દાહોદ જિલ્લામાં વીજ મીટરોમાં છેડછાડ કરી મોટા પાયે વીજ ચોરી કરવાનું એક મસમોટું કૌભાંડ પ્રકાશમાં આવ્યું છે. MGVCL (મધ્ય ગુજરાત વીજ કંપની લિમિટેડ) ના કર્મચારીઓ અને ખાનગી એજન્સીના અધિકારીઓની મિલીભગતથી આચરાયેલા આ કૌભાંડમાં સરકારને કરોડો રૂપિયાનો ચૂનો લગાડવામાં આવ્યો છે. આ મામલે હવે પોલીસ ફરિયાદ નોંધાતા સમગ્ર પંથકમાં ચકચાર મચી ગઈ છે.
તપાસમાં થયો ચોંકાવનારો ખુલાસો
દાહોદ શહેર, ગ્રામ્ય, ઝાલોદ, લીમડી, લીમખેડા અને દેવગઢ બારીયા જેવા વિસ્તારોમાં લાંબા સમયથી વીજ વપરાશ ઓછો દેખાતો હોવાની ફરિયાદો ઉઠી હતી. જેના આધારે 18 ઓગસ્ટ 2025થી 18 નવેમ્બર 2025 દરમિયાન વ્યાપક તપાસ હાથ ધરવામાં આવી હતી.
તપાસના મુખ્ય આંકડા:
કુલ તપાસાયેલા મીટર: 33,799
સીલ તૂટેલા મીટર: 1,609
રિઝસ્ટર લગાવી ચોરી કરાયેલા મીટર: 888
કેવી રીતે આચરાતી હતી ચોરી?
લેબોરેટરી તપાસમાં બહાર આવ્યું છે કે, મીટરમાં 'રિઝસ્ટર' (વીજ અવરોધક ઉપકરણ) લગાવી દેવામાં આવતું હતું. આ ઉપકરણને કારણે ગ્રાહક ગમે તેટલો વીજ વપરાશ કરે, પરંતુ મીટરમાં યુનિટ ખૂબ જ ઓછા નોંધાતા હતા. આ રીતે GERC ના ALHAF ફોર્મ્યુલા મુજબ અંદાજે રૂ. 10.71 કરોડની સીધી વીજ ચોરી પકડાઈ છે.
સ્માર્ટ મીટર બદલવામાં પણ ભ્રષ્ટાચાર
માત્ર જૂના જ નહીં, પણ નવા સ્માર્ટ મીટર લગાવવાની પ્રક્રિયામાં પણ ગંભીર અનિયમિતતા જોવા મળી છે. ઇન્ટેલિસ્માર્ટ એજન્સી દ્વારા બદલવામાં આવેલા 81 મીટરોમાંથી 50ની તપાસ કરતા, તેમાંથી 38 મીટરમાં અગાઉથી જ રેઝિસ્ટર લગાવી દેવામાં આવ્યા હતા. આ ગેરરીતિને કારણે વધારાનું રૂ. 4.048 કરોડનું નુકસાન નોંધાયું છે. આમ, કુલ મળીને રૂ. 14.76 કરોડનું કૌભાંડ સપાટી પર આવ્યું છે.
પોલીસ કાર્યવાહી અને તપાસ
આ સમગ્ર પ્રકરણમાં વિશ્વાસઘાત અને છેતરપિંડીના આરોપ હેઠળ વીજ કંપનીના કર્મચારીઓ અને એજન્સીના અધિકારીઓ વિરુદ્ધ ફરિયાદ નોંધવામાં આવી છે.
DYSP જગદીશ ભંડારીના જણાવ્યા મુજબ: "તપાસમાં મોટાભાગના મીટરોમાં એકસરખી પદ્ધતિ (મોડસ ઓપરેન્ડી) જોવા મળી છે, જે સૂચવે છે કે આ એક સુનિયોજિત કાવતરું છે. આ સ્કેમમાં MGVCL ના કયા કર્મચારીઓ કે એજન્સીના માણસો સામેલ છે અને ગ્રાહકોને આમાં કોણે મદદ કરી, તે દિશામાં સઘન તપાસ ચાલી રહી છે. જે પણ દોષિત જણાશે તેમની સામે કડક કાયદેસરની કાર્યવાહી કરવામાં આવશે."
હાલમાં પોલીસ દ્વારા તમામ શંકાસ્પદ દસ્તાવેજો અને પુરાવાઓ એકત્ર કરવામાં આવી રહ્યા છે અને આગામી દિવસોમાં મોટા નામો ખુલવાની શક્યતા છે.
5.jpg)
9.jpg)
