કહેવાય છે કે સાચી ઉડાણ પાંખોથી નહીં, પણ હિંમતથી થાય છે. આ હિંમત જ પાયલ નાગે બતાવી હતી. 18 વર્ષીય પાયલ નાગે બેંગકોકમાં યોજાયેલી વર્લ્ડ આર્ચરી પેરા સીરિઝમાં ગોલ્ડ મેડલ જીત્યો હતો. તેની આ જીતની ખાસ વાત એ રહી કે, તેણે વિશ્વ ચેમ્પિયન અને ઓલિમ્પિક મેડલ વિજેતા શીતળ દેવીને હરાવીને આ સિદ્ધિ હાંસલ કરી. તેણે આ મેડલમાં હમવતન અને વર્તમાન વર્લ્ડ ચેમ્પિયન શીતલ દેવીને 139-136ના સ્કોરથી હરાવી હતી.
પાયલ નાગની કહાની અસાધારણ સાહસનો પુરાવો છે. તે હાથ-પગ વિના તિરંદાજી કરે છે. કૃત્રિમ પગની મદદથી તે ધનુષ્યને સંતુલિત કરે છે, અને ખભાનો ઉપયોગ કરીને તીર ખેંચીને સચોટ નિશાન સાધે છે. તેનું દરેક નિશાન એ સાબિત કરે છે કે જ્યારે હૌસલો બુલંદ હોય તો શારીરિક મર્યાદાઓ પણ રસ્તો રોકી શકતી નથી.
તેમાં કોઈ શંકા નથી કે શીતલ દેવીને હરાવીને ગોલ્ડ મેડલ જીતવા સાથે પાયલ નાગે દેશવાસીઓને ખુશ થવાની તક આપી. પરંતુ, તેની જિંદગીની કહાની દર્દથી ભરેલી છે. જ્યારે પાયલ માત્ર ત્રીજા ધોરણમાં ભણતી હતી, ત્યારે બાંધકામ હેઠળના મકાનના પાંચમા માળે પોતાના ભાઈ સાથે રમતી વખતે તે જીવંત વીજળીના વાયરના સંપર્કમાં આવી ગઈ હતી. પરિણામ એ આવ્યું કે, 11000 વોલ્ટ વીજળીના જોરદાર ઝટકાને કારણે, તેણે પોતાના બંને હાથ અને પગ ગુમાવી દીધા.
https://twitter.com/fluxfolio_/status/2040445695623061645?s=20
પાયલ નાગની આ હાલત જોઈને સગા-સંબંધીઓએ તેના પિતા બિજય કુમાર નાગ અને તેની માતાને સલાહ આપી કે હાથ-પગ ન હોવાને કારણે ન તો ખાઈ શકશે ન તો ચાલી શકશે. તેનાથી તો સારું આને ઝેર આપી દો.
જોકે, ઓડિશાના બાલાંગીર જિલ્લાના રહેવાસી મજૂર બિજય કુમાર નાગે કોઈની વાત ન સાંભળી. તેના બદલે તેમણે પોતાની પુત્રીને જિલ્લા વહીવટીતંત્ર દ્વારા સંચાલિત સંસ્થા પાર્વતી ગિરિ બાલ નિકેતન અનાથાશ્રમમાં મોકલી આપી. વર્ષ 2023-24માં તેણે કટરા સ્થિત માતા વૈષ્ણોદેવી શ્રાઇન બોર્ડ સ્પોર્ટ્સ કોમ્પ્લેક્સમાં શીતલ દેવી સાથે જ તાલીમ લીધી. 2025માં રાષ્ટ્રીય સ્તરે પદાર્પણ કર્યા બાદ, પાયલે હવે વર્લ્ડ આર્ચરી પેરા સીરિઝમાં ગોલ્ડ જીતીને તેની સફળતાની કહાનીમાં એક નવો અધ્યાય લખ્યો છે.
