કોણ છે ઝિમ્બાબ્વેનો આ બેટ્સમેન, જેને T20 વર્લ્ડ કપમાં કોઈ આઉટ કરી શક્યું નથી?

ઝિમ્બાબ્વેનું ICC મેન્સ T20 વર્લ્ડ કપ 2026માં શાનદાર પ્રદર્શન ચાલુ છે. ઝિમ્બાબ્વેએ ગુરુવારે કોલંબોના આર. પ્રેમદાસા સ્ટેડિયમ ખાતે શ્રીલંકાને 6 વિકેટથી હરાવ્યું. શ્રીલંકાએ ઝિમ્બાબ્વેને જીતવા માટે 179 રનનો ટારગેટ આપ્યો હતો, જેને તેણે 19.3 ઓવરમાં હાંસલ કર્યો હતો. ઝિમ્બાબ્વેએ ગ્રુપ-Bમાં ત્રણેય મેચ જીતી છે, જ્યારે એક મેચ વરસાદથી ધોવાઈ ગઈ હતી. ઝિમ્બાબ્વે 7 પોઈન્ટ સાથે તેમના ગ્રુપમાં ટોચ પર રહ્યું. ઝિમ્બાબ્વે હવે સુપર-8માં ભારત, દક્ષિણ આફ્રિકા અને વેસ્ટ ઈન્ડીઝનો સામનો કરશે.

શ્રીલંકા સામે ઝિમ્બાબ્વેની જીતમાં ઓપનર બ્રાયન બેનેટે મુખ્ય ભૂમિકા ભજવી હતી. બેનેટે 8 ચોગ્ગા સહિત 48 બોલમાં અણનમ 63 રન બનાવ્યા હતા. બેનેટે એક છેડે મજબૂતીથી રમીને અન્ય બેટ્સમેન પર દબાણ બનવા ન દીધું. બેનેટે અગાઉ ઓસ્ટ્રેલિયા અને ઓમાન સામે ઝિમ્બાબ્વેની જીતમાં મુખ્ય ભૂમિકા ભજવી હતી. ઝિમ્બાબ્વે માટે બેનેટે અણનમ 64 રન બનાવ્યા હતા, જ્યારે ઓમાન ટીમ સામે તેણે અણનમ 48 રન બનાવ્યા હતા. મતલબ કે વર્તમાન વર્લ્ડ કપમાં કોઈ બોલર બેનેટને આઉટ કરી શક્યો નથી.

આજના સમયમાં બ્રાયન બેનેટને ઝિમ્બાબ્વેના શ્રેષ્ઠ ક્રિકેટરોમાંથી એક માનવામાં આવે છે. બેનેટે 2022ના અંડર-19 વર્લ્ડ કપમાં ઝિમ્બાબ્વે માટે શાનદાર પ્રદર્શન કર્યું હતું. તેણે 6 મેચમાં 45.50ની સરેરાશથી 273 રન બનાવ્યા હતા અને ટીમના સૌથી સફળ બેટ્સમેન હતો. આ પ્રદર્શને તેને સીનિયર સ્તરે આગળ વધવાનો માર્ગ બતાવ્યો. બેનેટે માત્ર 10 મહિનાની અંદર માઉન્ટેનિયર્સ માટે ફર્સ્ટ-ક્લાસ ડેબ્યૂ કર્યું હતું. તે સ્પેન્સર મેગોડોના કોન્કશન સબસ્ટિટ્યુટ તરીકે ટીમમાં જોડાયો હતો. તેણે ફેબ્રુઆરી 2023માં પોતાનું T20I ડેબ્યૂ કર્યું હતું, જેમાં તેણે ઝડપથી 41 રન બનાવીને પ્રભાવ પાડ્યો હતો. તેની કારકિર્દી ઝડપથી આગળ વધી, જેના કારણે તેને 10 મહિનાની અંદર સીનિયર ટીમમાં બોલાવવામાં આવ્યો. બેનેટે 7 ડિસેમ્બર, 2023ના રોજ આયર્લેન્ડ સામે આંતરરાષ્ટ્રીય ડેબ્યૂ કર્યું હતું.

https://twitter.com/StarSportsIndia/status/2024471524292641167?s=20

મે 2024માં બાંગ્લાદેશ સામેની પાંચમી T20Iમાં, બ્રાયન બેનેટે 49 બોલમાં શાનદાર 70 રન બનાવ્યા હતા. આ તેની પ્રથમ આંતરરાષ્ટ્રીય અડધી સદી હતી. બેનેટે ફર્સ્ટ-ક્લાસ ક્રિકેટમાં પણ ઝડપથી પોતાની છાપ છોડી. તેની પાંચમી મેચમાં સદી ફટકાર્યા બાદ તેણે ફેબ્રુઆરી 2024માં ઇગલ્સ સામે વિસ્ફોટક અણનમ 264 રનની રમત રમી. 259 બોલની આ ઇનિંગમાં તેણે 33 ચોગ્ગા અને 3 છગ્ગા ફટકાર્યા હતા. આ પ્રદર્શનના આધારે તેને જુલાઈ 2024માં આયર્લેન્ડ સામેની એકમાત્ર ટેસ્ટ મેચ માટે ટેસ્ટ ટીમમાં સામેલ કરવામાં આવ્યો હતો. બેનેટનો જોડિયો ભાઈ, ડેવિડ બેનેટ, 2022ની અંડર-19 વર્લ્ડ કપ ટીમનો પણ ભાગ હતો. બંને ભાઈઓએ સાથે મળીને ઝિમ્બાબ્વેના જૂનિયર ક્રિકેટમાં ખાસ ઓળખ બનાવી છે.

22 વર્ષીય બ્રાયન બેનેટે ઝિમ્બાબ્વે માટે 11 ટેસ્ટ, 11 ODI અને 55 T20 આંતરરાષ્ટ્રીય મેચ રમી છે. ટેસ્ટમાં મેચમાં બેનેટે 29.94ની સરેરાશથી 509 રન બનાવ્યા છે, જેમાં 2 સદી અને 2 અડધી સદીનો સમાવેશ થાય છે. ODIમાં જમણા હાથના બેટ્સમેનને 31.63ની સરેરાશથી 348 રન બનાવ્યા છે, જેમાં એક સદીનો સમાવેશ થાય છે. T20 આંતરરાષ્ટ્રીય મેચોમાં બેનેટે 1771 રન બનાવ્યા છે, જેમાં એક સદી અને 11 અડધી સદીનો સમાવેશ થાય છે. T20 આંતરરાષ્ટ્રીય મેચોમાં બેનેટની 35.42ની સરેરાશ અને 143.16ની સ્ટ્રાઇક રેટ રહી છે. બેનેટે પોતાની ઓફ-સ્પિન બોલિંગથી આંતરરાષ્ટ્રીય ક્રિકેટમાં 12 વિકેટ પણ લીધી છે.