આજના ડિજિટલ અને ઝડપી જીવનમાં, વ્યક્તિ માટે સંબંધો બનાવવા અને જાળવવાનું વધુ મુશ્કેલ બની ગયું છે. એકલતાનો સામનો કરી રહેલા લોકો હવે ઘણીવાર વિચિત્ર પદ્ધતિઓ તરફ વળે છે. આમાંથી એક 'રેન્ટ-એ-બોયફ્રેન્ડ' અથવા 'રેન્ટ-એ-ગર્લફ્રેન્ડ' સેવા છે, જે જાપાન જેવા દેશોમાં વધુને વધુ લોકપ્રિય થઈ રહી છે.
ટોક્યોમાં એકલી રહેતી સારા નામની ઓસ્ટ્રેલિયન મહિલા લાંબા સમયથી સિંગલ હતી. એક દિવસ તેણે ઇન્ટરનેટ પર 'ભાડા પર બોયફ્રેન્ડ'ની જાહેરાત જોઈ અને તેને અજમાવવાનું આતુરતાથી નક્કી કર્યું. તેણે નરુમી નામના 26 વર્ષીય પુરુષ સાથે બે કલાકની ડેટ બુક કરાવી. આ ડેટની કિંમત લગભગ 18 હજાર રૂપિયા (150 પાઉન્ડ) હતી અને બાકીનો ખર્ચ પણ તેણે ભોગવવો પડ્યો.
ડેટ પહેલા જ, નરુમીએ સારાને સ્વીટ સ્વીટ સંદેશા મોકલવાનું શરૂ કરી દીધું, જેમ કે, માય હની, અને માય ક્વીન. સારાના મતે, જ્યારે નરુમીએ પહેલીવાર તેનો હાથ પકડ્યો, ત્યારે તે ખરેખર શરમાઈ ગઈ. સ્ટાઇલિશ ડ્રેસિંગ, હસતો ચહેરો અને નરમ સ્વભાવે તેને એક ખાસ લાગણી આપી. બંને લંચ માટે એક સુંદર જગ્યાએ ગયા, જ્યાં તેઓએ હાસ્ય અને દિલથી વાતો કરી. વાતચીત દરમિયાન, નરુમીએ કહ્યું કે તે જાન્યુઆરી 2024થી આ કામ કરી રહ્યો છે અને દર મહિને લગભગ 10 મહિલાઓ સાથે ડેટ પર જાય છે. આમાં યુનિવર્સિટીની છોકરીઓથી લઈને પરિણીત મહિલાઓનો પણ સમાવેશ થાય છે. તેણે સ્પષ્ટ કહ્યું, 'આ છેતરપિંડી નથી, પરંતુ તે એક સેવા છે.'
નરુમીએ કહ્યું કે, તેના કેટલાક ગ્રાહકો તેને વારંવાર બુક કરાવે છે. એક વખત તેણે સતત 50 કલાક લાંબી ડેટ પણ કરી હતી. સારાને આ મીટિંગ એટલી ગમી કે તેણે ડેટ એક કલાક વધારે લંબાવી અને લગભગ 8,800 રૂપિયા (74 પાઉન્ડ) વધારાનો ખર્ચ કર્યો. તેણે એમ પણ કહ્યું, 'સુખ પૈસાથી ખરીદી શકાય છે.' જોકે સારાએ આ અનુભવને યાદગાર ગણાવ્યો, તેણે એ પણ સ્વીકાર્યું કે તે ખૂબ મોંઘુ છે અને સરળતાથી આદત બની શકે છે. પ્રશ્ન એ પણ ઊભો થાય છે કે, શું આવા સંબંધો ફક્ત ક્ષણિક સુખ હોય છે કે, પછી તે વ્યક્તિને વાસ્તવિક સંબંધોથી વધુ દૂર લઈ જાય છે?
3.jpg)
