સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઇઝેશન (CDSCO) દ્વારા જાહેર કરાયેલ ડ્રગ એલર્ટમાં 35 કફ સિરપ સહિત 174 દવાઓ ધોરણો પર ખરી ઉતારી નથી. આરોગ્ય વિભાગે એલર્ટ જાહેર કર્યું છે. ફેઇલ નમૂનાઓમાં સૌથી વધુ 51 હિમાચલ અને 29 ઉત્તરાખંડમાં મળી આવ્યા હતા. 174 દવાઓમાંથી 7 નકલી હોવાનું જાણવા મળ્યું હતું. CDSCOના ડિસેમ્બર ડ્રગ એલર્ટમાં હૃદય, કેન્સર, ડાયાબિટીસ, હાઈ બ્લડ પ્રેશર, અસ્થમા, ચેપ, દુઃખાવો, સોજો, પેટના કૃમિ, એનિમિયા, ખેંચ, એસિડિટી, એલર્જી અને શરદી જેવી બીમારીઓમાં વપરાતી દવાઓનો સમાવેશ થાય છે.
દર મહિને, દેશભરમાં ડ્રગ ટેસ્ટિંગ લેબ્સમાં ઇન્જેક્શન, ગોળીઓ, સિરપ, આઈ ડ્રોપ અને કેપ્સ્યૂલ્સ સહિત દવાઓની ગુણવત્તાનું પરીક્ષણ કરવામાં આવે છે. દર મહિને દેશભરમાં હજારો દવાઓનું પરીક્ષણ કરવામાં આવે છે, અને તેમાંથી કેટલીક નિષ્ફળ જાય છે.
સોલનમાં ફાર્મા કેમિકોમાં કીમોથેરાપી, સર્જરી અથવા ઉલ્ટી રોકવા માટે બનેલી ઈન્જેક્શન ઓડાન્ટ્રોન અને રેનિટાઇડિન HCI (બેચ નં. 110525), પટનાના વેસ્ટર્લિન ડ્રગ્સમાં નિર્મિત શરદી, વહેતું નાક અને એલર્જીના લક્ષણોમાં રાહત આપતી સિરપ હાઇડ્રોક્લોરાઇડ મિલિયટ QR-કોલ્ડ સિરપ (બેચ નં. WDLB012), અને બાળકોમાં શરદી અને ઉધરસની સારવાર માટે પંજાબના એસ્પેન લાઇફસાયન્સમાં બનેલી કોરોન-LA જુનિયર સિરપ (બેચ નં. A20497B)ના નમૂનાઓ ફેઇલ ગયા હોવાનું જાણવા મળ્યું છે.
ગુજરાતમાં રેડનેક્સ ફાર્માસ્યૂટિકલ્સમાં બનેલી મેન્થોલ સિરપ (બેચ નંબર R12GL2426), ઉત્તર પ્રદેશમાં યુનિક્યૂર ઇન્ડિયા દ્વારા ઉત્પાદિત બ્લડ સુગરને નિયંત્રિત કરવા માટે વપરાતી વિલ્ડાગ્લિપ્ટિન અને મેટફોર્મિન ટેબલેટ (બેચ VMHT1315), નાલાગઢમાં થિયોન ફાર્માસ્યૂટિકલ્સ દ્વારા ઉત્પાદિત હૃદયરોગમાં લોહીના ગંઠાવાનું અટકાવતી અને સ્ટ્રોક અને હાર્ટ એટેકનું જોખમ ઘટાડે તેવી દવા ક્લોપિડોગ્રેલ અને એસ્પિરિન ગોળીઓ (બેચ GT250519) સહિત અન્ય ઘણી દવાઓના નમૂનાઓ પણ ફેઇલ થયા છે.
કયા રાજ્યની કેટલી દવાઓ ગઈ ફેઇલ?
હિમાચલ પ્રદેશના બદ્દી, નાલાગઢ, સિરમૌરની ફાર્માસ્યૂટિકલ કંપનીઓ દ્વારા ઉત્પાદિત દવાઓ ગુણવત્તાના ધોરણોને પૂર્ણ કરવામાં નિષ્ફળ ગઈ છે. હિમાચલ પ્રદેશની 51, ઉત્તરાખંડની 29, તમિલનાડુની 18, ગુજરાતની 12, હરિયાણાની 8, પંજાબની 7 અને મહારાષ્ટ્ર, બંગાળ અને રાજસ્થાનની 4-4 દવાઓના નમૂનાઓ ફેઇલ થયા છે. બિહાર, કર્ણાટક, સિક્કિમ, તેલંગાણા અને પુડુચેરીમાંથી 3-3 દવાના નમૂના, દિલ્હી, મધ્ય પ્રદેશ અને ઉત્તર પ્રદેશમાંથી 2-2 અને કેરળ, ઓડિશા, સાઉદી અરેબિયા, આંધ્ર પ્રદેશ, આસામ અને જમ્મુ-કાશ્મીરમાંથી એક-એક દવાના નમૂના નકલી હોવાનું જાણવા મળ્યું છે.
આ 7 દવાઓ નકલી હોવાનું જાણવા મળ્યું
CDSCOએ રિપોર્ટમાં 7 નકલી દવાઓનો ઉલ્લેખ કર્યો છે. જોકે આ દવાઓના રેપર પર કંપનીઓના નામ હતા, પરંતુ કંપનીઓએ એ બેચને નકાર્યા છે અને આ મામલો હવે તપાસ હેઠળ છે. આ દવાઓમાં કાયમોરલ ફોર્ટે (બેચ નં. 2KU6L045), ટેલમા-AM 40mg અને એમલોડિપિન 5 mg (બેચ નં. 18240626), ટેલમા-40 (બેચ નં. 18240413), ટેલમા-AM 40mg અને એમલોડિપિન 5 mg (બેચ નં. 05241038A), મોન્ટિના-L ટેબ્લેટ (બેચ નં. SPJ 241236), પેન્ટાપ-D SR (બેચ નં. SPA250021) અને કાયમોરલ ફોર્ટે (બેચ નં. 2KU6L012)ને નકલી જાહેર કરવામાં આવ્યા છે.
ડૉ. મનીષ કપૂર, (સ્ટેટ ડ્રગ કંટ્રોલર, હિમાચલ) એ જણાવ્યું કે, હિમાચલના ફેઇલ નમૂનાઓને ગંભીરતાથી લેવામાં આવી રહ્યા છે. જે ફાર્મા ઉદ્યોગોની દવાઓમાં ખામી જોવા મળી છે તેમને કારણદર્શક નોટિસ જાહેર કરવામાં આવશે. બધી દવાઓ પાછી ખેંચી મંગાવવામાં આવશે.
9.jpg)
