ભૂતપૂર્વ ભારતીય ક્રિકેટર યોગરાજ સિંહે ફરી એકવાર ભૂતપૂર્વ પસંદગીકારો પર નિશાન સાધ્યું છે. તેમણે કહ્યું છે કે, જે ખેલાડીઓએ ભારતીય ટીમ માટે 2011નો વર્લ્ડ કપ જીત્યો હતો, તમે તે જ ખેલાડીઓને બાજુ પર રાખ્યા હતા. 1983 પછી, ભારતે બીજી વખત ODI વર્લ્ડ કપ જીત્યો, પરંતુ આશ્ચર્યજનક વાત એ હતી કે ફક્ત 3 ખેલાડીઓને જ આગામી વર્લ્ડ કપમાં રમવાની તક મળી. યોગરાજે ધોની વિશે એવો પણ દાવો કર્યો હતો કે તેમની પાસેથી કેપ્ટનશીપ છીનવાઈ જવાની હતી.
વિરાટ કોહલી, MS ધોની અને R. અશ્વિન એ ત્રણ જ ખેલાડીઓ હતા, જેમણે 2011નો વર્લ્ડ કપ રમ્યો અને પછી 2015નો વર્લ્ડ કપ રમ્યો. બાકીના 12 ખેલાડીઓ ઓસ્ટ્રેલિયા અને ન્યુઝીલેન્ડમાં રમાયેલા વર્લ્ડ કપમાં રમ્યા ન હતા. એક સ્પોર્ટ ચેનલને આપેલા ઇન્ટરવ્યુમાં યોગરાજ સિંહે તે સમયના પસંદગીકારો પર નિશાન સાધતા કહ્યું, 'તમે (BCCI પસંદગીકારો) આ ખેલાડીઓને કોઈ કારણ વગર બરબાદ કરી દીધા. ગૌતમ ગંભીર, યુવરાજ સિંહ, હરભજન સિંહ, ઝહીર ખાન, મોહમ્મદ કૈફ, VVS લક્ષ્મણ, રાહુલ દ્રવિડ જેવા ખેલાડીઓને 2011 પછી બહાર કરી દીધા. તમે 2011ના વર્લ્ડ કપ પછી ટીમને બરબાદ કરી દીધી. 7 ખેલાડીઓની કારકિર્દીને બરબાદ કરી દીધી.'
યોગરાજે વધુમાં દાવો કર્યો કે, તે સમયે ધોનીને બદલી શકાયો હોત, કારણ કે ભારત સતત હારતું રહ્યું. તેમણે કહ્યું, 'જ્યારે MS ધોની કેપ્ટન હતો, ત્યારે આપણે 5 શ્રેણી હારી ગયા અને તેને કહેવામાં આવ્યું કે, તેમની જગ્યાએ બીજાને લેવામાં આવશે. આ વાત મોહિન્દર અમરનાથે કહી હતી.' યોગરાજ સિંહે એવો પણ દાવો કર્યો હતો કે, તેમણે યુવરાજ સિંહને નિવૃત્તિ ન લેવાનું વિચારવા કહ્યું હતું અને કહ્યું હતું કે, તેઓ તેમને ટીમ ઇન્ડિયાના કેપ્ટન બનાવશે અને બધાને બહાર કાઢી નાખશે.
યોગરાજે કહ્યું, 'જ્યારે યુવરાજ નિવૃત્તિ લઈ રહ્યો હતો, ત્યારે મેં પણ તેને વચન આપ્યું હતું કે, હું તેને ભારતીય ટીમના કેપ્ટન બનવામાં મદદ કરીશ અને અમને બધાને ટીમમાંથી બહાર કાઢીશ, પરંતુ તેમણે ટીમ છોડી દીધી.' 2014ના T20 વર્લ્ડ કપ પછી યુવરાજને ભારતીય ટીમમાંથી બહાર કરી દેવામાં આવ્યો હતો, પરંતુ 2016ની શરૂઆતમાં તે પાછો ફર્યો હતો. જોકે, તે 2017ના મધ્ય સુધી માત્ર દોઢ વર્ષ રમ્યો અને 2019માં તેણે આંતરરાષ્ટ્રીય ક્રિકેટમાંથી નિવૃત્તિ લીધી.
9.jpg)
