્યારે યુવાનોને રીલ બનાવવાનો ખૂબ જ શોખ છે. રીલ બનાવવા માટે લોકો પોતાના જીવને પણ જોખમમાં મૂકી દેતા હોય તેવા કિસ્સા તમે સાંભળ્યા જ હશે અને જોયા પણ હશે. કેટલીક વખત લોકોને રીલ બનાવવાનું મોંઘું પડી જાય છે અને તેમને કાયદાકીય દાવપેંચમાં ફસાવું પડે છે. આવું જ કંઈક બન્યું સુરતમાં પણ.

રાંદેર પોલીસ સ્ટેશનમાં કલરકામ કરવા આવેલા કારીગરે પોલીસ સ્ટેશનમાં PSIની ખુરશી પર બેસીને ફોટો પાડીને ઈન્સ્ટાગ્રામ પર ‘યમરાજ સે અપની યારી હૈ’ ગીત સાથેની પોસ્ટ કર્યો હતો. આ પોસ્ટ પર ખૂબ લાઇક્સ અને કોમેન્ટ આવી રહી હતી. આ કારીગર સોશિયલ મીડિયા પર ‘ભોળા રાજભર બાહુબલી’ તરીકે પ્રખ્યાત છે. આ યુવકનું નામ યોગેન્દ્ર રાજ છે અને તે મૂળ ઉત્તર પ્રદેશનો રહેવાસી છે. વીડિયો વાયરલ થયા બાદ પોલીસે યુવકની ધરપકડ કરીને કાયદાનું ભાન કરાવ્યું હતું. યુવકે જ્યાં PSIની ખુરશી પર બેસીને ફોટો પાડીને સોશિયલ મીડિયામાં ધાક જમાવતો હતો, ત્યાં જ પોલીસે કાન પકડીને માફી મગાવ્યો હતો. તેને લઈને સુરત સિટી પોલીસે Before-Afterનો વીડિયો પણ શેર કર્યો છે.

https://www.instagram.com/reel/DObltoJEs6H/?utm_source=ig_web_copy_link&igsh=MXhub3plNzRkeHY1cg==

આરોપી કાન પકડીને હિન્દીમાં કબૂલાત કરે છે કે, 6-7 મહિના અગાઉ રાંદેર પોલીસ મથકમાં રાત્રે કલરકામ માટે આવ્યો હતો, ત્યારે તેનાથી ભૂલ થઈ છે. ભૂલથી ખુરશી પર બેસી ગયો હતો. તેનો વીડિયો વાયરલ થઈ ગયો. તેના માટે માફી માગું છુ, આગળ આવી ભૂલ નહીં થાય. મારી વિરુદ્ધ કોઈ પણ પોલીસ સ્ટેશનમાં અન્ય કેસ નથી.

ઉલ્લેખનીય છે કે, યુવકનો વીડિયો વાયરલ થયા બાદ રાંદેર પોલીસે આ મામલે તપાસ શરૂ કરી હતી. પોલીસ એ પણ તપાસ કરી રહી છે કે આ યુવકનો સમાજવાદી પાર્ટીની રેલીઓ સાથે કોઈ સંબંધ છે કે કેમ, કારણ કે તે આવી રેલીઓમાં પણ જોવા મળ્યો છે. આ ધરપકડ દર્શાવે છે કે સોશિયલ મીડિયાનો દુરુપયોગ અને કાયદાનું ઉલ્લંઘન કરવા બદલ કડક કાર્યવાહી થઈ શકે છે.

યોગેન્દ્ર રાજે થોડા મહિના અગાઉ તેણે રાંદેર પોલીસ સ્ટેશનમાં કલરકામ કર્યું હતું. એ સમયે તેણે પોલીસ સ્ટેશનમાં PSIની ખુરસી પર બેસીને ફોટો પાડ્યો હતો. આ યુવક સોશિયલ મીડિયા પર ખૂબ પ્રખ્યાત છે અને તેના ઈન્સ્ટાગ્રામ પર 16.50 હજારથી વધુ ફોલોઅર્સ છે. PSIની ખુરશી પર બેસીને પાડેલા ફોટોને 1400થી વધુ લાઈક્સ અને 36 કોમેન્ટ્સ મળી હતી, જેમાં તેણે ‘યમરાજ સે અપની યારી હૈ’ ગીત મૂક્યું હતું.

હેરાનીની વાત એ છે કે થોડા દિવસો અગાઉ જ દારૂના નશામાં આ જ યુવકને પકડ્યો હતો અને રાંદેર પોલીસ તેને પોલીસ સ્ટેશને લઈ ગઈ હતી. પોલીસના જણાવ્યા મુજબ એ સમયે તેણે પોતાનું નામ કહેવાનો ઇનકાર કરી દીધો હતો અને પોલીસ સ્ટેશનમાં અપશબ્દોનો ઉપયોગ કર્યો હતો. તેણે એવો દાવો પણ કર્યો હતો કે તેના કલરકામના પૈસા બાકી છે. એ સમયે તેની પોલીસ ચોપડે નોંધ પણ કરવામાં આવી હતી.

દારૂના નશામાં પકડાયા બાદ આ વીડિયો અચાનક જ સોશિયલ મીડિયા પર વાયરલ થયો. જોકે આ વીડિયો 4 ડિસેમ્બર 2024નો હતો, પરંતુ તે હાલમાં જ લોકોનું ધ્યાન ખેંચી રહ્યો છે. પોલીસને એ પણ જાણવા મળ્યું છે કે આ આરોપીએ માત્ર રાંદેર પોલીસ સ્ટેશનમાં જ નહીં, પરંતુ એક રેલવે પોલીસ સ્ટેશનની બહાર પણ ફોટોસેશન કરીને તસવીરો સોશિયલ મીડિયા પર મૂકી હતી.