વડાપ્રધાન નરેન્દ્ર મોદી 5 જૂન, 2026ના રોજ ગુજરાત અને કેન્દ્રશાસિત પ્રદેશ દમણની સત્તાવાર મુલાકાતે આવી રહ્યા છે. આ મુલાકાત દરમિયાન વડાપ્રધાન સુરત, દમણ તેમજ લક્ષદ્વીપ માટે કુલ ₹21,770 કરોડથી વધુના વિવિધ વિકાસલક્ષી પ્રોજેક્ટ્સનું લોકાર્પણ, ઉદ્ઘાટન અને શિલાન્યાસ (ખાતમુહૂર્ત) કરશે. વડાપ્રધાન બંને સ્થળોએ વિશાળ જનસભાઓને પણ સંબોધિત કરશે.
વડાપ્રધાનનો મિનિટ-ટુ-મિનિટ કાર્યક્રમ
- બપોરે 2:30 વાગ્યે: વડાપ્રધાન સુરત જિલ્લાના હજીરાની મુલાકાત લેશે, જ્યાં તેઓ ચાલી રહેલી ઔદ્યોગિક કામગીરીઓ અને ઈન્ફ્રાસ્ટ્રક્ચર પ્રોજેક્ટ્સની સમીક્ષા કરશે.
- સાંજે 4:15 વાગ્યે: સુરતમાં આયોજિત મુખ્ય કાર્યક્રમમાં ₹18,800 કરોડના વિકાસ કાર્યો દેશને સમર્પિત કરશે અને ખાતમુહૂર્ત કરશે, ત્યારબાદ સભાને સંબોધશે.
- સાંજે 6:15 વાગ્યે: વડાપ્રધાન દમણ પહોંચશે અને ત્યાં 'નમો એરપોર્ટ' (NAMO Airport) ના નવનિર્મિત ટર્મિનલ બિલ્ડિંગનું ઉદ્ઘાટન કરશે. આ સાથે જ તેઓ દમણની 'નમો હોસ્પિટલ' (NAMO Hospital) રાષ્ટ્રને સમર્પિત કરશે.
- સાંજે 7:15 વાગ્યે: દમણમાં ₹2,970 કરોડના પ્રોજેક્ટ્સનું લોકાર્પણ અને ખાતમુહૂર્ત કરશે. આ જ મંચ પરથી કેન્દ્રશાસિત પ્રદેશ લક્ષદ્વીપ માટે ₹885 કરોડના મહત્વકાંક્ષી પોર્ટ પ્રોજેક્ટ્સનો શિલાન્યાસ પણ કરવામાં આવશે. ત્યારબાદ વડાપ્રધાન જનસભાને સંબોધન કરશે.
સુરત અને ગુજરાતને ₹18,800 કરોડની ભેટ
વડાપ્રધાન સુરતમાં રોડ, પાવર (વીજળી) અને ઔદ્યોગિક ક્ષેત્રના અનેક મોટા પ્રોજેક્ટ્સની શરૂઆત કરાવશે.
1. એક્સપ્રેસ-વે અને માર્ગ કનેક્ટિવિટી
- વડોદરા-મુંબઈ એક્સપ્રેસ-વે: 8-લેન એક્સેસ-કંટ્રોલ્ડ વડોદરા-મુંબઈ એક્સપ્રેસ-વેના કિમ-એના(36 km) અને ગણદેવા-એના(27 km) સેક્શનને ખૂલ્લો મૂકશે. આ પ્રોજેક્ટથી ગુજરાત અને મહારાષ્ટ્ર વચ્ચે હાઈ-સ્પીડ ટ્રાન્સપોર્ટેશન, લોજિસ્ટિક્સ ક્ષમતા અને આર્થિક જોડાણને મોટો વેગ મળશે.
- નેશનલ હાઈવે-56 (NH-56) નું ફોર-લેનિંગ: આદિવાસી વિસ્તારોમાં કનેક્ટિવિટી સુધારવા અને પ્રખ્યાત પ્રવાસન સ્થળ 'સ્ટેચ્યુ ઓફ યુનિટી' સુધીનો રસ્તો વધુ સરળ બનાવવા માટે NH-56 ના મહત્વના સેક્શનને ફોર-લેન (ચાર માર્ગીય) કરવા માટે ખાતમુહૂર્ત કરવામાં આવશે.
2. આરોગ્ય ક્ષેત્રે મોટી સુવિધા
- 200 બેડની ESIC હોસ્પિટલ: સુરતમાં નવી આધુનિક 200 બેડની ESIC હોસ્પિટલનું ઉદ્ઘાટન થશે. આ હોસ્પિટલમાં સેન્ટ્રલ લેબોરેટરી, આધુનિક સેકન્ડરી હેલ્થકેર સુવિધાઓ અને અન્ય પૂરક સેવાઓ ઉપલબ્ધ રહેશે. આ ઉપરાંત, કામદારો અને સ્થાનિકો માટે વ્યવસાયિક ઈજાઓ તથા તબીબી કટોકટીના તાત્કાલિક સંચાલન માટે 24/7 ઈમરજન્સી અને ટ્રોમા કેર સેવાની સુવિધા પણ મળશે.
3. પાવર અને ઔદ્યોગિક ઇન્ફ્રાસ્ટ્રક્ચર
- ટ્રાન્સમિશન નેટવર્ક વિસ્તરણ: ઇન્ટર-સ્ટેટ ટ્રાન્સમિશન સિસ્ટમ હેઠળ વીજ નિકાસની ક્ષમતા વધારવા માટે ગુજરાતમાં ટ્રાન્સમિશન નેટવર્ક વિસ્તરણ પ્રોજેક્ટનું ઉદ્ઘાટન થશે.
- ગુજરાત સરકારની મહત્વની પહેલો:
- વલસાડમાં રિવેમ્પ્ડ રિફોર્મ્સ-બેઝ્ડ ડિસ્ટ્રિબ્યુશન સેક્ટર સ્કીમ (RDSS) હેઠળ આધુનિક પાવર ડિસ્ટ્રિબ્યુશન અપગ્રેડેશનનું લોકાર્પણ.
- દહેજ પેટ્રોલિયમ, કેમિકલ્સ એન્ડ પેટ્રોકેમિકલ ઇન્વેસ્ટમેન્ટ રિજન (PCPIR) અને સરીગામ જીઆઈડીસી (GIDC) ખાતે અદ્યતન એફ્લુઅન્ટ ડિસ્પોઝલ (કેમિકલયુક્ત પાણીના નિકાલ) અને ટ્રીટમેન્ટ ઇન્ફ્રાસ્ટ્રક્ચરનું ઉદ્ઘાટન.
- જંબુસર બલ્ક ડ્રગ પાર્ક ખાતે જરૂરી પાયાની ઉપયોગી સુવિધાઓ (Layout Utilities) નું લોકાર્પણ.
દમણ અને દીવ તેમજ દાદરા નગર હવેલી માટે ₹2,970 કરોડના પ્રોજેક્ટ્સ
કેન્દ્રશાસિત પ્રદેશના સર્વાંગી વિકાસને વેગ આપવા માટે હેલ્થકેર, સિવિલ એવિએશન (નાગરિક ઉડ્ડયન), પ્રવાસન અને ઈન્ફ્રાસ્ટ્રક્ચર ક્ષેત્રના પ્રોજેક્ટ્સ લાવવામાં આવ્યા છે.
- નમો એરપોર્ટનું નવું ટર્મિનલ બિલ્ડિંગ: ₹1,340 કરોડના લોકાર્પણ થનારા પ્રોજેક્ટ્સમાં આ નવું ટર્મિનલ મુખ્ય છે, જે પ્રાદેશિક એર કનેક્ટિવિટી વધારશે અને પ્રદેશના આર્થિક વિકાસને વેગ આપશે.
- નમો હોસ્પિટલ: દમણ જિલ્લાની આ જિલ્લા હોસ્પિટલ રોજિંદા આશરે 1,500 ઓપીડી (OPD) દર્દીઓની ક્ષમતા સાથે તૈયાર કરવામાં આવી છે, જેથી સ્થાનિકોને ગુણવત્તાયુક્ત સ્વાસ્થ્ય સેવાઓ મળશે.
- ₹1,630 કરોડના નવા પ્રોજેક્ટ્સનું ખાતમુહૂર્ત: આ અંતર્ગત દમણમાં આઇકોનિક બ્રિજ (Iconic Bridge), દમણ કન્વેન્શન સેન્ટર અને નિફ્ટ (NIFT) કેમ્પસ જેવા મોટા પ્રોજેક્ટ્સનું નિર્માણ શરૂ થશે. આ પ્રોજેક્ટ્સથી પ્રવાસન વધશે, રોકાણ આકર્ષાશે અને રોજગારીની નવી તકો ઊભી થશે.
લક્ષદ્વીપ માટે ₹885 કરોડના પોર્ટ પ્રોજેક્ટ્સની જાહેરાત
વડાપ્રધાન દમણના મંચ પરથી જ કેન્દ્રશાસિત પ્રદેશ લક્ષદ્વીપ માટે પણ ₹885 કરોડના ચાર મહત્વપૂર્ણ પ્રોજેક્ટ્સનો શિલાન્યાસ કરશે.
- બંદરોનો વિકાસ: આ પ્રોજેક્ટ હેઠળ લક્ષદ્વીપના કલ્પની ટાપુ (Kalpeni Island) અને કદમત ટાપુ (Kadmat Island) બંનેની પૂર્વ અને પશ્ચિમ બાજુએ પોર્ટ (બંદર) સુવિધાઓનો વિકાસ કરવામાં આવશે.
- 300 મીટર લાંબા ક્રૂઝ માટે મલ્ટીપર્પઝ જેટી: અહીં મલ્ટીપર્પઝ જેટી બનાવવામાં આવશે, જેથી 300 મીટર સુધીની લંબાઈ ધરાવતા મોટા પેસેન્જર જહાજો અને ક્રૂઝ જહાજો વર્ષના કોઈપણ સમયે સરળતાથી લાંગરી (Berthing) શકશે.
- સ્થાનિકો અને માછીમારોને ફાયદો: આ પ્રોજેક્ટથી મુસાફરોની સુરક્ષિત અવરજવર અને માલસામાનની હેરફેર સરળ બનશે. આ ઉપરાંત માછલીઓનું હેન્ડલિંગ, ઇંધણ વિતરણ, બરફનો પુરવઠો અને બોટ રિપેરિંગ જેવી સંકલિત સુવિધાઓ મળશે, જે સ્થાનિક માછીમારોના જીવનધોરણને સુધારશે અને ટાપુઓના સામાજિક-આર્થિક વિકાસમાં ફાળો આપશે.
