આમ આદમી પાર્ટી (આપ) એ ગુજરાતના રાજકીય પટલ પર થોડા વર્ષો પહેલાં એક નવી આશા તરીકે ઉભરી હતી. 2022ની વિધાનસભા ચૂંટણીમાં પક્ષે નોંધપાત્ર પ્રદર્શન કરીને પાંચ બેઠકો જીતી હતી અને રાજ્યમાં વિપક્ષની ભૂમિકા ભજવવાની શરૂઆત કરી હતી. રાજકીય વિશ્લેષકોની ચર્ચાઓમાં એવું પણ કહેવાતું હતું કે ‘આપ’ ગુજરાતમાં કોંગ્રેસને પછાડીને ભાજપ સામે મજબૂત વિરોધ પક્ષ તરીકે ઉભરી શકે છે. હવે બે વર્ષ પછી પક્ષની સ્થિતિ અને સક્રિયતા અંગે ઘણા સવાલો ઉભા થઈ રહ્યા છે. શું ‘આપ’ ગુજરાતમાં ફક્ત સોશિયલ મીડિયા સુધી સીમિત રહી ગઈ છે? કાર્યકર્તાઓનો ઉત્સાહ ઓસરી ગયો છે કે પક્ષ નવી રણનીતિ સાથે આગળ વધવાની તૈયારી કરી રહ્યો છે?
2022ની ગુજરાત વિધાનસભા ચૂંટણીમાં ‘આપ’એ નોંધપાત્ર સફળતા હાંસલ કરી હતી. પક્ષે 14 ટકા જેટલા મત મેળવ્યા અને પાંચ ધારાસભ્યો ચૂંટાયા. આ સફળતાએ એવું ચિત્ર ઊભું કર્યું હતું કે ‘આપ’ ગુજરાતમાં નવો રાજકીય વિકલ્પ બની શકે છે. ખાસ કરીને ગ્ગ્રામ્ય વિસ્તારોમાં પક્ષે શિક્ષણ, આરોગ્ય અને ભ્રષ્ટાચાર વિરુદ્ધના મુદ્દાઓને આગળ રાખીને મતદારોનું ધ્યાન ખેંચ્યું હતું. આ સમયે કાર્યકર્તાઓમાં પણ ભારે ઉત્સાહ જોવા મળ્યો હતો અને સોશિયલ મીડિયા પર પક્ષની સક્રિયતા નોંધપાત્ર હતી.
ચૂંટણી પછીના બે વર્ષમાં ‘આપ’ની ફિલ્ડમાં હાજરી નબળી પડી હોય તેવું લાગે છે. સ્થાનિક સ્તરે કાર્યક્રમો, જનસંપર્ક અભિયાનો કે મતદારો સાથે સીધા સંપર્કના પ્રયાસો ખૂબ ઓછા જોવા મળ્યા છે. ઘણા રાજકીય નિરીક્ષકોનું માનવું છે કે પક્ષનું સંગઠન હજુ પણ પ્રાથમિક તબક્કામાં છે અને તે ભાજપના મજબૂત સંગઠનાત્મક માળખા કે કોંગ્રેસના પરંપરાગત વોટબેંકની સામે ટકી શક્યું નથી.
સોશિયલ મીડિયા પર જોતાં ‘આપ’ના કેટલાક પ્રદેશ સ્તરના નેતાઓ નિયમિતપણે લાઇવ, પોસ્ટ્સ અને ચર્ચાઓ દ્વારા સક્રિય રહેવાનો પ્રયાસ કરે છે. અહીં તેઓ રાજ્ય સરકારની નીતિઓની ટીકા કરે છે અને પોતાના મુદ્દાઓ લોકો સુધી પહોંચાડવાનો પ્રયાસ કરે છે. જોકે આ સક્રિયતા મોટે ભાગે ઓનલાઇન જ રહે છે અને ગ્રાઉન્ડ લેવલ પર તેનું પરિણામ દેખાતું નથી. કાર્યકર્તાઓની સંખ્યા અને તેમની સક્રિયતા અંગે પણ સવાલો ઉભા થયા છે. ઘણા કાર્યકર્તાઓમાં નિરાશા જોવા મળે છે કારણ કે સંગઠન અને નેતૃત્વની સ્પષ્ટ દિશા દેખાતી નથી.
ગુજરાતમાં ભાજપનું સંગઠન ઘરે ઘરે અને ગામે ગામે પહોંચેલું છે. તેમના કાર્યકર્તાઓ નિયમિતપણે જનસંપર્ક, સામાજિક કાર્યક્રમો અને ચૂંટણીલક્ષી રણનીતિઓ પર કામ કરે છે. આની સામે ‘આપ’નું સંગઠન હજુ પણ નબળું છે. પક્ષ પાસે સ્થાનિક સ્તરે મજબૂત નેતૃત્વ અને કાર્યકર્તાઓની ટીમનો અભાવ જણાય છે. આ ઉપરાંત ‘આપ’ની ઓળખ હજુ પણ શહેરી મધ્યમવર્ગ સુધી મર્યાદિત રહી હોય તેવું લાગે છે જ્યારે ગ્રામીણ વિસ્તારોમાં તેની પકડ નબળી છે.
‘આપ’ માટે ગુજરાતમાં પોતાની હાજરીને મજબૂત કરવી હવે એક પડકાર છે. પક્ષે સ્થાનિક મુદ્દાઓ પર ધ્યાન કેન્દ્રિત કરીને ગ્રામીણ અને શહેરી બંને વિસ્તારોમાં કાર્યકર્તાઓની ટીમ તૈયાર કરવી પડશે. સોશિયલ મીડિયા એક મહત્વનું સાધન છે પરંતુ તેની સાથે ફિલ્ડમાં સક્રિયતા પણ જરૂરી છે. પક્ષે નવા નેતાઓને તક આપીને અને સંગઠનાત્મક માળખું મજબૂત કરીને જ મતદારોનો વિશ્વાસ જીતી શકે છે.
જો ‘આપ’ ગુજરાતમાં પોતાની ઓળખને મજબૂત કરવા માંગે છે, તો તેને ફિલ્ડમાં સતત કામ કરવું પડશે અને સ્થાનિક મુદ્દાઓ દ્વારા લોકો સાથે જોડાવું પડશે. શું ‘આપ’ આ પડકારોનો સામનો કરીને નવી શરૂઆત કરશે? આનો જવાબ આવનારા દિવસોમાં જ મળશે.
-copy30.jpg)
