'સાહેબ! હું હજી જીવતો છું, મને મૃત બતાવી મારું પેન્શન બંધ કરી દેવાયું...' વૃદ્ધની ફરિયાદ પર તપાસ

ઉત્તર પ્રદેશના હાપુર જિલ્લામાંથી એક ચોંકાવનારો કિસ્સો પ્રકાશમાં આવ્યો છે. અહીં એક વૃદ્ધ વ્યક્તિએ DM અભિષેક પાંડેને ફરિયાદ કરી કે 'સાહેબ! હું જીવતો છું અને મને મૃત બતાવીને મારું પેન્શન અટકાવી દેવામાં આવ્યું છે.' આ પછી, જ્યારે DM અભિષેક પાંડેએ આ મામલાની તપાસ કરાવી, ત્યારે ગ્રામ વિકાસ અધિકારી યોગેન્દ્ર સિંહની બેદરકારી બહાર આવી. જિલ્લા મેજિસ્ટ્રેટ અભિષેક પાંડેએ તાત્કાલિક ગ્રામ વિકાસ અધિકારી યોગેન્દ્ર સિંહને સસ્પેન્ડ કરી દીધા અને તેમની સામે વિભાગીય તપાસનો આદેશ આપ્યો. DM અભિષેક પાંડેના આ પગલાથી જિલ્લાના અધિકારીઓમાં ખળભળાટ મચી ગયો છે.

પ્રાપ્ત માહિતી અનુસાર, ગઢમુક્તેશ્વર વિકાસ બ્લોકના ગ્રામ પંચાયત ફત્તાપુરમાં રહેતા રાજેન્દ્ર સિંહને સમાજ કલ્યાણ વિભાગ દ્વારા વૃદ્ધ પેન્શન આપવામાં આવી રહ્યું હતું. એવું કહેવામાં આવી રહ્યું છે કે, વર્ષ 2024માં જ્યારે ચકાસણી કરવામાં આવી હતી, ત્યારે ગ્રામ વિકાસ અધિકારી યોગેન્દ્ર સિંહે કાગળ પર રાજેન્દ્ર સિંહને મૃત બતાવ્યા હતા. આમ છતાં, તેમનું પેન્શન ફેબ્રુઆરી 2025 સુધી ચાલુ રહ્યું હતું. હાપુડ જિલ્લામાં CDO હિમાંશુ ગૌતમે ચાર્જ સંભાળ્યો અને પેન્શન ધારકોને ચકાસવા માટે સૂચનાઓ આપતાની સાથે જ ખબર પડી કે, કાગળ પર મૃત રાજેન્દ્ર સિંહને છેલ્લા ત્રણ મહિનાથી તેમના ખાતામાં પેન્શન મળી રહ્યું છે. આ અંગે જાણ થતાં સમાજ કલ્યાણ વિભાગે તેમનું પેન્શન બંધ કરી દીધું.

જ્યારે પેન્શન બંધ કરવામાં આવ્યું, ત્યારે રાજેન્દ્ર સિંહ પોતે તેમના જીવિત હોવાના પુરાવા સાથે જિલ્લા મેજિસ્ટ્રેટ અભિષેક પાંડે પાસે ગયા અને ખાતરી આપી કે તેઓ જીવિત છે, પરંતુ તેમને મૃત બતાવીને તેમનું પેન્શન બંધ કરી દેવામાં આવ્યું છે. DM અભિષેક પાંડેએ આ મામલાની તપાસ જિલ્લા સમાજ કલ્યાણ અધિકારી શિવકુમારને સોંપી. તપાસમાં ગ્રામ વિકાસ અધિકારી યોગેન્દ્ર સિંહની બેદરકારી સામે આવી હતી. તપાસ દરમિયાન ગ્રામ વિકાસ અધિકારી પાસેથી દસ્તાવેજો માંગવામાં આવ્યા હતા, પરંતુ યોગેન્દ્ર સિંહે ખોટા તથ્યો રજૂ કર્યા. આ ઉપરાંત પૂછપરછ દરમિયાન અધિકારીઓ દ્વારા ખોટી માહિતી પણ આપવામાં આવી હતી. ત્યારપછી DM અભિષેક પાંડેએ તેમને તાત્કાલિક સસ્પેન્ડ કરી દીધા છે અને વિભાગીય કાર્યવાહીનો આદેશ આપ્યો છે. સસ્પેન્શન સમયગાળા દરમિયાન તેમને અડધા પગાર પર નિર્વાહ ભથ્થું આપવામાં આવશે. ઉપરાંત, તેમને હાપુડના બ્લોક ડેવલપમેન્ટ ઓફિસર ઓફિસ સાથે જોડવામાં આવ્યા છે.

DM અભિષેક પાંડેના આ પગલાથી જિલ્લાના ગૌણ બેદરકાર અધિકારીઓમાં ખળભળાટ મચી ગયો છે. જિલ્લામાં લગભગ 11 હજાર વૃદ્ધોને દર મહિને 1000 રૂપિયા પેન્શન મળે છે. DM અભિષેક પાંડેએ રાજેન્દ્ર સિંહનું પેન્શન ફરી શરૂ કરવાનો આદેશ આપ્યો છે.