6 ફેબ્રુઆરીએ અમરાવતી મ્યુનિસિપલ કોર્પોરેશનના મેયરની ચૂંટણી દરમિયાન એક મોટો અને અણધાર્યો રાજકીય ઘટનાક્રમ સામે આવ્યો હતો. AIMIM કોર્પોરેટર મીરા કાંબલેએ ભાજપના ઉમેદવાર શ્રીચંદ તેજવાનીની તરફેણમાં મતદાન કર્યું હતું. આ ઘટનાક્રમ અમરાવતીમાં બન્યો અને આ સમર્થનને કારણે શ્રીચંદ તેજવાની મેયર તરીકે ચૂંટાયા હતા. સામાન્ય રીતે ભાજપના વિરોધી માનવામાં આવતી AIMIMના આ વલણથી રાજકીય વર્તુળોમાં ખળભળાટ મચી ગયો છે.
અમરાવતી મ્યુનિસિપલ કોર્પોરેશનના મેયરની ચૂંટણીમાં એવા સમીકરણ જોવા મળ્યા, જેની કોઈએ આશા રાખી નહોતી. AIMIM કોર્પોરેટર મીરા કાંબલેએ છેલ્લી ઘડીએ ભાજપના ઉમેદવાર શ્રીચંદ તેજવાનીને સમર્થન આપીને બધાને આશ્ચર્યચકિત કરી દીધા હતા. આ સમર્થનથી ભાજપને નિર્ણાયક લીડ મળી અને શ્રીચંદ તેજવાનીએ મેયર પદ મેળવ્યું હતું.
AIMIMની કાર્યવાહી અને મીરા કાંબલેનું વલણ
આ ઘટના બાદ તરત જ, AIMIMએ કડક વલણ અપનાવ્યું અને મીરા કાંબલેને પાર્ટીમાંથી હાંકી કાઢ્યા. પાર્ટીએ કહ્યું કે આ નિર્ણય તેની વિચારધારા અને અનુશાસન વિરુદ્ધ છે. AIMIMએ કમિશનરને પત્ર લખીને તેમના કોર્પોરેટરનું પદ રદ કરવાની માંગણી કરી હતી. તો, મીરા કાંબલેનું કહેવું છે કે તેમણે વિકાસના એજન્ડાને પ્રાથમિકતા આપતા ભાજપના ઉમેદવાર શ્રીચંદ તેજવાનીને મત આપ્યો હતો. તેમનો તર્ક છે કે અમરાવતી શહેરના વિકાસ માટે આ નિર્ણય જરૂરી હતો.
મહાયુતિની સત્તા અને ભવિષ્યની સત્તા- ભાગીદારી ફોર્મ્યૂલા
મેયરની ચૂંટણીની સાથે-સાથે, ડેપ્યુટી મેયર પદ માટે પણ ચૂંટણીઓ થઈ હતી, જેમાં યુવા સ્વાભિમાન પાર્ટીના સચિન ભેંડે ડેપ્યુટી મેયર તરીકે ચૂંટાયા હતા. મહાયુતિએ હવે અમરાવતી મ્યુનિસિપલ કોર્પોરેશનમાં સત્તા સ્થાપિત કરી દીધી છે. આ મહાયુતિમાં ભાજપ, શિવસેના શિંદે જૂથ, રાષ્ટ્રવાદી કોંગ્રેસ પાર્ટી અજિત પવાર જૂથ અને યુવા સ્વાભિમાન પાર્ટીનો સમાવેશ થાય છે. નક્કી સત્તા-વહેંચણી ફોર્મ્યૂલા હેઠળ, શ્રીચંદ તેજવાની પહેલા 1.5 વર્ષ માટે મેયર રહેશે, ત્યારબાદ આગામી 1.5 વર્ષ માટે ભાજપના આશિષ અતકરે પણ મેયર પદ સાંભળશે. આ વ્યવસ્થા અમરાવતીના રાજકારણમાં સ્થિરતા લાવવા તરીકે જોવામાં આવે છે.
9.jpg)
