ICC મેન્સ T20 વર્લ્ડ કપ 2026માં ભારત-પાકિસ્તાન મેચ માટે રસ્તો સાફ થઈ ગયો છે, પરંતુ હવે એક નવું જોખમ મંડરાઈ રહ્યું છે. 15 ફેબ્રુઆરીએ કોલંબોના આર. પ્રેમદાસા સ્ટેડિયમ ખાતે યોજાનારી આ હાઇ-વોલ્ટેજ મેચમાં વરસાદ વિક્ષેપ પાડે તેવી શક્યતા છે. શ્રીલંકાના હવામાન વિભાગ અનુસાર, બંગાળની ખાડીમાં લૉ-પ્રેશર સિસ્ટમ બની રહી છે, જેના કારણે કોલંબોમાં વરસાદ અને વાવાઝોડાની શક્યતા વધી રહી છે. રવિવારે સવારે કોલંબોમાં ગરમ અને ભેજવાળું હવામાન રહેવાની શક્યતા છે, પરંતુ બપોર બાદ પરિસ્થિતિ બદલાઈ શકે છે.
હવામાન આગાહી મુજબ, બપોરથી સાંજ સુધી વાવાઝોડા સાથે વરસાદની 50 થી 70 ટકા શક્યતા છે. સાંજે 7:00 વાગ્યે મેચ શરૂ થવાના નિર્ધારિત સમય પહેલા ભારે વરસાદ પણ પડી શકે છે, જેના કારણે ટોસમાં વિલંબ થઈ શકે છે અને ઓવરની સંખ્યા ઓછી થઈ શકે છે. શ્રીલંકાના હવામાન વિભાગે ચેતવણી જાહેર કરતા કહ્યું કે, ‘15 ફેબ્રુઆરીની આસપાસ દક્ષિણપૂર્વ બંગાળની ખાડીમાં ઓછા દબાણવાળા ક્ષેત્ર બનવાની સંભાવના છે. અને લોકોને હવામાન અપડેટ્સ પર નજર રાખવાની સલાહ આપવામાં આવી છે.’
જો મેચ વરસાદને કારણે ધોવાઈ તો શું થશે?
જો મેચ વરસાદને કારણે રદ થાય છે, તો ભારતીય ટીમ સુપર-8માં પહોંચી જશે. પાકિસ્તાનને પણ ફાયદો થશે અને તે સુપર 8 માટે ક્વોલિફાય થઇ જશે. વરસાદને કારણે મેચ રદ થવાની સ્થિતિમાં ભારત અને પાકિસ્તાન બંનેને એક-એક પોઈન્ટ મળી જશે. જેથી બંને ટીમોને તેમની ત્રણ મેચમાંથી 5-5 પોઈન્ટ થઈ જશે, જેથી તેઓ ગ્રુપ-Aમાંથી સુપર-8માં પહોંચી જશે. ભારત હાલમાં ગ્રુપ-Aમાં ટોપ પર છે, જ્યારે પાકિસ્તાન બીજા ક્રમે છે અને યુનાઇટેડ સ્ટેટ્સ ઓફ અમેરિકા (USA) ત્રીજા ક્રમે છે.
જો ભારત-પાકિસ્તાન મેચ વરસાદ પડતા મેચ રદ થાય છે, તો અમેરિકા, નામિબિયા અને નેધરલેન્ડ્સ ટૂર્નામેન્ટમાંથી બહાર થઈ જશે. અમેરિકા અને નેધરલેન્ડ્સના ત્રણ મેચમાં 2-2 પોઈન્ટ છે. જો તેઓ તેમની બાકીની મેચ જીતી જાય તો પણ તેઓ માત્ર ચાર પોઈન્ટ સુધી પહોંચી શકે છે, જે ભારત અને પાકિસ્તાન કરતા ઓછા છે. બીજી તરફ, નામિબિયાએ તેની બંને મેચ હારી છે અને તેનો 0 પોઈન્ટ છે.
જો ભારત-પાકિસ્તાન મેચનો નિર્ણય આવે છે, તો વિજેતા ટીમ સીધી સુપર 8માં પહોંચી જશે હારનારી ટીમ 4 પોઈન્ટ સાથે અમેરિકા અને નેધરલેન્ડ્સ સાથે બરાબરી પર રહેશે, અને ક્વોલિફિકેશનની લડાઈ અંતિમ મેચો સુધી જશે. નોંધનીય છે કે ICC મેન્સ T20 વર્લ્ડ કપ 2026માં ગ્રુપ અને સુપર 8 મેચો માટે કોઈ રિઝર્વ ડે નથી. રિઝર્વ ડે ફક્ત સેમિ-ફાઇનલ અને ફાઇનલ માટે છે.
