બિહારના સુપૌલ જિલ્લામાં પોલીસે એક હત્યા કેસમાં સનસનાટીભર્યો ખુલાસો કર્યો છે જેમાં એક પત્નીએ તેના બાળપણના પ્રેમી સાથે મળીને પોતાના ગલ્લા વ્યવવસાયી પતિનું કાસળ કાઢી નાખવા માટે ખતરનાક કાવતરું ઘડ્યું હતું. પોલીસે પત્ની અને તેના પ્રેમી સહિત 4 આરોપીઓની ધરપકડ કરી છે અને કોન્ટ્રાક્ટ કિલિંગમાં વપરાયેલા હથિયારો અને પૈસા જપ્ત કર્યા છે.
આ ઘટના ત્રિવેણીગંજ પોલીસ સ્ટેશન વિસ્તારના મહેશુઆ વોર્ડ-10માં બની હતી, જ્યાં ગત 26 નવેમ્બરની સાંજે ગુનેગારોએ ગલલના વ્યવસાયી શશિરંજન જાયસ્વાલ પર 4 ગોળીઓ ચલાવી હતી. શરૂઆતમાં પોલીસે તેને એક સામાન્ય ગુનાહિત ઘટના તરીકે ગણી હતી, પરંતુ તપાસમાં કેસની દિશા બદલાઈ ગઈ.
પોલીસ તપાસમાં જાણવા મળ્યું કે શશિરંજનની પત્ની સોની કુમારી, લગ્ન પહેલા પણ તેના બાળપણના પ્રેમી બ્રજેશ કુમાર સાથે પ્રેમમાં હતી, અને આ સંબંધ અકબંધ રહ્યો. ધીમે-ધીમે આ સંબંધ ખતરનાક વળાંક પર પહોંચી ગયો. તેના પતિને ખતમ કરવા માટે બંનેએ શશિ રંજનની હત્યાનું કાવતરું ઘડ્યું.
બ્રજેશે તેના બે ગુનેગાર મિત્રો, મધેપુરાનો સુધાંશુ કુમાર અને રૂપેશ કુમારનો સંપર્ક કર્યો. હત્યા માટે 1.5 લાખ રૂપિયામાં સુપારી આપી દેવાઈ, જેમાંથી બ્રજેશે ગુનેગારોને 1 લાખ રૂપિયા અગાઉથી આપ્યા હતા. ચારેયે સાથે મળીને શશિરંજનના ઘર અને દુકાનની રેકી કરી અને હથિયારો ખરીદ્યા.
26 નવેમ્બરની સાંજે લગભગ 7:50 વાગ્યે રૂપેશ અને સુધાંશુ બ્લૂ રંગની અપાચે બાઇક (BR 43 AF 5894) પર મહેશુઆ તળાવ પાસે પહોંચ્યા. શશિરંજન જાયસ્વાલ બજારમાંથી ઘરે જઈ રહ્યો હતો, ત્યારે રાહ જોઈ રહેલા સુધાંશુએ તેના પર 4 ગોળીઓ ચલાવી. ગુનેગારોએ પોતાનું કાર્ય પૂર્ણ કરી લીધું હોવાનું માનીને, તળાવ પાસે વાંસની ઝાડીઓમાં હથિયારો છુપાવીને ફરાર થઈ ગયા.
SP શરથ આર.એસ.ની સૂચના પર, SDPO વિભાસ કુમારના નેતૃત્વમાં રચાયેલી એક સ્પેશિયલ ટીમે પહેલા ટેક્નિકલ પુરાવાના આધારે બ્રજેશની ધરપકડ કરી. પૂછપરછ દરમિયાન બ્રજેશે સમગ્ર રહસ્ય ખોલી દીધું, ત્યારબાદ પોલીસે સુધાંશુ અને રૂપેશની પણ ધરપકડ કરી. આરોપીઓએ આપેલી માહિતીના આધારે પોલીસે ઘટનામાં વપરાયેલી પિસ્તોલ, એક દેશી બનાવટની પિસ્તોલ, 5 જીવતા કારતૂસ, એક અપાચે બાઇક, 5 મોબાઇલ ફોન અને સુપારીના પૈસામાંથી બચેલા 62,000 રૂપિયા જપ્ત કર્યા. પોલીસે પત્ની સોની કુમારી, પ્રેમી બ્રજેશ કુમાર અને બંને શૂટર સુધાંશુ અને રૂપેશની ધરપકડ કરી છે. અનાજના વેપારી શશિ રંજન જાયસ્વાલની સારવાર ચાલી રહી છે અને તે હવે જોખમથી બહાર છે.
