પોતાના જ ડિપાર્ટમેન્ટ સામે વિરોધ પ્રદર્શન કરનારા દિલ્હીના ACPએ કહ્યું- પોલીસ સ્ટેશનની અંદર સુરક્ષિત નથી, તો પછી બીજાની સુરક્ષા કેવી રીતે કરીશું

કેન્દ્રીય ગૃહ મંત્રાલયે મંગળવારે આસિસ્ટન્ટ કમિશનર (ACP) મનસ્વી વશિષ્ઠને સસ્પેન્ડ કરી દીધા છે. વકીલો સાથેની ઘર્ષણની ઘટના બાદ બે પોલીસ અધિકારીઓની બદલી કરવામાં આવી હતી, જેના વિરોધમાં દિલ્હી પોલીસ હેડક્વાર્ટરની અંદર અને બહાર 10 કલાક લાંબા વિરોધ પ્રદર્શનનું નેતૃત્વ મનસ્વી વશિષ્ઠે કર્યું હતું. મંત્રાલયે સસ્પેન્શન માટે કોઈ ચોક્કસ કારણ દર્શાવ્યું નથી. જોકે, દિલ્હી પોલીસના સૂત્રોના જણાવ્યા અનુસાર આ કાર્યવાહી શિસ્તના ઉલ્લંઘન બદલ કરવામાં આવી છે.

માન સિંહ રોડ પર આવેલા પોલીસ હેડક્વાર્ટર બહાર સોમવારે સવારે પોલીસ વિરુદ્ધ પોલીસનો નાટકીય સંગ્રામ જોવા મળ્યો હતો, જ્યાં વશિષ્ઠના નેતૃત્વમાં લગભગ 100 જેટલા પોલીસકર્મીઓએ પોતાના જ વરિષ્ઠ અધિકારીઓ સામે વિરોધ પ્રદર્શન કર્યું હતું. પોતાના સાથી પ્રદર્શનકારીઓને સંબોધતા વશિષ્ઠે કહ્યું હતું કે, જો આપણે જ પોલીસ સ્ટેશનની અંદર સુરક્ષિત નથી, તો પછી આપણે અન્યોની સુરક્ષા કેવી રીતે સુનિશ્ચિત કરી શકીએ?

વશિષ્ઠના સસ્પેન્શન બાદ રોહિણી કોર્ટ બાર એસોસિએશને મંગળવારે કામકાજના બહિષ્કારનું પોતાનું આહ્વાન પાછું ખેંચી લીધું હતું અને વકીલોને નિયમિત ન્યાયિક ફરજો પર પાછા ફરવા જણાવ્યું હતું. સોમવારના પ્રદર્શન દરમિયાન વશિષ્ઠ દ્વારા વકીલો સામે કરવામાં આવેલી કથિત અપમાનજનક ટિપ્પણીઓના વિરોધમાં એસોસિએશને પોતાના સભ્યોને 3 નવેમ્બરે કામથી દૂર રહેવા માટે આહ્વાન કર્યું હતું.

બીજી તરફ, દિલ્હી હાઈકોર્ટે મંગળવારે વકીલોના એક જૂથની વશિષ્ઠના વર્તન અંગે સુઓ મોટો સંજ્ઞાન લેવાની વિનંતીને ફગાવી દીધી હતી અને તેમને જરૂરી પુરાવાઓ સાથે વિધિવત અરજી દાખલ કરવા જણાવ્યું હતું.

કાર્યકારી ચીફ જસ્ટિસ નિતિન વાસુદેવ સાંભરે અને જસ્ટિસ સંજય શર્માની બેંચે જણાવ્યું હતું કે જ્યારે તેમની સમક્ષ અરજી રજૂ કરવામાં આવશે ત્યારે તેઓ આ મુદ્દાની તપાસ કરશે. બેંચે ટિપ્પણી કરી હતી કે, અમે રેકોર્ડ આધારિત અદાલત છીએ, તેથી અમારી સમક્ષ કંઈક લેખિતમાં હોવું જરૂરી છે. તમારી પાસે જે પણ સામગ્રી કે પુરાવા હોય, તેને અરજી સ્વરૂપે રજિસ્ટ્રીમાં સબમિટ કરો જેથી તેને કોર્ટ સમક્ષ વિચારણા માટે લાવી શકાય.

વકીલોએ બેંચને જણાવ્યું હતું કે પ્રદર્શન દરમિયાન વકીલો સામે AK-47 નો ઉપયોગ અને કાળા કોટવાળા ગુંડા (kale coat ke gunde) જેવી ટિપ્પણીઓ કરવામાં આવી હતી.

બેનરો અને પોસ્ટરો સાથે વશિષ્ઠના નેતૃત્વમાં 100 જેટલા પોલીસકર્મીઓના જૂથે સોમવારે દિલ્હી પોલીસ હેડક્વાર્ટર બહાર વિરોધ પ્રદર્શન કર્યું હતું અને ત્યારબાદ અંદર પ્રવેશ કરીને અભૂતપૂર્વ રીતે ધરણા પર બેસી ગયા હતા. આનાથી ગુસ્સે થયેલા ઉચ્ચ અધિકારીઓએ તેમને આંદોલનકારીઓની જેમ વર્તન ન કરવા ચેતવણી આપી હતી.

પોલીસકર્મીઓ ACP વશિષ્ઠ અને ઇન્સ્પેક્ટર અરૂણ કુમારની બદલીનો વિરોધ કરી રહ્યા હતા. 23 ઓક્ટોબરે ઉત્તર-પૂર્વ જિલ્લાના શહાદરા પોલીસ સ્ટેશને ફરિયાદ નોંધાવવા ગયેલા વકીલોના જૂથે આ બંને અધિકારીઓ પર તેમની સાથે મારપીટ કરવાનો આક્ષેપ કર્યો હતો

વિભાગીય કાર્યવાહીથી નારાજ પ્રદર્શનકારીઓએ બંને અધિકારીઓને પુનઃસ્થાપિત (reinstatement) કરવાની માંગ કરી હતી. લગભગ 10 કલાકના વિરોધ પ્રદર્શન પછી, દિલ્હી પોલીસ કમિશનર અનુરાગ કુમાર અને અન્ય વરિષ્ઠ અધિકારીઓએ પ્રદર્શનકારી પોલીસકર્મીઓના 5 સભ્યોના પ્રતિનિધિમંડળ સાથે મુલાકાત કરી હતી અને તેમની માંગણીઓ સાંભળી હતી.

ઉલ્લેખનીય છે કે, ગયા અઠવાડિયે પોલીસ સ્ટેશનમાં વકીલો સાથે થયેલી ઝપાઝપી બાદ આ બંને અધિકારીઓની બદલીના આદેશ આપવામાં આવ્યા હતા, જેમાં એક વકીલને માથાના ભાગે ઈજા પહોંચી હોવાનો આરોપ હતો. વકીલોએ આક્ષેપ કર્યો હતો કે પોલીસ સ્ટેશનમાં વરિષ્ઠ અધિકારીઓ સાથેની બેઠક દરમિયાન વશિષ્ઠે પોતાની લોડેડ રિવોલ્વર બતાવીને તેમને ધમકી આપી હતી. આ ઘટના બાદ ડિસ્ટ્રિક્ટ કોર્ટના વકીલોએ અનિશ્ચિત મુદતની હડતાળ શરૂ કરી હતી અને આરોપી પોલીસકર્મીઓ સામે કાર્યવાહી કરવાની માંગ કરી હતી.

વકીલોના ભારે દબાણ બાદ, 28 ઓક્ટોબરના રોજ પોલીસના ઉચ્ચ અધિકારીઓએ વશિષ્ઠ અને કુમારની બદલી કરી દીધી હતી.