વૈશાલી જિલ્લાના હાજીપુર સદર હોસ્પિટલના લેબર વોર્ડમાં નવજાત શિશુને બદલવા અને વેચવાનો આરોપ લગાવતા પરિવારજનોએ હોબાળો મચાવ્યો. પરિવારજનોનો આરોપ છે કે ડૉક્ટર અને આરોગ્ય કર્મચારીઓએ તેમને જાણ કરી હતી કે સિઝેરિયન બાદ પુત્રનો જન્મ થયો છે, પરંતુ થોડા સમય બાદ તેમને કપડામાં લપેટેલી પુત્રીને સોંપી દીધી.
પ્રાપ્ત માહિતી અનુસાર, ગોરૌલ પોલીસ સ્ટેશન વિસ્તારના ઇસ્લામપુરના રહેવાસી ધીરજ કુમારની પત્ની 25 વર્ષીય ગુંજન દેવીને બુધવારે સવારે ડિલિવરી માટે સદર હોસ્પિટલમાં દાખલ કરવામાં આવી હતી. લગભગ દોઢ કલાક બાદ મહિલાને ઓપરેશન રૂમમાં લઈ જવામાં આવી. અડધા કલાક બાદ, આરોગ્ય કર્મચારીઓએ પરિવારને જાણ કરી કે તેણે પુત્રને જન્મ આપ્યો છે.
https://twitter.com/ANI/status/2019599326675366064?s=20
પરિવારજનોનો આરોપ છે કે, આરોગ્ય કર્મચારીઓએ તેમને કહ્યું હતું કે બાળકનો જન્મ સિઝેરિયન દ્વારા થયો છે, એટલે તેની નસબંધી કરાવી દો. પરિવારજનોએ સહમતી આપી, અને મહિલાની નસબંધી કરવામાં આવી. આ દરમિયાન પરિવારજનોને નવજાત શિશુ બતાવવામાં આવ્યું નહોતું.
લગભગ એક કલાક બાદ, આરોગ્ય કર્મચારીઓએ નવજાત શિશુને સોંપી દીધું. જ્યારે પરિવારે બાળક જોયું ત્યારે તે એક છોકરી હતી. આ જોઈને પરિવાર ચોંકી ગયો. જ્યારે તેમણે પૂછપરછ કરી, ત્યારે આરોગ્ય કર્મચારીઓએ કહ્યું કે છોકરીનો જ જન્મ થયો છે. ત્યારબાદ, પરિવારજનોએ હોસ્પિટલ પરિસરમાં હોબાળો શરૂ કરી દીધો. પરિવારજનોનો આરોપ છે કે નવજાત શિશુને બદલીને વેચી દેવામાં આવ્યું હતું, અને પછી છોકરી સોંપી દેવામાં આવી. લગભગ ચાર કલાક સુધી હોબાળો ચાલુ રહ્યો, આ દરમિયાન ડૉક્ટર અને નર્સ ઘટનાસ્થળેથી ફરાર થઈ ગયા.
ઘટનાની જાણ શહેર પોલીસ સ્ટેશનમાં કરવામાં આવી. માહિતી મળતા જ શહેર પોલીસ સ્ટેશનના ASI ઉત્તમકુમાર શર્મા સદર હોસ્પિટલ પહોંચ્યા અને પરિવાર સાથે વાત કરીને મામલો થાળે પાડ્યો. આ મામલે પીડિતાની બહેન કુમારી સંજૂ સિંહે શહેર પોલીસ સ્ટેશનમાં લેખિત ફરિયાદ નોંધાવી છે.
અરજીમાં જણાવાયું છે કે ઓપરેશન બાદ, તેમને છોકરો હોવાની વાત કહેવામાં આવી હતી, નસબંધી કરવામાં આવી, અને લાંચ પણ માંગવામાં આવી હતી. ત્યારબાદ, કપડામાં લપેટીને તેને એક છોકરી આપવામાં આવી. પીડિતાના ભાઈ સંજયકુમાર સિંહે પણ આરોપ લગાવ્યો હતો કે નવજાત શિશુ તેમને બતાવવામાં આવ્યું નહોતું અને બાદમાં તેને બદલી નાખવામાં આવ્યું. તેમણે ડૉક્ટર અને આરોગ્ય કર્મચારીઓ સામે કાયદેસરની કાર્યવાહીની માંગ કરી છે.
