રખડતા કૂતરાઓને ખવડાવવા પર સુપ્રીમ કોર્ટે ગુસ્સે થઈને કહ્યું- 'તમે તેમને ઘરે કેમ ખવડાવતા નથી?'

મંગળવાર, 15 જુલાઈના રોજ, સુપ્રીમ કોર્ટે નોઈડામાં રખડતા કૂતરાઓને ખવડાવવા બદલ થતી હેરાનગતિનો આરોપ લગાવતી અરજી પર સુનાવણી કરી. સુપ્રીમ કોર્ટે અરજી દાખલ કરનાર મહિલાને પૂછ્યું, તમે તમારા ઘરે કૂતરાઓને કેમ ખવડાવતા નથી?

મીડિયા રિપોર્ટ્સ અનુસાર, ન્યાયાધીશ વિક્રમ નાથ અને સંદીપ મહેતાની બેન્ચ કેસની સુનાવણી કરી રહી હતી. બેન્ચે અરજદારના વકીલને કહ્યું, 'શું આપણે રખડતા કૂતરાઓને ખવડાવતા આ દયાળુ લોકો માટે દરેક શેરી, દરેક રસ્તો ખુલ્લો રાખવો જોઈએ? આ પ્રાણીઓ માટે પૂરતી જગ્યા છે. પરંતુ માણસો માટે કોઈ જગ્યા નથી. તમે તેમને તમારા ઘરે કેમ ખવડાવતા નથી? તમને કોઈ રોકી રહ્યું નથી.'

અરજદારના વકીલે કહ્યું કે પશુ જન્મ નિયંત્રણ નિયમો હેઠળ રખડતા કૂતરાઓને ખવડાવવાને કારણે તેમને હેરાન કરવામાં આવી રહ્યા છે. નિયમ 20 હેઠળ, તે વિસ્તારમાં રહેતા રખડતા કૂતરાઓને ખવડાવવાની વ્યવસ્થા કરવાની જવાબદારી રેસિડેન્ટ વેલ્ફેર એસોસિએશન (RWA), એપાર્ટમેન્ટ ઓનર એસોસિએશન અથવા સ્થાનિક સત્તામંડળની છે.

આના પર સુપ્રીમ કોર્ટે અરજદારને સૂચન કર્યું, 'અમે તમને તમારા ઘરમાં તેઓના રહેવા માટે એક આશ્રયસ્થાન ખોલવાની સલાહ આપીએ છીએ. તમારા ઘરમાં દરેક કૂતરાને ખાવાનું આપો.'

અરજદારના વકીલે કહ્યું કે, તેઓ પશુ જન્મ નિયંત્રણ નિયમોનું પાલન કરી રહ્યા છે. નિયમો હેઠળ, ગ્રેટર નોઇડામાં આવી જગ્યાઓ બનાવવામાં આવી રહી છે. પરંતુ નોઇડાના અધિકારીઓ આમ કરી રહ્યા નથી. તેમણે કહ્યું કે કૂતરાઓને ખાવાનું આપવા માટેની જગ્યાઓ એવી જગ્યાએ બનાવી શકાય છે, જ્યાં વધુ લોકો ન હોય. આના પર, બેન્ચે પૂછ્યું, 'શું તમે સવારે સાયકલ ચલાવો છો? એકવાર પ્રયાસ કરો, જુઓ શું થાય છે.'

વકીલે જવાબ આપ્યો કે, તે મોર્નિંગ વોક માટે જાય છે. રસ્તામાં ઘણા કૂતરા હોય છે. આના પર, બેન્ચે કહ્યું, 'આના કારણે જ, મોર્નિંગ વોક માટે જતા લોકો પણ જોખમમાં છે, સાયકલ સવારો અને ટુ-વ્હીલર સવારો વધુ જોખમમાં છે.'

આ પછી, સુપ્રીમ કોર્ટે આ અરજીને એજ પ્રકારના મુદ્દા પર પેન્ડિંગ રહેલી બીજી અરજી સાથે જોડી દીધી.