ખુદને ભગવાનનો અવતાર કહેનારો ઈબોહ નૂહ જેલમાં

આ વખતે મામલો માત્ર અંધશ્રદ્ધાનો નહીં, પરંતુ ડર, છેતરપિંડી અને માનવાધિકારના ગંભીર હનનનો છે. પોતાને ભગવાનનો અવતાર ગણાવતો ઈબોહ નૂહ, જે દુનિયા પર કયામત આવવાની ભવિષ્યવાણી કરીને લોકોને ભયમાં મૂકતો હતો, અંતે પોલીસના હાથે ઝડપાઈ ગયો છે.

ઈબોહ નૂહ લોકોમાં ડર ફેલાવીને પોતાનું સામ્રાજ્ય ઊભું કરતો હતો. તેનું કહેવું હતું કે આકાશમાંથી આગના ગોળા વરસવાના છે, દુનિયા નાશ પામશે અને માત્ર એ જ બચશે, જે તેના ચરણોમાં શરણ લેશે. તે દાવો કરતો હતો કે ઉપરવાળાએ તેને સીધો સંદેશ મોકલ્યો છે અને ધરતીનો અંત નજીક છે.

આ દાવાઓમાં એવો ભ્રમજાળ હતો કે ભણેલા-ગણેલા લોકો પણ તેની વાતોમાં આવી ગયા. તેણે અનુયાયીઓને સમજાવ્યું કે બહારની દુનિયા શૈતાનની છે અને તેનું આશ્રમ જ એકમાત્ર એવી નાવ છે, જે પ્રલયના તોફાનમાં ડૂબશે નહીં.

ત્યાગના નામે લૂંટ

બાબાએ ત્યાગનું ઉપદેશ આપ્યો, પરંતુ પોતાનો નહીં — ભક્તોનો. તેણે લોકોને ડરાવ્યા કે પ્રલય સમયે નોટો કાગળ સમાન બની જશે, મકાન-જમીન બેકાર થશે. એટલા માટે બધું વેચી દો અને તે રકમ ‘ઈશ્વરીય કાર્ય’ માટે તેને સોંપી દો.

ડરના કારણે અનેક લોકોએ પોતાની જીવનભરની કમાણી તેના ચરણોમાં અર્પણ કરી દીધી. કેટલાય લોકોએ નોકરી છોડી, બાળકોને શાળા છોડાવી અને ઘરબાર વેચીને તેની સાથે જંગલ તરફ પ્રસ્થાન કર્યું. તેમને લાગતું હતું કે તેઓ સ્વર્ગની ટિકિટ લઈ રહ્યા છે, જ્યારે હકીકતમાં તેઓ નરક જેવી સ્થિતિમાં ફસાઈ રહ્યા હતા.

જંગલમાં બનાવ્યું ખુલ્લું કારાગૃહ

ઈબોહ નૂહ પોતાના અનુયાયીઓને લઈ એક અજાણ્યા જંગલ વિસ્તારમાં પહોંચ્યો, જેને તેણે ‘પવિત્ર શરણસ્થળ’ નામ આપ્યું. પરંતુ હકીકતમાં તે જગ્યા ખુલ્લી જેલ સમાન હતી. ત્યાં મોબાઈલ પર સંપૂર્ણ પ્રતિબંધ હતો, જેથી બહારની દુનિયાને અંદરની હકીકતની ખબર ન પડે.

ભક્તોને પૂરતો ખોરાક આપવામાં આવતો નહોતો. કહેવામાં આવતું કે ઓછું ખાવાથી આત્મા શુદ્ધ થશે. બીમારીમાં હોસ્પિટલ જવાની મંજૂરી નહોતી; ફૂંકેલું પાણી જ એકમાત્ર ‘દવા’ ગણાતી.

પોલીસની એન્ટ્રી અને ભ્રમનો અંત

બાબાએ જે દિવસે દુનિયા ખતમ થવાની આગાહી કરી હતી, એ દિવસે તો કંઈ બન્યું નહીં, પરંતુ એ જ દિવસે તે પોલીસના રડારમાં આવી ગયો. ગુમ થયેલા લોકોના પરિવારજનોએ ફરિયાદ કરતા પ્રશાસન હરકતમાં આવ્યું.પોલીસ ટીમ જ્યારે જંગલમાં પહોંચી, ત્યારે દ્રશ્ય ચોંકાવનારું હતું. અનેક લોકો નબળા, ડરેલા અને ભૂખ્યા હાલતમાં પડ્યા હતા. તેઓ આકાશ તરફ જોઈ રહ્યા હતા કે ક્યારે કયામત આવશે — પરંતુ વીજળી આકાશમાંથી નહીં, પોલીસ કાર્યવાહી સ્વરૂપે તૂટી પડી.

ધરપકડ થતાં જ ‘દિવ્ય શક્તિઓ’ ગાયબ

જ્યારે પોલીસ ઈબોહ નૂહને પકડવા પહોંચી, ત્યારે ભક્તોને આશા હતી કે બાબા કોઈ ચમત્કાર કરશે. પરંતુ એવું કંઈ થયું નહીં. ધરતી પર પ્રલય લાવવાનો દાવો કરનાર બાબા પોલીસને જોઈને થરથર કંપવા લાગ્યો. કોઈ મંત્ર કામ આવ્યો નહીં, કોઈ શક્તિ દેખાઈ નહીં. પોલીસે તેને ધરપકડ કરી જીપમાં બેસાડી દીધો. જે વ્યક્તિ ગઇકાલ સુધી કહેતો હતો કે મારા સિવાય કોઈ નહીં બચે, આજે એ જ વ્યક્તિ વકીલ પાસે બચાવની ભીખ માંગતો જોવા મળ્યો.

અંધભક્તિની કડવી હકીકત

ઈબોહ નૂહ હવે જેલની સળિયાં પાછળ છે. તેના પર છેતરપિંડી, અપહરણ, માનવાધિકારના હનન સહિત અનેક ગંભીર કલમો લગાવવામાં આવી છે. આ ઘટના એક કડક ચેતવણી છે. દુનિયા ક્યારે ખતમ થશે એ તો સમય નક્કી કરશે, પરંતુ અંધશ્રદ્ધા અને પાખંડના ચક્કરમાં ફસાઈને માણસ પોતાની દુનિયા જરૂર ખતમ કરી બેસે છે.