અરબ સાગરમાં સર્જાયેલું ‘શક્તિ’ વાવાઝોડું હવે નોંધપાત્ર રીતે નબળું પડતાં ગુજરાત માટેનો ગંભીર ખતરો સંપૂર્ણપણે દૂર થયો છે. હવામાન નિષ્ણાત પરેશ ગોસ્વામીના જણાવ્યા મુજબ, વાવાઝોડું જે પહેલા ઓમાન તરફ આગળ વધી રહ્યું હતું, તેણે ગઈકાલ રાતથી દિશા બદલી ભારત તરફ વળાંક લીધો છે. જોકે દિશા બદલતાં જ તેની શક્તિમાં 50 ટકા કરતાં વધુ ઘટાડો નોંધાયો છે.
નિષ્ણાતોના કહેવા મુજબ, હાલની પરિસ્થિતિમાં આ વાવાઝોડું ગુજરાતના દરિયાકિનારે ટકરાય અથવા લેન્ડ થાય તેવી કોઈ શક્યતા નથી. તેથી નાગરિકોને અફવાઓથી દૂર રહી શાંતિ જાળવવાની અપીલ કરવામાં આવી છે.
વાવાઝોડાની હાલની સ્થિતિ
‘શક્તિ’ વાવાઝોડું પહેલાથી પશ્ચિમ દિશામાં આગળ વધતું હતું, પરંતુ ઉત્તર ભારત તરફથી પસાર થતા વેસ્ટર્ન ડિસ્ટર્બન્સ (WD) ના પ્રભાવને કારણે હવે તે ભારત તરફ વળ્યું છે. આ ફેરફારને કારણે વાવાઝોડું નબળું બની ગયું છે અને હવે તે અરબ સાગરમાં હળવી તીવ્રતા સાથે આગળ વધી રહ્યું છે. હવામાન નિષ્ણાત પરેશ ગોસ્વામી કહે છે કે, “આ વાવાઝોડું ગુજરાત તરફ ખસે એવી શક્યતા નથી, તેથી કોઈ ભય રાખવાની જરૂર નથી.”
વરસાદની આગાહી
વાવાઝોડું અને વેસ્ટર્ન ડિસ્ટર્બન્સ બંનેની સંયુક્ત અસરને કારણે રાજ્યના અનેક વિસ્તારોમાં છૂટાછવાયા વરસાદી ઝાપટાં જોવા મળી રહ્યા છે.
હવામાન વિભાગના અનુમાન મુજબ,
7 અને 8 ઓક્ટોબર દરમિયાન કચ્છના દરિયાકાંઠાના તાલુકાઓ — કંડલા, માંડવી, મુંદ્રા, ગાંધીધામ, નલિયા — તેમજ સૌરાષ્ટ્રના દરિયાકાંઠાના વિસ્તારો — દ્વારકા, જામનગર, પોરબંદર, ગીર સોમનાથ અને જૂનાગઢ — માં મધ્યમથી ભારે ઝાપટાં પડી શકે છે. ઉત્તર ગુજરાત અને મધ્યપ્રદેશની સરહદને લગતા વિસ્તારોમાં પણ હળવા વરસાદની શક્યતા છે.
ખેડૂતો માટે સલાહ
ખેડૂતોને સલાહ આપવામાં આવી છે કે તેઓ પોતાના ખેતીના કામકાજમાં કોઈ વિલંબ કે વિક્ષેપ ન કરે. કારણ કે આ વરસાદી માહોલ ટૂંકા સમય માટે જ રહેશે.
9 ઓક્ટોબરથી વાતાવરણ હળવું થવાનું અનુમાન છે અને ત્યારબાદ રાજ્યમાં વરસાદની શક્યતાઓ હાલ નથી.
અરબ સાગરનું ‘શક્તિ’ વાવાઝોડું હવે નબળું પડી ગયું છે અને ગુજરાતને તેની કોઈ ખતરો નથી. આવતા બે દિવસ દરમ્યાન ફક્ત હળવા, છૂટાછવાયા વરસાદી ઝાપટા માટે રાજ્યએ તૈયાર રહેવું.
15.jpg)
