પતિએ પોલીસને કહ્યું, 'સાહેબ, પત્નીના પ્રેમ સંબંધોથી હું કંટાળી ગયો છું... તે ઘણી વખત ઘરેથી ભાગી ગઈ છે'

ઉત્તર પ્રદેશના કૌશામ્બીથી એક કૌટુંબિક વિવાદ સામે આવ્યો છે. એક પુરુષે નજીકના પોલીસ સ્ટેશનમાં ફરિયાદ નોંધાવી છે, જેમાં તેના દ્વારા આરોપ લગાવવામાં આવ્યો છે કે, તેની 45 વર્ષીય પત્ની એક યુવાન પાડોશી સાથે પ્રેમ સંબંધ ધરાવે છે તેને કારણે તે તેને છોડીને ઘણી વખત ઘરેથી ચાલી ગઈ છે. પીડિત પતિ કહે છે કે, આવું કઈ પહેલી વાર નથી બન્યું; આ પહેલા પણ તે ઘણી વખત ઘર છોડીને ભાગી ચૂકી છે. તેણે હવે કંટાળીને કેસ દાખલ કરવાની માંગ કરી છે.

આ આખો મામલો મંઝનપુર કોતવાલી વિસ્તારનો છે. પોલીસને આપેલી ફરિયાદમાં પીડિત પતિએ જણાવ્યું હતું કે, તેની પત્નીને પડોશમાં રહેતા નીરજ નામના યુવક સાથે ઘણા લાંબા સમયથી અફેર હતું. તેણે એવો આરોપ મુક્યો છે કે, 28 જાન્યુઆરીએ આ યુવક તેની પત્નીને લલચાવીને પોતાની સાથે ભગાડી ગયો હતો. પરિવારે તેની ખૂબ શોધખોળ કરી, પરંતુ તેની કોઈ ખબર મળી ન હતી. ત્યારપછી, તે પોલીસ સ્ટેશન ગયો અને ત્યાં લેખિત ફરિયાદ નોંધાવી હતી.

પોલીસને આપેલી ફરિયાદમાં પીડિત પતિએ જણાવ્યું હતું કે, 'સાહેબ, હું મારી પત્નીના પ્રેમ સંબંધોથી કંટાળી ગયો છું. આ પ્રેમ સંબંધોને કારણે તે પડોશમાં રહેતા યુવક સાથે ઘણી વખત ઘરેથી ભાગી ચુકી છે. દર વખતે હું તેને શોધીને ઘરે લઇ આવું છું અને થોડા સમય પછી ફરીથી ભાગી જાય છે. મારી પત્ની તેની ભૂલ સ્વીકારી લે છે અને સામાજિક કલંક લાગવાના ડરને કારણે, મેં હજુ સુધી ફરિયાદ નોંધાવી નથી. પરંતુ હવે તેનું ઘરેથી ભાગી જવાનું ખૂબ જ વધી ગયું છે. મારી પત્ની ફરીથી તેના પ્રેમી સાથે ભાગી ગઈ છે. આરોપી યુવક સામે કેસ દાખલ કરો.'

પતિનું કહેવું છે કે, તે આ પરિસ્થિતિથી માનસિક રીતે ખુબ જ અસ્વસ્થ છે. ફરિયાદના આધારે, પોલીસે આરોપી યુવક સામે કેસ નોંધી લીધો છે અને આ મામલાની તપાસ શરૂ કરી દીધી છે. પોલીસ કહે છે કે, બંનેને શોધવા માટે એક ટીમ બનાવવામાં આવી છે અને ટૂંક સમયમાં તેમને શોધી કાઢવાના પ્રયાસો હાથ ધરવામાં આવશે.

સર્કલ ઓફિસર (CO) શિવાંક સિંહે જણાવ્યું હતું કે, પીડિત પતિની ફરિયાદના આધારે આરોપી યુવક વિરુદ્ધ કેસ નોંધવામાં આવ્યો છે. કેસની તપાસ શમસાબાદ ચોકીના ઇન્ચાર્જ અતુલ શ્રીવાસ્તવને સોંપવામાં આવી છે. પોલીસ બંને પક્ષોના નિવેદનો નોંધશે અને તથ્યોના આધારે આગળની કાર્યવાહી કરવામાં આવશે.