બીજી વન-ડેમાં શ્રીલંકા ટોસ જીત્યું, રોહિત શર્માએ ટીમમાં કર્યો એક ફેરફાર

ભારત-શ્રીલંકા વન-ડે સીરિઝની બીજી મેચ આજે કોલકાતાના ઈડન ગાર્ડન્સ મેદાન પર રમાઈ રહી છે. શ્રીલંકાના કેપ્ટન દાસુન શનાકાએ ટોસ જીતીને પ્રથમ બેટિંગ કરવાનો નિર્ણય કર્યો હતો. ભારતના પ્લેઈંગ-XIમા એક ફેરફાર થયો છે. લેગ સ્પિનર યુઝવેન્દ્ર ચહલ સંપૂર્ણ રીતે ફિટ નથી. તેના સ્થાને કુલદીપ યાદવને સ્થાન આપવામાં આવ્યું છે.

આ મેચમાં ટીમ ઈન્ડિયા પાસે શ્રીલંકા સામે સતત દસમી વન-ડે સીરિઝ જીતવાની તક હશે. ભારતીય ટીમ છેલ્લા 26 વર્ષથી શ્રીલંકા સામે વન-ડે સીરિઝમાં હાર્યું નથી. તેની છેલ્લી હાર 1997માં થઈ હતી. આ મેચમાં વિરાટ કોહલી પાસે ચાર મોટા રેકોર્ડ બનાવવાની તક છે. 67 રન બનાવતાની સાથે જ તે ODI ક્રિકેટમાં સૌથી વધુ રન બનાવનાર બેટ્સમેનોની યાદીમાં ટોપ-5માં પહોંચી જશે. હવે વિરાટના 266 વન-ડેની 257 ઇનિંગ્સમાં 12,584 રન છે. તે હાલમાં છઠ્ઠા સ્થાને છે. શ્રીલંકાના મહેલા જયવર્દને 448 મેચની 418 ઇનિંગ્સમાં 12,650 રન સાથે પાંચમા નંબર પર છે.

જો વિરાટ આ મેચમાં સદી ફટકારે છે તો તે ODI ક્રિકેટમાં કોઈપણ એક ટીમ સામે સૌથી વધુ સદી ફટકારવાનો વર્લ્ડ રેકોર્ડ પોતાના નામે કરી લેશે. વિરાટ હાલમાં આ મામલે સચિન તેંદુલકરની બરાબરી પર છે. વિરાટે શ્રીલંકા અને વેસ્ટ ઈન્ડિઝ સામે 9-9 સદી ફટકારી છે. આ સાથે જ સચિને ઓસ્ટ્રેલિયા સામે 9 સદી ફટકારી છે.

શ્રેણીની પ્રથમ મેચ 67 રને જીતીને ટીમ ઈન્ડિયાએ 1-0ની લીડ જાળવી રાખી છે. જો રોહિત શર્માની કપ્તાની હેઠળની ભારતીય ટીમ આ બીજી મેચ પણ જીતી જશે તો તે શ્રેણી 2-0થી કબજે કરશે. જ્યારે શ્રીલંકાનો કેપ્ટન દાસુન શનાકા મેચ જીતીને શ્રેણીમાં બરાબરી કરવાના ઈરાદા સાથે મેદાનમાં ઉતરશે.