સ્વીડનમાં એક ઇલેક્ટ્રોનિક્સ રિટેલરે તેની મહિલા ગ્રાહકોને તેમની કોઈપણ શાખામાંથી કોઈપણ વસ્તુ ખરીદ્યાના એક મહિનાની અંદર ગર્ભવતી થાય તો સંપૂર્ણ રિફંડ આપવાની ઓફર કરી છે. ઘણી મહિલા સંગઠનોએ ઇલેક્ટ્રોનિક્સ સ્ટોરની આવી ઓફરની ટીકા કરવાનું શરૂ કર્યું છે અને ફરિયાદ પણ નોંધાવી છે.
મહિલા ટીકાકારોએ આ વિચિત્ર ઓફરનો પ્રચાર કરતી જાહેરાત પર તીવ્ર પ્રતિક્રિયા આપી છે. તેમાં ગર્ભાવસ્થા પરિક્ષણની સાથે કટાક્ષપૂર્ણ સૂત્ર પણ છે. મહિલાઓએ આ સૂત્ર સામે પણ વાંધો ઉઠાવ્યો છે.
ઇલેક્ટ્રોનિક્સ રિટેલર તેની મહિલા ગ્રાહકોને સ્વીડનમાં સ્થિત તેના 29 સ્ટોરમાંથી કોઈપણ વસ્તુ ખરીદ્યાના 30 દિવસની અંદર ગર્ભવતી થાય તો તેમની ખરીદી પર ઇન-સ્ટોર ક્રેડિટ દ્વારા સંપૂર્ણ રિફંડ ઓફર કરી રહી છે.
આ ઓફર 20 વર્ષથી વધુ ઉંમરની મહિલાઓને લાગુ પડે છે, જેઓ મેડિકલ સર્ટિફિકેટ આપીને સાબિત કરી શકે છે કે તેઓ ઇલેક્ટ્રિકલ ઉપકરણ ખરીદ્યાના 30 દિવસની અંદર ગર્ભવતી થઈ છે. તેમણે એ પણ બતાવવું પડશે કે, તેમની અપેક્ષિત ડિલિવરી તારીખ શાખામાં ખરીદીની તારીખથી 260 થી 303 દિવસની વચ્ચે છે.
નોર્વેજીયન ઇલેક્ટ્રોનિક્સ સપ્લાયરની ઓફર અને જાહેરાત પર મહિલાઓને એક વસ્તુ તરીકે બતાવવા અને તેમાંથી નફો મેળવવાનો આરોપ મૂકવામાં આવ્યો છે. મહિલા ટીકાકારોએ આ જાહેરાતની તુલના માર્ગારેટ એટવુડની પિતૃસત્તાક ડિસ્ટોપિયા 'ધ હેન્ડમેઇડ્સ ટેલ' સાથે કરી છે, જેમાં મહિલાઓને બાળકોનો ઉછેર કરતી ગુલામ તરીકે દર્શાવવામાં આવી હતી.
કંપનીનું કહેવું છે કે તેણે સ્વીડનના ઘટતા જન્મ દરને સુધારવા માટે 'બેબી બોનસ' માપદંડ લાગુ કર્યો છે. અહીં જન્મ દર પ્રતિ મહિલા 1.4 છે. આ દર પડોશી ફિનલેન્ડ કરતા વધારે છે, પરંતુ તે ઘટી રહ્યો છે. 2024ની સરખામણીમાં 2025ના પ્રથમ છ મહિનામાં તેમાં 1.7 ટકાનો ઘટાડો થયો છે.
આ જાહેરાત ઝુંબેશના ટીકાકારોએ સ્વીડનના રાષ્ટ્રીય જાહેરાત લોકપાલને તેની જાણ કરી છે અને ફરિયાદ કરી છે કે, તે માર્કેટિંગ વ્યૂહરચના તરીકે સ્ત્રી-વિરોધી છે.
આ પહેલીવાર નથી, જ્યારે આ ઇલેક્ટ્રોનિક્સ સ્ટોર તેની જાહેરાતને કારણે વિવાદોમાં ઘેરાયેલો હોય. ગયા વર્ષે પણ, આ રિટેલ સ્ટોરે એક જાહેરાત પાછી ખેંચી લેવી પડી હતી, જેમાં તેણે તેના લોગો ટેટૂ કરાવવા માંગતા ગ્રાહકોને 50 ટકા ડિસ્કાઉન્ટ આપવાનું વચન આપ્યું હતું.
15.jpg)
