ડોનાલ્ડ ટ્રમ્પની સરકારે આ દેશના રાષ્ટ્રપતિના જ વીઝા કેન્સલ કરી નાખ્યા

US સ્ટેટ ડિપાર્ટમેન્ટે શુક્રવારે કોલંબિયાના રાષ્ટ્રપતિ ગુસ્તાવો પેટ્રોના વિઝા રદ કર્યાની જાહેરાત કરી. તેમના પર ન્યૂયોર્કમાં અમેરિકન સૈનિકોને ઉશ્કેરવાનો આરોપ મૂકવામાં આવ્યો છે. સ્ટેટ ડિપાર્ટમેન્ટે સોશિયલ મીડિયા પ્લેટફોર્મ X પર લખ્યું, 'આજે સવારે (સ્થાનિક સમય), કોલંબિયાના રાષ્ટ્રપતિ (@PetroGustavo) ન્યૂયોર્ક સિટીની એક શેરીમાં ઉભા હતા અને અમેરિકન સૈનિકોને આદેશોનું ઉલ્લંઘન કરવા અને હિંસા ભડકાવવા માટે વિનંતી કરી હતી.' તેમણે આગળ કહ્યું કે, 'અમે પેટ્રોના વિઝા રદ કરીશું, કારણ કે તેમની ક્રિયાઓ બેદરકારીભરી અને ઉશ્કેરણીજનક છે.'

શુક્રવારે, પેટ્રોએ તેમના સોશિયલ મીડિયા એકાઉન્ટ પર મેગાફોન દ્વારા મોટી ભીડને સ્પેનિશ ભાષામાં આપેલા ભાષણનો એક વીડિયો શેર કર્યો હતો, જેમાં તેમના અનુવાદકે 'વિશ્વભરના દેશો'ને 'અમેરિકા કરતા મોટી' સેનામાં સૈનિકોનું યોગદાન આપવા હાકલ કરી હતી. પેટ્રોએ કહ્યું, 'તેથી, અહીંથી ન્યૂયોર્કમાં, હું યુનાઇટેડ સ્ટેટ્સ આર્મીના તમામ સૈનિકોને માનવતાની સામે પોતાની રાઇફલ નિશાન નહીં બનાવવા માટે વિનંતી કરું છું. ટ્રમ્પના આદેશોનો અનાદર કરો! માનવતાના આદેશોનું પાલન કરો!'

કોલંબિયાના મીડિયાએ અહેવાલ આપ્યો છે કે, પેટ્રો શુક્રવારે રાત્રે બોગોટા માટે ન્યુ યોર્કથી રવાના થયા હતા. પેટ્રો સંયુક્ત રાષ્ટ્ર મહાસભા માટે ન્યુ યોર્કમાં આવ્યા હતા, જ્યાં તેમણે ટ્રમ્પ વહીવટની આકરી ટીકા કરી હતી અને મંગળવારે પોતાના સંબોધનમાં, કેરેબિયનમાં કથિત ડ્રગ-ટ્રાફિકિંગ બોટ પર તાજેતરના US હુમલાઓની ફોજદારી તપાસની હાકલ કરી હતી. પેટ્રોએ કહ્યું હતું કે, હુમલાઓમાં નિઃશસ્ત્ર 'ગરીબ યુવાનો' માર્યા ગયા હતા, તમામ મળીને એક ડઝનથી વધુ, પરંતુ વોશિંગ્ટનનું કહેવું છે કે આ કાર્યવાહી વેનેઝુએલાના દરિયાકાંઠે US ડ્રગ વિરોધી ઝુંબેશનો ભાગ છે, જેના રાષ્ટ્રપતિ વોશિંગ્ટન પર કાર્ટેલ્સને ટેકો આપવાનો આરોપ લગાવે છે.

ટ્રમ્પે દક્ષિણ કેરેબિયનમાં આઠ યુદ્ધ જહાજો અને એક સબમરીન મોકલી છે, અને વર્ષોમાં આ સૌથી મોટી US જમાવટથી વેનેઝુએલામાં આક્રમણનો ભય ઉભો થયો છે. પેટ્રો, જેનો દેશ વિશ્વનો સૌથી મોટો કોકેન ઉત્પાદક છે, તેમણે કહ્યું હતું કે, તેમને શંકા છે કે US બોટ હુમલામાં માર્યા ગયેલા કેટલાક કોલમ્બિયન હતા. ગયા અઠવાડિયે, ટ્રમ્પ વહીવટીતંત્રે ડ્રગ્સ સામેની લડાઈમાં કોલંબિયાને સાથી તરીકેની માન્યતા રદ કરી હતી, પરંતુ આર્થિક પ્રતિબંધો લાદવાનું ટાળ્યું હતું.

આ દેશો ઐતિહાસિક રીતે સાથી રહ્યા છે, પરંતુ કોલંબિયાના પ્રથમ ડાબેરી નેતા પેટ્રોના શાસન હેઠળ તેમના સંબંધો બગડ્યા છે. તેના ગૃહમંત્રી, આર્માન્ડો બેનેડેટ્ટીએ શુક્રવારે રાત્રે X પર લખ્યું હતું કે, પેટ્રોના બદલે ઇઝરાયલી PM બેન્જામિન નેતન્યાહૂના વિઝા રદ કરવા જોઈતા હતા. 'પરંતુ જો કે, સામ્રાજ્ય તેમનું રક્ષણ કરે છે, તેથી તે એવા એકમાત્ર રાષ્ટ્રપતિ પર પોતાનો ગુસ્સો ઠાલવી રહ્યું છે, જે તેમને તેમના મોઢા પર સાચી વાત કહેવા માટે સક્ષમ છે.'